S-500 Prometheus: ఇది మన చేతికి వస్తే చైనా, పాకిస్థాన్‌లకు చుక్కలే!

అమెరికా రహస్య యుద్ధ విమానాలను కూడా నేలమట్టం చేయగలిగే లెటెస్ట్ టెక్నాలజీని రష్యా తయారు చేసింది. రష్యాకు చెందిన అత్యంత శక్తివంతమైన, అధునాతన ఎయిర్ డిఫెన్స్ సిస్టమ్ S-500 ప్రొమేథియస్ అధికారికంగా రంగంలోకి దిగింది. రష్యా రక్షణ మంత్రిత్వ శాఖ వెల్లడించిన సమాచారం ప్రకారం, ఈ క్షిపణి వ్యవస్థకు సంబంధించిన మొదటి రెజిమెంట్‌ను రష్యా రక్షణ దళాలు విజయవంతంగా మోహరించాయి. దీనితో పాటు, ఈ పవర్ ఫుల్ టెక్నాలజీ భారత్‌కు ఎగుమతి చేసే అంశంపై కూడా ఉన్నత స్థాయి చర్చలు ప్రారంభమయ్యాయి.

రష్యా రక్షణ కవచంలో సరికొత్త శక్తి S-500 ప్రొమేథియస్ కేవలం విమానాలను మాత్రమే కాకుండా, అంతరిక్షం నుంచి వచ్చే ముప్పులను కూడా అడ్డుకోగలదు. మాస్కో, రష్యాలోని కీలక పారిశ్రామిక ప్రాంతాలను రక్షించేందుకు మొదటి S-500 రెజిమెంట్‌ను మోహరించారు.

#Russia has offered the joint production of S-500 Prometheus missile system to India. pic.twitter.com/72IOcRhGup

— News IADN (@NewsIADN) May 12, 2025

సామర్థ్యం: ఇది భూమికి 200 కిలోమీటర్ల ఎత్తులో (నియర్ స్పేస్) ప్రయాణించే శత్రు లక్ష్యాలను గుర్తించి నాశనం చేయగలదు. ఐసిబిఎంలు (ICBMs), హైపర్‌సోనిక్ క్షిపణులు, భూమికి దగ్గరగా ఉన్న ఉపగ్రహాలను కూల్చివేయడం దీని ప్రత్యేకత. సెకనుకు 7 కిలోమీటర్ల వేగంతో వచ్చే లక్ష్యాలను కూడా ఇది నాశనం చేస్తుంది.

భారత్‌తో ఎగుమతి చర్చలు

రష్యా అధ్యక్షుడు వ్లాదిమిర్ పుతిన్ ఇటీవలి భారత పర్యటన నేపథ్యంలో, S-500 వ్యవస్థను భారత్‌కు విక్రయించే విషయం ప్రాధాన్యత సంతరించుకుంది. రష్యా తన సొంత అవసరాలు తీరిన తర్వాత, ఈ అత్యాధునిక వ్యవస్థను పొందే తొలి విదేశీ భాగస్వామి భారత్ అయ్యే అవకాశం ఉంది. ఇప్పటికే S-400 (సుదర్శన చక్ర) ఒప్పందంతో ఇరు దేశాల మధ్య రక్షణ బంధం బలపడింది. S-500 క్షిపణులను కేవలం కొనుగోలు చేయడమే కాకుండా, వాటి విడిభాగాలను భారత్‌లోనే తయారు చేసే దిశగా చర్చలు జరుగుతున్నాయి.ప్రస్తుతానికి ఈ సాంకేతికత చైనా వద్ద కూడా లేదు. ఒకవేళ భారత్ దీనిని సాధిస్తే, సరిహద్దుల్లో వ్యూహాత్మక ఆధిపత్యం భారత్ సొంతమవుతుంది.

వ్యూహాత్మక ప్రాముఖ్యత
ఆపరేషన్ సిందూర్ సమయంలో S-400 చూపిన ప్రతిభను దృష్టిలో ఉంచుకుని, ఇండియన్ ఎయిర్ ఫోర్స్ S-500పై అమితాసక్తి చూపుతోంది. ఇది అందుబాటులోకి వస్తే పాకిస్తాన్, చైనాల నుంచి ఎదురయ్యే హైపర్‌సోనిక్ క్షిపణుల ముప్పును భారత్ సమర్థవంతంగా తిప్పికొట్టగలదు. అయితే, ఈ ఒప్పందం కార్యరూపం దాల్చడానికి మరికొంత సమయం పట్టే అవకాశం ఉంది. రష్యా ప్రస్తుతం తన సొంత రక్షణ అవసరాలకు ప్రాధాన్యత ఇస్తుండటంతో, 2030 నాటికి ఈ వ్యవస్థలు భారత్‌కు వచ్చే అవకాశం ఉందని రక్షణ రంగ నిపుణులు భావిస్తున్నారు.