Hyderabad : రెండో రోజు కొనసాగుతున్న గణనాథుని నిమజ్జనాలు

నిమజ్జనం పూర్తి కావడానికి సాయంత్రం వరకు సమయం పట్టే అవకాశాలు కనిపిస్తున్నాయి. రాత్రి ఒంటిగంటకు చార్మినార్‌లో వినాయక నిమజ్జన శోభయాత్ర ముగిసింది. పాతబస్తీలో ఎటువంటి అవాంఛనీయ సంఘటనలు జరగకుండా శోభయాత్ర ప్రశాంతంగా జరిగింది.ఇప్పటి వరకు గ్రేటర్‌ హైదరాబాద్‌ పరిధిలో 1,02,500 విగ్రహాలను నిమజ్జనం చేసినట్టు జీహెచ్‌ఎంసీ అధికారులు తెలిపారు. అత్యధికంగా మూసాపేట ఐడియల్ చెరువులో 26,546 విగ్రహాలు , ట్యాంక్ బండ్ ఎన్టీఆర్ మార్గ్‌ వద్ద 4,730 విగ్రహాలు , నెక్లెస్ రోడ్ 2,360 విగ్రహాలు , పీపుల్స్ ప్లాజా వద్ద 5230 విగ్రహాలు , హైదరాబాద్ (Hyderabad) అల్వాల్ కొత్తచెరువులో 6,221 వినాయక విగ్రహాలను నిమజ్జనం చేసినట్టు అధికారులు తెలిపారు.

గ్రేటర్ సిటీ మొత్తంలో 71 ప్రాంతాల్లో నిమజ్జన కార్యక్రమం కొనసాగుతోందని అధికారులు తెలిపారు. బుధవారం సాయంత్రానికి నిమజ్జనం పూర్తవుతుందని అధికారులు అంచనా వేస్తున్నారు.