ప్రధాని మోడీకి సంచలన లేఖ.. ‘POKపై దాడి చేయాలంటూ’

పాకిస్తాన్ ఆక్రమిత కాశ్మీర్ విషయంలో కేంద్ర ప్రభుత్వం తక్షణమే జోక్యం చేసుకోవాలని కోరుతూ పీఓకే శరణార్థులు ప్రధానమంత్రి నరేంద్ర మోదీకి ఓ కీలక లేఖ రాశారు. వెనిజులాలో అమెరికా జరిపిన ఆర్మీ ఆపరేషన్‌లా పీఓకేకు విముక్తి కల్పించాలని వారు విజ్ఞప్తి చేశారు. పీఓకే శరణార్థులకు ప్రాతినిధ్యం వహిస్తున్న 'SOS ఇంటర్నేషనల్' అనే సంస్థ ఈ లేఖను ప్రధాని కార్యాలయానికి పంపింది. ఇటీవల వెనిజులాలో అమెరికా దళాలు ఆ దేశ అధ్యక్షుడు నికోలస్ మదురోను లక్ష్యంగా చేసుకుని చేసిన ఆపరేషన్ ప్రపంచవ్యాప్తంగా చర్చనీయాంశమైంది. అలాగే భారత ప్రభుత్వం కూడా పీఓకేలో తిష్టవేసిన ఉగ్రవాద మూకలపై సాహసోపేతమైన దాడికి దిగాలని ఆ సంస్థ చైర్మన్ రాజీవ్ చుని కోరారు.

హిజ్బుల్ ముజాహీదీన్ చీఫ్, మోస్ట్ వాంటెడ్ ఉగ్రవాది సయ్యద్ సలావుద్దీన్‌ను బంధించి భారతదేశానికి తీసుకురావాలని లేఖలో ప్రధానంగా ప్రస్తావించారు. పీఓకేలోని ఉగ్రవాద మౌలిక సదుపాయాలను పూర్తిగా ధ్వంసం చేయడానికి మరోసారి సర్జికల్ స్ట్రైక్స్ వంటి నిర్ణయాత్మక చర్యలు అవసరమని శరణార్థులు అభిప్రాయపడ్డారు. పీఓకే ప్రస్తుతం ఉగ్రవాదులకు, డ్రగ్స్ మాఫియాకు, అక్రమ ఆయుధాల సరఫరాకు 'లాంచ్ ప్యాడ్'గా మారిందని, ఇది భారత దేశ భద్రతకు పెను ముప్పుగా పరిణమించిందని వారు ఆందోళన వ్యక్తం చేశారు.

అంతర్జాతీయంగా వచ్చే స్పందనలు లేదా ఒత్తిళ్ల కంటే దేశ ప్రయోజనాలకే పెద్దపీట వేయాలని శరణార్థులు ప్రభుత్వానికి సూచించారు. పీఓకే ప్రాంతం చారిత్రక కాలం నుండి భారతదేశంలో అంతర్భాగమని, దానిని శత్రువుల నుండి విముక్తి చేసి అధికారికంగా భారత్‌లో విలీనం చేయడమే ఈ సమస్యకు శాశ్వత పరిష్కారమని లేఖలో పేర్కొన్నారు. "వెనిజులాలో మదురోను పట్టుకున్నట్లే, సలావుద్దీన్‌ను పట్టుకుని భారత న్యాయస్థానం ముందు నిలబెట్టాలి. ఇది కోట్లాది మంది శరణార్థుల చిరకాల స్వప్నం" అని రాజీవ్ చుని ఈ సందర్భంగా వ్యాఖ్యానించారు. ప్రస్తుతం సరిహద్దుల్లో ఉద్రిక్తతలు, అంతర్జాతీయ రాజకీయ సమీకరణలు వేగంగా మారుతున్న తరుణంలో, పీఓకే శరణార్థుల నుండి వచ్చిన ఈ విజ్ఞప్తి ప్రాధాన్యత సంతరించుకుంది. ప్రభుత్వం ఈ లేఖపై ఎలా స్పందిస్తుందోనని దేశవ్యాప్తంగా ఆసక్తి నెలకొంది.