ఒకే ఒక్క ప్రశ్న మిగిలిపోయింది..

యంగ్ రెబల్ స్టార్ ప్రభాస్(Prabhas) హీరోగా నటిస్తున్న మరో పాన్ ఇండియా మూవీ ‘కల్కి 2898 AD(Kalki2898AD)’. గురువారం ఈ గ్లింప్స్ వీడియోను అమెరికా శాన్ డియాగో కామిక్ కాన్‌లో గ్రాండ్‌గా రిలీజ్ చేశారు. ఈ గ్లింప్స్‌పై ప్రశంసలు వెల్లువెత్తున్నాయి. ప్రభాస్ లుక్, విజువల్స్ మైండ్ బ్లోయింగ్ అంటూ కామెంట్స్ చేస్తున్నారు. తాజాగా ఈ గ్లింప్స్‌పై దర్శకధీరుడు ఎస్.ఎస్.రాజమౌళి(SS Rajamouli) కూడా ప్రశంసలు కురిపించారు. ‘నాగి, వైజయంతీ మూవీస్(Vyjayanthi Movies) అద్భుతంగా పనిచేశారు. భవిష్యత్తులో జరగబోయేదాన్ని ప్రేక్షకులను నమ్మించే విధంగా సృష్టించడం చాలా కష్టమైన పని. అలా చేసి చూపించవొచ్చని మీరు నిరూపించారు. డార్లింగ్ మామూలుగా లేడు. కాకపోతే ఒకే ఒక్క ప్రశ్న మిగిలిపోయింది.. విడుదల తేదీ’ అని ట్విట్టర్‌లో పోస్ట్ చేశారు.

జక్కన్న మీరు అడగకూడదు ఆ మాట..

జక్కన్న పోస్టు చూసిన సినీ అభిమానులతో పాటు ఇండస్ట్రీ పర్సన్స్ కూడా వెరైటీగా స్పందిస్తున్నారు.‘చూడండి ఎవరు విడుదల తేదీ గురించి అడుగుతున్నారో’అంటూ బాహుబలి నిర్మాత శోభు యార్లగడ్డ కామెంట్ చేశారు. ఆయనే కాదు చాలా మంది ఫ్యాన్స్ కూడా సార్ రాజమౌళి(SS Rajamouli) మీరు రిలీజ్ డేట్ గురించి మాట్లాడకూడదంటూ సరదాగా సెటైర్లు వేస్తున్నారు. ఎందుకంటే రాజమౌళి తీసే సినిమాలు చాలా సమయం తీసుకుంటాయి. మొదట ఆ తేదీని సినిమాను విడుదల చేస్తామని ప్రకటిస్తారు. ఆ తర్వాత రిలీజ్ తేదీలు మారుతూ ఉంటాయి. బాహుబలి, ఆర్ఆర్ఆర్ సినిమాల విడుదల తేదీల విషయంలో ఇలాగే జరిగింది. అందుకే జక్కన్నపై ఫన్నీ కామెంట్స్ చేస్తున్నారు.

పాన్ వరల్డ్ రేంజ్‌లో నిర్మాణం..

‘మహానటి’ డైరెక్టర్ నాగ్ అశ్విన్ దర్శకత్వం వహిస్తోన్న ఈ సినిమాలో బిగ్ బీ అమితాబ్ బచ్చన్(Amitabh Bachan), లోకనాయకుడు కమల్ హాసన్(kamal haasan), దీపికా పడుకొనే(Deepika Padukone), దిశా పటాని కీలక పాత్రల్లో నటిస్తున్నారు. నాని ‘దసరా’ ఫేమ్ సంతోష్ నారాయణన్ సంగీతం అందిస్తున్నారు. ప్రతిష్టాత్మక వైజయంతీ మూవీస్ సంస్థ ఈ సినిమాను భారీ బడ్జెట్‌తో పాన్ వరల్డ్ రేంజ్‌లో నిర్మిస్తోంది. వచ్చే ఏడాది సంక్రాంతి కానుకగా ఈ చిత్రాన్ని ప్రపంచ వ్యాప్తంగా విడుదల చేయనున్నట్లు తెలుస్తోంది. ఇక ప్రశాంత్ నీల్ దర్శకత్వంలో డార్లింగ్ నటించిన ‘సలార్’ సీజ్‌ఫైర్ సెప్టెంబర్ 28న రిలీజ్ అవ్వనుంది.