పాత కాగితాలు అమ్మకంతో.. కేంద్రానికి రూ.800 కోట్లు

దేశవ్యాప్తంగా నిర్వహించిన 'స్వచ్ఛతా డ్రైవ్' ద్వారా కేంద్ర ప్రభుత్వానికి భారీ మొత్తంలో ఆదాయం సమకూరింది. ముఖ్యంగా పాత ఫైళ్లు, ఇతర స్క్రాప్‌ (పాత సామాగ్రి) అమ్మకం ద్వారా కేంద్రం ఏకంగా రూ. 800 కోట్ల వరకు ఆర్జించినట్లు కేంద్ర వర్గాలు తెలిపాయి. ప్రధాని మోడీ నేతృత్వంలోని కేంద్ర ప్రభుత్వం 2014లో అధికారంలోకి వచ్చిన తర్వాత 'స్వచ్ఛ భారత్ అభియాన్'లో భాగంగా ఈ ప్రత్యేక శుభ్రపరిచే కార్యక్రమాలను నిర్వహిస్తోంది. ఈ డ్రైవ్‌లో కేవలం దేశాన్ని పరిశుభ్రంగా ఉంచడమే కాకుండా, కార్యాలయాల్లో పేరుకుపోయిన పాత సామాగ్రి, ఫైళ్లను తొలగించడం ద్వారా ఆర్థిక ప్రయోజనం కూడా పొందుతోంది.

ఇటీవల నెలలో జరిగిన డ్రైవ్ ద్వారా సుమారు రూ. 800 కోట్లు ఆదాయం లభించింది. ఈ మొత్తం (రూ. 800 కోట్లు) చంద్రునిపై విజయవంతంగా దిగిన చంద్రయాన్-3 మిషన్ బడ్జెట్ (రూ. 615 కోట్లు) కంటే గణనీయంగా ఎక్కువ కావడం విశేషం. అక్టోబర్ 2 నుంచి 31 వరకు జరిగిన ఈ ప్రత్యేక ప్రచారంలో అత్యధికంగా 232 లక్షల చదరపు అడుగుల కార్యాలయ స్థలాల్లో ఉన్న స్క్రాప్‌ను ఖాళీ చేశారు. అత్యధికంగా 29 లక్షల భౌతిక ఫైళ్లను తొలగించారు లేదా మూసివేశారు. 2021లో వార్షిక ప్రచారం ప్రారంభమైనప్పటి నుండి ఇప్పటివరకు స్క్రాప్ అమ్మకం ద్వారా ప్రభుత్వానికి అందిన మొత్తం ఆదాయం సుమారు రూ. 4,100 కోట్లుకు చేరినట్లు కేంద్ర వర్గాలు వెల్లడించాయి. ఈ ఐదు ప్రచారాలలో 166.95 లక్షల ఫైళ్లను తొలగించారు.

కేవలం కార్యాలయాలను పరిశుభ్రంగా ఉంచుకోవడమే కాకుండా, అనవసరమైన సామాగ్రిని తొలగించడం ద్వారా పారదర్శకత, సామర్థ్యాన్ని పెంచడంతో పాటు కేంద్ర ప్రభుత్వం ఈ విధంగా భారీ ఆదాయాన్ని కూడా సంపాదిస్తోంది. ఈ డ్రైవ్ దేశంలోని వివిధ కేంద్ర ప్రభుత్వ కార్యాలయాల్లో విస్తృతంగా జరిగింది.