అంగరంగ వైభవంగా సాగిన ఊరేగింపు

వార్షిక బ్రహ్మోత్సవాల్లో భాగంగా నిన్న స్వామివారు కోదండరాముని అలంకరణలో హనుమద్వాహనంపై భక్తులకు దర్శనమిచ్చారు. ఈ వాహనంపై మేళతాళాలతో అంగరంగ వైభవంగా సాగిన ఊరేగింపులో స్వామివారిని చూసి భక్తులు భక్తిపారవశ్యంతో తన్మయులయ్యారు. ధర్మసంస్థాపన కోసం రావణ సంహారం చేసిన రామచంద్రమూర్తిగా దర్శనమిచ్చిన.. ఏడు శనివారాల వేంకటేశ్వరస్వామికి హనుమ స్వయంగా వాహనమయ్యారు. ఈ వాహన సేవను దర్శిస్తే బుద్ధి, కీర్తితో పాటు భూతప్రేత పిశాచాలు దరి చేరవు. సంపూర్ణ ఆయురారోగ్యాలుగా ఉంటారని భక్తులు విశ్వసిస్తారు.

భక్తులను అలరించిన సాంస్కృతిక కార్యక్రమాలు 

ఉభయ దేవేరులతో కొలువుదీరిన స్వామివారికి శనివార ఉదయం మహాపుష్పయాగం ఘనంగా నిర్వహించారు. దీనికి రావులపాలెం మండలం ఊబలంకకు చెందిన ప్రముఖ పారిశ్రామికవేత్త మేడపాటి శ్రీనివాసరెడ్డి, శ్రీదేవి దంపతులు వివిధ రకాల సుగంధభరిత పుష్పాలు, పండ్లు, పట్టువస్త్రాలు స్వామివారికి సమర్పించారు. మహాపుష్పయాగం పూజా కార్యక్రమంలో వారు పాల్గొన్నారు. ఉత్సవాల సందర్భంగా ఏర్పాటు చేసిన కోలాటం తదితర సాంస్కృతిక కార్యక్రమాలు భక్తులను ఎంతగానో అలరించాయి. హనుమద్‌ వేషధారణ ఏర్పాటు చేసిన ప్రాంతంలో పలువురు భక్తులు సెల్ఫీలు తీసుకున్నారు. ఏర్పాట్లను ఆలయ కమిటీ చైర్మ న్‌ రుద్రరాజు రమేష్‌రాజు, ఈవో ముదునూరి సత్యనారాయణరాజు ఆధ్వర్యంలో ఆలయ కమిటీ సభ్యులు, సిబ్బంది పర్యవేక్షించారు.

ఇది కూడా చదవండి: కాళేశ్వరం ప్రాజెక్ట్ కాదు.. కాంట్రాక్టర్ల ప్రాజెక్ట్‌: కోదండరామ్