Electoral Bonds: మోదీ ప్రభుత్వానికి బిగ్ షాక్‌ ..ఎలక్టోరల్‌ బాండ్స్‌ పై సుప్రీం కోర్టు సంచలన తీర్పు!

Supreme Court on Electoral Bonds: ఎలక్టోరల్‌ బాండ్స్‌  రాజ్యాంగ విరుద్దమని సుప్రీం కోర్టు (Supreme Court) సంచలన తీర్పునిచ్చింది. ఐదుగురు సభ్యుల ధర్మాసనం ఏకగ్రీవంగా ఎలక్టోరల్‌ బాండ్లు చట్ట విరుద్దమని తెలిపింది. నల్లధనాన్ని (Black Money) ఆరికట్టడానికి ఎలక్టోరల్‌ బాండ్లు ఒక్కటే మార్గం కాదు. అనేక ప్రత్యామ్నాయ మార్గాలున్నాయి. విరాళాలు ఇచ్చే వారి వివరాలను గోప్యంగా ఉంచడం నేరం. ఎలక్టోరల్‌ బాండ్లు ప్రాథమిక హక్కులను ఉల్లంఘిస్తున్నాయని సుప్రీం తెలిపింది. రాజకీయ పార్టీలకు విరాళాలు ఇవ్వడం క్విడ్‌ ప్రో కో కు దారి తీస్తుందని సుప్రీం అభిప్రాయాన్ని వ్యక్త పరిచింది.

నల్లధనం పేరు మీద సమాచారాన్ని దాచలేరు. ఎలక్టోరల్‌ బాండ్లను (Electoral Bonds) రద్దు చేయాల్సిందే అని సుప్రీం సంచలన తీర్పునిచ్చింది.ఎలక్టోరల్‌ బాండ్లు అనేవి ఆర్టికల్‌ 19(1) తో పాటు సమాచారహక్కు చట్టానికి విఘాతం కలిగించేవిగా ఉన్నాయని పేర్కొంది.

2017లో ఆదాయపు పన్ను చట్టంలో చేసిన మార్పు (పెద్ద విరాళాలను కూడా గోప్యంగా ఉంచడం) రాజ్యాంగ విరుద్ధం. 2017లో ప్రజాప్రాతినిధ్య చట్టంలో మార్పు కూడా రాజ్యాంగ విరుద్ధం. కంపెనీ చట్టంలో మార్పు కూడా రాజ్యాంగ విరుద్ధం. ఈ సవరణల కారణంగా లావాదేవీ ప్రయోజనం కోసం ఇచ్చిన విరాళాల గురించిన సమాచారం కూడా దాచబడుతుంది. SBI అన్ని పార్టీలు స్వీకరించిన విరాళాల సమాచారాన్ని మార్చి 6 లోపు ఎన్నికల కమిషన్‌కు అందించాలి. ఎన్నికల సంఘం ఈ సమాచారాన్ని మార్చి 13లోగా తన వెబ్‌సైట్‌లో ప్రచురించాలి. రాజకీయ పార్టీలు ఇంకా క్యాష్ చేసుకోని బాండ్లను బ్యాంకుకు తిరిగి ఇవ్వాలని సుప్రీం తీర్పునిచ్చింది.

ఎలక్టోరల్ బాండ్లకు సంబంధించి ఏడీఆర్ దాఖలు చేసిన పిటిషన్‌ను భారత ప్రధాన న్యాయమూర్తి డీవై చంద్రచూడ్ నేతృత్వంలోని ఐదుగురు సభ్యుల రాజ్యాంగ ధర్మాసనం విచారించింది. ఇందులో సీజేఐతో పాటు జస్టిస్ సంజీవ్ ఖన్నా (Justice Sanjiv Khanna), జస్టిస్ బీఆర్ గవాయ్, జస్టిస్ జేబీ పార్దివాలా, జస్టిస్ మనోజ్ మిశ్రా ఉన్నారు.

దేశంలోని అధికార పార్టీ, భారతీయ జనతా పార్టీ 2022-23 సంవత్సరంలో సుమారు రూ. 720 కోట్ల విరాళాలను స్వీకరించినట్లు సమాచారం. కాంగ్రెస్, ఆమ్ ఆద్మీ పార్టీ (ఆప్), కమ్యూనిస్ట్ పార్టీ ఆఫ్ ఇండియా-మార్క్సిస్ట్ (సిపిఐ-ఎం), నేషనల్ పీపుల్స్ పార్టీ (ఎన్‌పిపి) అనే నాలుగు ఇతర జాతీయ పార్టీలు అందుకున్న మొత్తం మొత్తం కంటే బీజేపీకి విరాళాల రూపంలో లభించిన మొత్తం ఐదు రెట్లు ఎక్కువ.