Drunk driving Hyderabad: మందుబాబులకు గుడ్ న్యూస్..కానీ జర ఫైలం..

 Drunk driving Hyderabad:  వచ్చేది న్యూఇయర్‌...కొత్త సంవత్సరం అనగానే మందు, విందు ఎంజాయ్‌ చేద్దామనుకుంటారు. అందుకే తెలంగాణ మందుబాబులకు గుడ్ న్యూస్ చెప్పింది సర్కార్. నూతన సంవత్సర వేడుకల్లో భాగంగా మద్యం విక్రయాలను డిసెంబర్ 31వ తేదీ అర్ధరాత్రి వరకు పొడిగించింది ప్రభుత్వం.  కానీ మద్యం మత్తులో వాహనాలు నడిపితే కఠిన చర్యలు తీసుకుంటామని సీపీ సజ్జనార్ హెచ్చరిస్తున్నారు. న్యూ ఇయర్ వేడుకల నేపథ్యంలో నగర వాసులకు పలు హెచ్చిరికలు జారీ చేశారు. డ్రంక్ అండ్ డ్రైవ్‌లో పట్టుబడితే వాహనాలను సీజ్ చేయడమే కాకుండా, పది వేల రూపాయల జరిమానా, ఆరు నెలల జైలు శిక్ష కూడా ఎదుర్కోవాల్సి ఉంటుందని ఆయన స్పష్టం చేశారు.

నూతన సంవత్సర వేడుకల నేపథ్యంలో ఇప్పటికే హైదరాబాద్ ట్రాఫిక్ పోలీసులు ప్రత్యేక తనిఖీలు ప్రారంభించారు. హైదరాబాద్ కమిషనరేట్ పరిధిలో ప్రత్యేకంగా డ్రంక్ అండ్ డ్రైవ్ తనిఖీలు చేస్తున్నారు. బుధవారం ప్రారంభమైన ఈ తనిఖీలు డిసెంబర్ 31వ తేదీ వరకు కొనసాగుతాయని వెల్లడించారు. నగరంలో 120 ప్రాంతాల్లో ముమ్మరంగా తనిఖీలు ఉంటాయని హైదరాబాద్ కమిషనర్ సజ్జనార్ స్పష్టం చేశారు.  

కాగా సజ్జనార్‌ చెప్పినట్లే తొలిరోజే  డ్రంక్ అండ్ డ్రైవ్‌ పరీక్షలో 304 మంది పట్టుబడ్డారు. నిబంధనలు ఉల్లంఘించి 304 మంది  మద్యం సేవించి వాహనాలు నడుపుతుండగా వారిని అదుపులోకి తీసుకుని వాహనాలను స్వాధీనం చేసుకున్నారు. మద్యం మత్తులో వాహనాలు నడిపితే కఠిన చర్యలు తీసుకుంటామని మరోసారి సీపీ సజ్జనార్ హెచ్చరించారు. 

న్యూ ఇయర్ సెలబ్రేషన్స్ కోసం పబ్‌లకు వెళ్లే వారు తమ డ్రైవర్లను వెంట తీసుకెళ్లాలని కమిషనర్ సూచించారు. లేదంటే క్యాబ్ బుక్ చేసుకుని ప్రయాణించాలని సూచించారు. సామాన్య ప్రజలకు ఇబ్బంది కలగకుండా సెలబ్రేషన్స్ చేసుకోవాలని పేర్కొన్నారు. నిబంధనలను అతిక్రమిస్తే చట్టపరమైన చర్యలను ఎదుర్కోవాల్సి ఉంటుందని హెచ్చరించారు.