రైళ్లో టికెట్ లేకుండా ప్రయాణించేవారికి షాక్.. రైల్వేశాఖ కీలక నిర్ణయం

భారత రైల్వేశాఖ కీలక నిర్ణయం తీసుకుంది. త్వరలో రానున్న పండగల సీజన్‌ను దృష్టిలో ఉంచుకొని టికెట్‌ లేని ప్రయాణికులకు చెక్‌ పెట్టేందుకు ప్రత్యేకంగా తనిఖీలు చేసేందుకు సిద్ధమైంది. ఇందులో భాగంగా.. అక్టోబర్ 1 నుంచి 15 వరకు, అలాగే అక్టోబర్ 25 నుంచి నవంబర్‌ 10 వరకు టికెట్‌ లేకుండా ప్రయాణించేవారిని కట్టడి చేసేందుకు ప్రత్యేక డ్రైవ్ ప్రారంభించనుంది. ఈ మేరకు 17 జోన్లలో ఉన్న జనరల్‌ మేనేజర్‌లకు రైల్వేశాఖ లేఖ రాసింది. తనిఖీల నివేదికలను కూడా నవంబర్‌ 18 నాటికి పంపించాలని కోరింది. 

Also Read: వామ్మో.. రైల్లోనే ప్రత్యక్షమైన పాము.. వీడియో వైరల్

అయితే టికెట్‌ లేకుండా ప్రయాణించే వారిలో పోలీసులే ఎక్కువగా ఉన్నారని రైల్వే కమర్షియల్ అధికారులు పేర్కొన్నారు. ఇటీవల గాజియాబాద్‌ - కాన్పుర్‌ సెక్షన్‌లో తనిఖీలు నిర్వహించగా.. పలు రైళ్లలో ఏసీ కోచ్‌లలో వందలాది మంది పోలీసులు టికెట్‌ లేకుండా ప్రయాణిస్తున్నట్లు గుర్తించామని పేర్కొన్నారు. వాళ్లందరికీ కూడా జరిమానా విధించినట్లు చెప్పారు. ఆర్టీఐ వివరాల ప్రకారం చూసుకుంటే.. 2023-24 ఆర్థిక సంవత్సరంలో 3.61 కోట్ల మంది టికెట్ ఉల్లంఘనదారులు పట్టబడ్డారు. వాళ్ల నుంచి జరిమానా రూపంలో భారత రైల్వేశాఖ రూ.2,231 కోట్లు వసూలు చేసింది.