Lunar eclipse: తెగిపోయిన తల, మొండెంతో చంద్ర గ్రహణానికి ఉన్న సంబంధం ఇదే!

సాధారణంగా ప్రతి సంవత్సరం రెండు నుంచి నాలుగు చంద్రగ్రహణాలు ఏర్పడతాయి. అందులో కొన్ని మాత్రమే బ్లడ్ మూన్‌లుగా కనిపిస్తాయి. బ్లడ్ మూన్ అనేది ఓ అద్భుతమైన ఖగోళ సంఘటన. ఈ గ్రహణం సమయంలో చంద్రుడు పూర్తిగా ఎర్రటి రంగులోకి మారి "బ్లడ్ మూన్"గా కనిపించనున్నాడు. ఈ అద్భుత దృశ్యాన్ని నేరుగా కళ్లతో చూడటం సురక్షితమే. సూర్యగ్రహణంలా కాకుండా, దీనికి ఎలాంటి ప్రత్యేక కళ్లద్దాలు అవసరం లేదు. టెలిస్కోప్ లేదా బైనాక్యులర్‌ల ద్వారా చూస్తే మరింత స్పష్టంగా, అందంగా కనిపిస్తుంది. ఈ చంద్రగ్రహణం గురించి హిందూపురాణాలు ఏం చెబుతున్నాయో ఇప్పుడు మనం చూద్ధాం..

చంద్రగ్రహణం.. బ్లడ్ మూన్

ఇండియన్ టై ప్రకారం.. ఈ చంద్రగ్రహణం సెప్టెంబర్ 7న రాత్రి 9:58 గంటలకు ప్రారంభమై, సెప్టెంబర్ 8 తెల్లవారుజామున 1:26 గంటల వరకు కొనసాగనుంది. ఈ సంపూర్ణ చంద్ర గ్రహణం సుమారు 82 నిమిషాల పాటు ఉంటుంది. ఈ సమయంలో చంద్రుడు ఎర్రటి కాంతితో ప్రకాశిస్తాడు. 

సూతక కాలం..
ఖగోళ శాస్త్రం ప్రకారం ఇది ఒక సహజ ప్రక్రియ అయినప్పటికీ, భారతీయ జ్యోతిష్యం ప్రకారం చంద్రగ్రహణానికి సూతక కాలం వర్తిస్తుంది. ఈ గ్రహణం భారతదేశంలో కనిపిస్తుంది కాబట్టి, సూతక కాలం ఆదివారం మధ్యాహ్నం 12:57 గంటలకు ప్రారంభమై గ్రహణం ముగిసే వరకు కొనసాగుతుంది. ఈ సమయంలో ఆహారం తీసుకోవడం, దేవాలయాల దర్శనం, శుభకార్యాలు వంటివి చేయకూడదని పండితులు సూచిస్తున్నారు. గ్రహణం ముగిసిన తర్వాత స్నానం చేసి, దైవారాధన చేయడం మంచిదని చెబుతున్నారు.

బ్లడ్ మూన్‌లో సైన్స్:
సాధారణంగా చంద్రగ్రహణం, సూర్యుడు, భూమి, చంద్రుడు ఒకే సరళరేఖపైకి వచ్చినప్పుడు సంభవిస్తుంది. ఈ సమయంలో, భూమి నీడ చంద్రుడిపై పడుతుంది. దీనివల్ల సూర్యకాంతి నేరుగా చంద్రుడి ఉపరితలాన్ని చేరదు. సూర్యకాంతి భూమి వాతావరణం గుండా వెళుతున్నప్పుడు, అది వక్రీభవనం చెందుతుంది. ఈ ప్రక్రియలో సూర్యకాంతిలో ఉండే తక్కువ తరంగదైర్ఘ్యం కలిగిన బ్లూ, వైలెట్ రంగులు ఎక్కువగా చెల్లాచెదురుగా పోతాయి.

