ఇన్‌‌స్టాగ్రామ్ బయో మార్చుకొని.. సూసైడ్ చేసుకున్న బాలుడు

మహారాష్ట్రలోని సోలాపూర్ జిల్లాలో చోటుచేసుకున్న ఓ హృదయవిదారక ఘటన స్థానికంగా కలకలం సృష్టించింది. 18 సంవత్సరాల యువకుడు తన ఇన్‌స్టాగ్రామ్ బయోను "End Is Beginning" (అంతం ఆరంభం) అంటూ మార్చి ఆత్మహత్యకు పాల్పడ్డాడు. పోలీసులు తెలిపిన వివరాల ప్రకారం, సోలాపూర్‌కు చెందిన ఈ యువకుడు ఆత్మహత్య చేసుకునే ముందు తన ఇన్‌స్టాగ్రామ్ అకౌంట్‌లో ఈ మెస్సేజ్ పెట్టడం గమనార్హం. అతను ఆత్మహత్య చేసుకోడానికి గల కారణాలు ఇంకా స్పష్టంగా తెలియరాలేదు. కేసు నమోదు చేసుకున్న పోలీసులు లోతుగా దర్యాప్తు చేస్తున్నారు.

యువత ఆత్మహత్య చేసుకునే ముందు సోషల్ మీడియా వేదికగా ఏదో ఒక సంకేతాన్ని ఇవ్వడం ఇటీవల తరచుగా కనిపిస్తోంది. ఈ ఘటనలో కూడా ఆ యువకుడు తన ప్రొఫైల్‌లో "అంతం ఆరంభం" అని మార్చడం, అతను మానసికంగా ఎంత ఒత్తిడిలో ఉన్నాడో తెలియజేస్తోంది. ఈ సందేశం అతని స్నేహితులు లేదా కుటుంబ సభ్యులలో ఎవరికైనా కనిపించి ఉంటే, అప్రమత్తమై ఉండేవారేమోనని స్థానికులు వ్యాఖ్యానిస్తున్నారు. పోలీసులు అతని ఫోన్‌ను స్వాధీనం చేసుకుని, అతను ఎవరితోనైనా సమస్యలను పంచుకున్నాడా? లేదా చదువు, ప్రేమ, ఇతర ఒత్తిళ్ల కారణంగా ఈ నిర్ణయం తీసుకున్నాడా? అనే కోణంలో పరిశీలిస్తున్నారు. సంఘటనా స్థలంలో సూసైడ్ నోట్ ఏమైనా లభించిందా లేదా అనే వివరాలను అధికారులు ఇంకా వెల్లడించలేదు.