Girl Suicide: ‘నా జీవితం నాకు అసహ్యంగా మారింది’.. 6 రోజులుగా మిస్సింగ్.. చివరికి..

గత ఆరు రోజులుగా అదృశ్యమైన త్రిపురకు చెందిన ఢిల్లీ యూనివర్సిటీ విద్యార్థిని స్నేహా దేబ్‌నాథ్ (19) మృతదేహం ఆదివారం యమునా నదిలో లభ్యమైంది. తూర్పు ఢిల్లీలోని గీతా కాలనీ ఫ్లైఓవర్ సమీపంలో ఆమె మృతదేహాన్ని పోలీసులు గుర్తించారు. స్నేహా అదృశ్యం వెనుక ఉన్న మిస్టరీ ఆమె మృతితో విషాదకరంగా ముగిసింది. 

Delhi University student Sneha Debnath

ఢిల్లీలోని ఆత్మా రామ్ సనాతన ధర్మ కళాశాలలో బీఎస్సీ చదువుతున్న స్నేహా దేబ్‌నాథ్ జూలై 7న తన హాస్టల్ నుండి బయటకు వెళ్లి తిరిగి రాలేదు. ఆ రోజు ఉదయం 5:56 గంటలకు తన కుటుంబ సభ్యులతో చివరిసారిగా ఫోన్‌లో మాట్లాడింది. తన స్నేహితురాలిని రైల్వే స్టేషన్ వద్ద దించి వస్తానని చెప్పి వెళ్లింది. అయితే ఆమె స్నేహితురాలిని కలవలేదని, ఆ తర్వాత స్నేహా ఫోన్ స్విచ్ఛాఫ్ అయిందని పోలీసులు తెలిపారు.

స్నేహా కనిపించకపోవడంతో ఆమె కుటుంబ సభ్యులు మెహ్రౌలీ పోలీస్ స్టేషన్‌లో ఫిర్యాదు చేశారు. పోలీసులు కిడ్నాప్ కేసు నమోదు చేసి గాలింపు చర్యలు చేపట్టారు. ఎన్‌డిఆర్‌ఎఫ్ బృందాలతో కలిసి యమునా నదిలో విస్తృతంగా గాలించారు. ఈ క్రమంలో ఆదివారం ఆమె మృతదేహం యమునా నదిలో లభ్యమైంది.

మృతదేహంతో పాటు, స్నేహా హాస్టల్ గదిలో ఒక ఆత్మహత్య లేఖ లభ్యమైంది. ఆ లేఖలో "నేను ఒక పరాజితరాలిగా, భారంలా భావిస్తున్నాను. ఇలా జీవించడం నాకు అసహ్యంగా మారింది. ఇది నా నిర్ణయం, ఇతరుల ప్రమేయం లేదు" అని రాసి ఉందని పోలీసులు తెలిపారు. సిగ్నేచర్ బ్రిడ్జి నుంచి దూకి ఆత్మహత్య చేసుకునే ఉద్దేశాన్ని ఆమె లేఖలో వ్యక్తం చేసింది.

అయితే, స్నేహా సోదరి ఈ లేఖపై అనుమానం వ్యక్తం చేస్తూ, పూర్తి వివరాలు లేకుండా నోట్ ఉందని పేర్కొంది. సిగ్నేచర్ బ్రిడ్జి వద్ద సీసీటీవీ కెమెరాలు పనిచేయకపోవడంపై కూడా కుటుంబ సభ్యులు ఆందోళన వ్యక్తం చేశారు. గత కొన్ని నెలలుగా స్నేహా మానసికంగా కలత చెంది ఉందని ఆమె స్నేహితులు పోలీసులకు తెలిపారు.

త్రిపుర ముఖ్యమంత్రి మాణిక్ సాహా కూడా స్నేహా అదృశ్యంపై ఆందోళన వ్యక్తం చేస్తూ, ఆమెను కనుగొనడానికి తక్షణ చర్యలు తీసుకోవాలని ఢిల్లీ పోలీసులను కోరారు. ప్రస్తుతం ఈ ఘటనపై ఢిల్లీ పోలీసులు అన్ని కోణాల్లో దర్యాప్తు చేస్తున్నారు. మృతదేహాన్ని పోస్టుమార్టం నిమిత్తం ఆసుపత్రికి తరలించారు.