Ind vs Pak : ఇండియా vs పాకిస్తాన్..  ఇలా చేస్తే రూ.7లక్షల ఫైన్.. డైరెక్ట్ గా జైలుకే

ఆసియా కప్ లో భాగంగా మరికాసేపట్లో ఇండియా, పాకిస్తాన్ జట్ల మధ్య టీ20 మ్యాచ్ జరగనుంది. దుబాయ్ అంతర్జాతీయ క్రికెట్ స్టేడియంలో మ్యాచ్ జరుగుతోంది.  భారత కాలమానం ప్రకారం రాత్రి 8:00 కి ప్రారంభమవుతుంది. రాత్రి 7:30 PMకి టాస్ వేస్తారు.  ఇటీవలి పహెల్గామ్ ఉగ్రదాడి తర్వాత ఈ మ్యాచ్‌ను బహిష్కరించాలని కొన్ని వర్గాల నుంచి డిమాండ్లు వచ్చాయి. ఈ ఉగ్రదాడికి నిరసనగా, భారత జట్టు ఆటగాళ్లు నల్లటి చేతిపట్టీలు ధరించి మ్యాచ్ ఆడనున్నారు. ఇది జాతీయ దుఃఖం, అమరవీరులకు గౌరవం ప్రకటించడానికి ఈ నిర్ణయం తీసుకుంది.  

రెండు జట్లు తమ తొలి మ్యాచ్‌లలో విజయం సాధించి మంచి ఫామ్‌లో ఉన్నాయి. భారత జట్టు యుఏఈని, పాకిస్తాన్ జట్టు ఒమన్‌ను ఓడించాయి. భారత జట్టుకు బ్యాటింగ్ బలం ఎక్కువగా ఉండగా, పాకిస్తాన్ తమ బౌలింగ్‌పై ఆధారపడుతోంది. అయితే ఈ మ్యాచ్ కు పోలీసులు భారీ భద్రతను ఏర్పాటు చేశారు. భద్రతా ప్రోటోకాల్‌ల గురించి మరిన్ని వివరాలు -- జెండాలు, బ్యానర్లు, గొడుగులు, పెద్ద కెమెరాలు, సెల్ఫీ స్టిక్‌లు, మండే పదార్థాలు,  పదునైన వస్తువులను స్టేడియంలోకి అనుమతించరు. వీటిలో దేనినైనా తీసుకెళ్లడం వల్ల రూ. లక్ష నుండి రూ. 7 లక్షల వరకు జరిమానా విధించవచ్చు. హింసకు పాల్పడటం, వస్తువులను విసిరేయడం,  జాత్యహంకార లేదా దుర్వినియోగ భాషను వాడటం  వల్ల జైలు శిక్షకు విధించే అవకాశం ఉంది. 

ఇప్పటి వరకు 16 సార్లు పోటీ

ఇక భారత్ తమ మొదటి మ్యాచ్‌లో యూఏఈని 9 వికెట్ల తేడాతో సునాయాసంగా ఓడించింది. ఈ మ్యాచ్‌లో బౌలింగ్ విభాగం అద్భుతంగా రాణించి, యూఏఈని కేవలం 57 పరుగులకే ఆలౌట్ చేసింది. పాకిస్తాన్ తమ మొదటి మ్యాచ్‌లో ఒమన్‌పై 93 పరుగుల తేడాతో భారీ విజయం సాధించింది. వారి బ్యాటింగ్ , బౌలింగ్ రెండూ బలమైన ప్రదర్శన చేశాయి. భారత్ , పాకిస్తాన్ జట్లు ఆసియా కప్‌లో ఇప్పటి వరకు 16 సార్లు తలపడ్డాయి. ఈ రికార్డులలో భారత్ 9 సార్లు గెలవగా, పాకిస్తాన్ 6 సార్లు గెలిచింది. ఒక మ్యాచ్ ఫలితం తేలకుండా ముగిసింది. అయితే, ప్రస్తుత ఫామ్, జట్ల బలం ఆధారంగా చూస్తే, ఇది ఇరు జట్ల మధ్య ఒక హోరాహోరీ పోరుగా ఉంటుందని అంచనా వేస్తున్నారు. ఈ మ్యాచ్‌ ఫలితం గ్రూప్ టాప్ పొజిషన్‌ను నిర్ణయించడంలో కీలకం కానుంది.