Panchayat Elections : పోయినసారి ఒక్క ఓటుతో ఓటమి.. ఈసారి.. ఒక్కరూపాయి బిల్లలతో నామినేషన్‌

Panchayat Elections : ఆ యువకుడు వార్డు మెంబర్‌గా గెలిచి ఆ ఊరికి తన వంతు సేవ చేయాలనుకున్నాడు. అన్నట్లుగానే పోటీ చేశాడు.. కానీ దురదృష్టవశాత్తు ఓడిపోయాడు. అది కూడా కేవలం ఒక్క ఓటుతో.. ఆ ఓటమి అతన్ని వెంటాడింది. అందుకే ఈసారి ఎన్నికల్లో మళ్లీ ఎలాగైనా గెలవాలని నిర్ణయించుకున్నాడు. డిపాజిట్ కోసం ఒక్కో రూపాయి జమ చేసుకున్నాడు. అలా రెండు డబ్బాల నిండా ఒక్క రూపాయి బిల్లలతోనే ఈసారి పంచాయతీ ఎన్నికల్లో నామినేషన్ వేశాడు. ఇలా వార్డ్ మెంబర్‌గా ఓడిపోయిన ఆ యువకుడు ఇప్పుడు సర్పంచ్‌గా నామినేషన్‌ వేశాడు. ఆ యువకుడి పొలిటికల్ స్టోరీ.. ఇప్పుడు అధికారులతో పాటు.. స్థానికులను ఆకట్టుకుంది.

View this post on Instagram

వివరాల్లోకి వెళితే ఇదిగో అయ్యప్ప మాలలో ఉన్న ఈ స్వామి పేరు జంగిలి మహేందర్.. కరీంనగర్ జిల్లా గంగాధర మండలం లక్ష్మీదేవిపల్లికి చెందిన జంగిలి మహేందర్ సర్పంచ్ కోసం నామినేషన్ వేశాడు. అయితే వినూత్నంగా ఉండాలనే ఉద్ధేశంతో పాటు.. చాలాకాలంగా తన గల్లా పెట్టెలో ఒక్కో రూపాయి చొప్పున దాచుకున్న చిల్లర డబ్బులన్నీ జమ చేసి.. వెయ్యి రూపాయల నాణాలతో నామినేషన్ దాఖలు చేశాడు. రూపాయి విలువ అందరికీ తెలియజేయడంతో పాటు.. గత ఎన్నికల్లో కేవలం ఒకే ఒక్క ఓటుతో వార్డ్ మెంబర్ కు పోటీ చేసి తాను ఓటమి పాలవ్వడంతో ఎలాగైనా గెలవాలన్న తపనతో ఒక్క రూపాయి కాయిన్ ను ఎంచుకున్నానని.. జంగిలి మహేందర్ తెలిపాడు.

 ఓటు విలువ రూపాయి బిళ్లల రూపంలో కనిపించేందుకు ఈసారి సర్పంచ్ అభ్యర్థిగా వినూత్నంగా నామినేషన్ వేసినట్లు మహేందర్ వెల్లడించారు. తన నామినేషన్ ప్రజల్లో చైతన్యం కలిగించాలనే ఉద్దేశ్యంతోనే ఈ ప్రత్యేక పద్ధతిని ఎంచుకున్నానని మహేందర్ పేర్కొన్నారు. "ఒక్క ఓటుతో ఓడిపోయిన నా అనుభవం ప్రతి గ్రామస్తుడికి ఓటు విలువను గుర్తుచేస్తుంది. ప్రతి ఓటు ఎంతో విలువైనది" అని ఆయన అన్నారు. మహేందర్ నామినేషన్ వేయడానికి వచ్చిన రూపాయి బిళ్లలను చూసేందుకు స్థానికులు, అభ్యర్థులు, అధికారులు పెద్ద సంఖ్యలో చేరారు. ఈ ఘటన సోషల్ మీడియాలో కూడా వైరల్ అవుతోంది. మొత్తానికి ఈ ఘటన జిల్లాలో చర్చనీయాంశంగా మారింది.