Raja Saab: ఎందుకింత రిస్క్ రాజాసాబ్..? అందరి దృష్టి ఇప్పుడు దానిపైనే..!

Raja Saab: రెబల్ స్టార్ ప్రభాస్(Prabhas) అంటే ప్రేక్షకులకు గుర్తొచ్చేది భారీ యాక్షన్, పవర్ ఫుల్ పాత్రలు, గ్రాండ్ సినిమాలు. కానీ ఇప్పుడు అదే ప్రభాస్ తన ఇమేజ్‌ను పూర్తిగా మార్చుకుంటూ ‘ది రాజా సాబ్’ సినిమాలో కొత్తగా కనిపించబోతున్నాడు. ఈ సినిమాలో ప్రభాస్ ఒక సాధారణ పక్కింటి అబ్బాయి (బాయ్ నెక్స్ట్ డోర్) పాత్రలో నటిస్తున్నాడు. ఇది ఆయన గత కొన్ని ఏళ్లుగా చేసిన పాత్రలకు పూర్తి భిన్నం కావడంతో ప్రేక్షకుల్లో ఆసక్తి పెరుగుతోంది.

ఇప్పటికే రిలీజ్ అయిన వీడియోలు, పోస్టర్లు చూసిన అభిమానులు ప్రభాస్ ఈ కొత్త లుక్‌ను బాగా ఎంజాయ్ చేస్తున్నారు. లైట్‌గా, సరదాగా కనిపిస్తున్న ప్రభాస్‌ను చూసి ఫ్యాన్స్ సంతోషంగా ఉన్నారు. అయితే ఈ మార్పును సాధారణ ప్రేక్షకులు ఎలా తీసుకుంటారు అన్నది ఇప్పుడు పెద్ద ప్రశ్నగా మారింది. భారీ యాక్షన్ సినిమాలకు అలవాటు పడిన ఆడియన్స్, ఈ కొత్త అవతారాన్ని ఎంతవరకు ఆదరిస్తారన్నది సినిమా ఫలితాన్ని నిర్ణయించనుంది.

ఈ సినిమాకు దర్శకత్వం వహిస్తున్న మారుతి(Director Maruthi), ప్రభాస్‌ను ఇలాంటి పాత్రలో చూపించడం నిజంగా ఓ పెద్ద రిస్క్ అని చెప్పాలి. కానీ మారుతి తన స్టైల్‌లో కామెడీ, ఫాంటసీ అంశాలతో సినిమాలను ఆసక్తికరంగా చూపించడంలో మంచి పేరు సంపాదించాడు. ఈసారి కూడా కథ, పాత్రల మీద పూర్తి నమ్మకంతో ఈ ప్రయోగం చేస్తున్నాడు.

ఇటీవల ‘ది రాజా సాబ్’ సినిమాకు సంబంధించిన “ది లెగసీ ఆఫ్ ది రాజా సాబ్” అనే వీడియో సిరీస్‌లో మూడో ఎపిసోడ్‌ను మేకర్స్ విడుదల చేశారు. ఇందులో దర్శకుడు మారుతి ప్రభాస్ పాత్ర గురించి ఆసక్తికర విషయాలు చెప్పారు. తెలుగు ప్రేక్షకులు ఇప్పటివరకు ప్రభాస్‌ను వినోదాత్మకంగా చూసినా, పాన్ ఇండియా స్థాయిలో మాత్రం ఇలాంటి ప్రభాస్‌ను ఎవరూ చూడలేదని ఆయన తెలిపారు. థియేటర్ నుంచి బయటకు వచ్చిన తర్వాత ఈ సినిమాలోని ప్రభాస్‌ను ప్రేక్షకులు చాలా రోజుల పాటు గుర్తుపెట్టుకుంటారని చెప్పారు.

ఈ సినిమా హారర్, కామెడీ కలయికగా ఉండటంతో అందరూ చాలా కష్టపడ్డారని మారుతి అన్నారు. ప్రభాస్ లుక్, మేకప్, హెయిర్ స్టైల్, మాట్లాడే తీరు అన్నీ కొత్తగా ఉంటాయని చెప్పారు. కూర్చోవడం, నిలబడడం వరకు చిన్న చిన్న విషయాల్లో కూడా ప్రభాస్ తన ప్రత్యేకమైన స్టైల్ చూపించాడని తెలిపారు. ఈ వివరాలన్నీ ప్రేక్షకులకు బాగా నచ్చుతాయని ఆయన ధీమా వ్యక్తం చేశారు.

ఇక సినిమా ట్రైలర్ విషయానికి వస్తే, ప్రభాస్ సరదాగా, ఆనందంగా జీవించే వ్యక్తిగా కనిపించాడు. అతడికి ఒక పాత ఇల్లు వారసత్వంగా వస్తుంది. ఆ ఇల్లు దెయ్యాలతో నిండిన భయంకరమైన భవనం అని తెలుస్తుంది. ట్రైలర్‌లో ప్రభాస్ దెయ్యాలను ఎదుర్కొనే సన్నివేశాలు ఆసక్తికరంగా ఉన్నాయి. ఇందులో ప్రభాస్ డ్యుయల్ రోల్‌లో కనిపించబోతున్నాడు. మరో పాత్రలో వయసైన లుక్‌తో, ప్రత్యేక శక్తులు ఉన్న వ్యక్తిగా చూపించారు.

ఈ సినిమాలో సంజయ్ దత్ మెయిన్ విలన్‌గా నటిస్తున్నాడు. ఆయన పాత్ర భయంకరంగా, శక్తివంతంగా ఉంటుందని ట్రైలర్ చెబుతోంది. అలాగే నిధి అగర్వాల్, మాళవిక మోహనన్, రిద్ధి కుమార్ హీరోయిన్లుగా నటిస్తున్నారు. బోమన్ ఇరానీ కూడా కీలక పాత్రలో కనిపించబోతున్నారు.

‘ది రాజా సాబ్’ సినిమా జనవరి 9, 2026న విడుదలకు సిద్ధంగా ఉంది. ప్రభాస్ తీసుకున్న ఈ కొత్త రిస్క్ ప్రేక్షకులకు మాస్టర్ స్ట్రోక్‌గా మారుతుందా, లేక ఛాలెంజ్‌గా మిగిలిపోతుందా అన్నది రిలీజ్ తర్వాత తేలనుంది.