Maoists Surrender : మావోయిస్టు పార్టీకి మరో షాక్‌.. 37 మంది లొంగుబాటు

Maoists Surrender : ఛత్తీస్‌గఢ్ రాష్ట్రంలో మావోయిస్టు పార్టీకి మరోసారి షాక్‌ తగిలింది. దక్షిణ బస్తార్ ప్రాంతానికి చెందిన 37 మంది మావోయిస్టులు పోలీసు అధికారుల ముందు లొంగిపోయారు. దంతేవాడ జిల్లా ఎస్పీ గౌరవ్ రాయ్ సమక్షంలో వీరంతా లొంగిపోయారు. లొంగిపోయిన మావోయిస్టులలో 27 మంది క్రియాశీల మావోయిస్టులు ఉండటం విశేషం. వీరిలో పలువురిపై రివార్డులు ఉన్నాయి. మొత్తంగా 65 లక్షల రూపాయల రివార్డులు ఉన్నట్లు పోలీసులు తెలిపారు. అలాగే మరో 10 మంది మిలీషియా సభ్యులు కూడా ఆయుధాలు వదిలి ప్రభుత్వ విధానాలకు మద్దతు తెలుపుతూ లొంగిపోయినట్లు తెలిపారు.

ఛత్తీస్‌గఢ్‌లోని దంతేవాడ జిల్లాకు ఈ 37 మంది మావోయిస్టులు జనజీవన స్రవంతిలోకి వచ్చారని జిల్లా ఎస్పీ గౌరవ్ రాయ్ తెలిపారు. లొంగిపోయిన మావోయిస్టుల్లో  12 మంది మహిళలు ఉన్నారు. లొంగిపోయిన మావోయిస్టులకు ప్రభుత్వ పాలసీ ప్రకారం తక్షణ సాయం కింద రూ.50 వేలు చొప్పున నగదు సాయం అందించనున్నారు.

దక్షిణ బస్తార్‌లో మావోయిస్టుల ప్రాబల్యం గత కొంతకాలంగా తగ్గుముఖం పడుతుందని ఎస్పీ తెలిపారు. ఈ భారీ లొంగుబాటు ఆ ప్రక్రియ దానికి మరింత వేగం తీసుకొచ్చిందని అధికారులు పేర్కొన్నారు. లొంగిపోయిన మిలీషియా సభ్యులు గతంలో పలు కీలక సంఘటనల్లో చురుకుగా పాల్గొన్నట్లు పోలీసులు వెల్లడించారు. వీరు గోంపడ్, జంగంపాల్, గుడ్రూమ్ పరిసర ప్రాంతాల్లో మావోయిస్టల కార్యకలాపాల్లో పాల్గొంటూ భద్రతాబలగాల కదలికలను గమనించడం, 2019, 2020ల్లో పోలీసులు, భద్రతా బలగాలపై దాడులు, కాల్పులు, అలాగే IEDలు అమర్చడం వంటి ఘటనల్లో వీరికి ప్రమేయం ఉన్నట్లు విచారణలో తేలిందని వివరించారు.

మావోయిస్టు కార్యకలాపాలు తగ్గించడానికి ప్రభుత్వం చేపట్టిన అభివృద్ధి- ప్రేరేపిత కార్యక్రమాల ప్రభావంతో పాటు, పోలీసుల నిరంతర ఆపరేషన్లు కూడా ఈ లొంగుబాట్లకు కారణమని పోలీస్‌ అధికారులు చెబుతున్నారు. దక్షిణ బస్తార్‌లో శాంతి స్థాపనకు ఈ లొంగుబాటు ఒక పెద్ద అడుగుగా భావిస్తున్నమన్నారు. భవిష్యత్తులో మరిన్ని లొంగుబాట్ల ద్వారా మావోయిస్టులు ప్రధాన స్రవంతిలోకి వస్తారని భద్రతా బలగాలు ఆశాభావం వ్యక్తం చేస్తున్నాయి.