2024లో బరాక్ ఒబామా ఫస్ట్ ఫేవరేట్ గా ఇండియన్ సినిమా! ఏంటో తెలుసా?

Barack Obama : అమెరికా మాజీ అధ్యక్షుడు బరాక్‌ ఒబామా 2024లో తన ప్రియమైన సినిమాలు, పుస్తకాలు, మ్యూజిక్ ఆల్బమ్స్ జాబితాను ఎక్స్ వేదికగా పోస్ట్ పెట్టారు. ఈ జాబితాలో భారతీయ చిత్రం  'ఆల్ వీ ఇమాజిన్ యాజ్‌ లైట్' ('All We Imagine As Light') మొదటి స్థానంలో ఉంది. ఈ చిత్రాన్ని భారతీయ దర్శకురాలు పాయల్‌ కపాడియా తెరకెక్కించారు. బరాక్ ఒబామా ఇండియన్ సినిమా గురించి మాట్లాడడం  అందరి దృష్టిని ఆకర్షిస్తోంది.  ఒబామా సోషల్ మీడియాలో ఈ పోస్ట్ చేసిన వెంటనే విపరీతమైన స్పందన వచ్చింది. 'All We Imagine As Light' అభినందించడం సంతోషంగా ఉందని కామెంట్లు చేస్తున్నారు. 

'ఆల్‌ వీ ఇమేజిన్‌ యాజ్‌ లైట్‌' చిత్రం ప్రపంచవ్యాప్తంగా గుర్తింపు తెచ్చుకుంది. ముంబై నర్సింగ్ హోమ్ పనిచేసే కేరళకు చెందిన  ఇద్దరు అమ్మాయిల చుట్టూ ఈ కథ ఉంటుంది. ఈ చిత్రాన్ని కేన్స్ ఫిల్మ్ ఫెస్టివల్ లో ప్రదర్శించగా  'గ్రాండ్‌ పిక్స్‌' అవార్డు గెలుచుకుంది. 30 ఏళ్ళ తర్వాత మళ్ళీ భారతీయ చిత్రానికి ఈ అవార్డు దక్కింది.  82వ గోల్డెన్ గ్లోబ్స్ అవార్డులకు కూడా సినిమా ఎంపికైంది. ఈ మూవీలో కనికుశ్రుతి, దివ్య ప్రభ, చాయాకదం ప్రధాన పాత్రలు పోషించారు.