కానీ, పొడవైన తరంగదైర్ఘ్యం కలిగిన ఎరుపు, ఆరెంజ్ రంగులు మాత్రం భూమి వాతావరణం గుండా ప్రయాణించి, వంగి, చంద్రుడి ఉపరితలాన్ని చేరుతాయి. ఈ కారణం వల్ల, భూమి నీడలో ఉన్నప్పటికీ, చంద్రుడు పూర్తిగా చీకటిగా కనిపించకుండా, ఎర్రటి కాంతితో మెరుస్తూ కనిపిస్తాడు. ఈ అరుదైన దృశ్యాన్నే "బ్లడ్ మూన్" అని పిలుస్తారు. సూర్యోదయం లేదా సూర్యాస్తమయం సమయంలో ఆకాశం ఎర్రగా కనిపించడానికి కూడా ఇదే కారణం.

భారతీయ పురాణాలలో:
చంద్రుడి ఎరుపు రంగులోకి మారే ఈ అద్భుత దృశ్యం గురించి ప్రాచీన కాలం నుండి అనేక కథలు, పురాణాలు ప్రచారంలో ఉన్నాయి. ఒక్కో సంస్కృతిలో బ్లడ్ మూన్‌ను ఒక్కో విధంగా అర్థం చేసుకున్నారు.

భారతీయ పురాణాల ప్రకారం, చంద్రగ్రహణం అనేది రాహువు, కేతువుల కథగా చెప్పుకుంటారు. అమృతం కోసం దేవతలు, రాక్షసుల మధ్య జరిగిన యుద్ధంలో, మోహిని రూపంలో ఉన్న విష్ణువు దేవతలకు అమృతాన్ని పంచుతాడు. అయితే, రాక్షసుడైన స్వర్భానువు దేవతల రూపంలో వచ్చి అమృతాన్ని తాగుతాడు. ఇది గమనించిన సూర్యచంద్రులు విష్ణువుకు విషయం చెబుతారు. విష్ణువు తన సుదర్శన చక్రంతో స్వర్భానువు తలను నరుకుతాడు. అప్పటికే అమృతం తాగడం వల్ల స్వర్భానువు తల, మొండెం వేరైనా బతికి ఉంటాయి. తల భాగం రాహువుగా, మొండెం భాగం కేతువుగా పిలువబడ్డాయి. ఈ కోపంతో, రాహు, కేతువులు సూర్యచంద్రులను మింగడానికి ప్రయత్నిస్తారని, దానివల్ల గ్రహణాలు సంభవిస్తాయని పురాణాలు చెబుతాయి. బ్లడ్ మూన్ కూడా ఈ గ్రహణంలో ఒక భాగం కాబట్టి, దానిని ఒక చెడు శకునంగా భావిస్తారు.

ఇతర సంస్కృతులలో:

మెసోఅమెరికా సంస్కృతులు: ఆ ప్రాంతంలోని కొన్ని సంస్కృతులు బ్లడ్ మూన్‌ను దేవుళ్లు భూమిపై కోపంతో ఉన్నారని సంకేతంగా భావించేవారు. ఈ సమయంలో జరిగే సంఘటనలు భవిష్యత్తులో యుద్ధాలు, కరువులు లేదా ఇతర విపత్తులకు సంకేతమని నమ్మేవారు.

క్రైస్తవంలో: బైబిల్‌లోని కొన్ని ప్రవచనాల ప్రకారం, బ్లడ్ మూన్ ప్రళయానికి లేదా అంతానికి సంకేతంగా భావించబడుతుంది. కొన్ని చోట్ల ఇది ఒక చెడు శకునంగా వర్ణించబడింది.

ఈ పురాణాలన్నీ, శాస్త్ర విజ్ఞానం లేని కాలంలో ప్రజలు ప్రకృతిలో జరిగే అసాధారణ సంఘటనలను ఎలా అర్థం చేసుకున్నారో తెలియజేస్తాయి. ప్రస్తుతం, బ్లడ్ మూన్ ఒక సహజమైన ఖగోళ దృగ్విషయం అని మనకు తెలుసు.