Sindhu In Olympics : ప్రీ క్వార్టర్ ఫైనల్స్ లో పీవీ సింధు.. మెడల్ వైపు మరో అడుగు!

Paris Olympics 2024 : పారిస్ ఒలింపిక్స్ బ్యాడ్మింటన్ (Badminton) మ్యాచ్‌లో భారత క్రీడాకారిణి పీవీ సింధు (PV Sindhu) అద్భుత విజయం సాధించింది . మహిళల సింగిల్స్ విభాగంలో జరిగిన ఈ మ్యాచ్‌లో భారత బ్యాడ్మింటన్ స్టార్ ఎస్టోనియా క్రీడాకారిణి క్రిస్టిన్ కూబా మనిసిని ఓడించి తదుపరి స్థాయికి దూసుకెళ్లింది. ఆరంభం నుంచి చక్కటి నియంత్రణను ప్రదర్శించిన సింధు.. తొలి సెట్ లోనే ప్రత్యర్థిని ఒత్తిడిలోకి నెట్టడంలో సఫలమైంది. దీంతో ఆమె ఏకపక్షంగా  21-9 పాయింట్ల తేడాతో మొదటి సెట్‌ను గెలుచుకుంది. 

Sindhu In Olympics : రెండో సెట్ ప్రారంభంలో క్రిస్టీన్ కూబా వైపు నుంచి మంచి పోటీ కనిపించింది. కానీ అనుభవజ్ఞురాలైన పివి సింధు కాస్త తెలివిగా ఆడటంతో ఆరంభంలో ఆధిక్యం సాధించింది. ఫలితంగా, భారత స్టార్ 6 వరుస పాయింట్లు కొట్టి 15 పాయింట్లు సాధించింది. దీంతో లయ కోల్పోయిన ప్రత్యర్థి క్రిస్టీన్ కూబా వరుస తప్పిదాలు చేసింది. మరోవైపు భారత స్టార్ దూకుడుగా ఆడింది. దీంతో సింధు 21-10 పాయింట్ల తేడాతో రెండో సెట్‌ను కైవసం చేసుకుంది. ఈ విజయంతో పీవీ సింధు ప్రిక్వార్టర్‌ ఫైనల్లోకి ప్రవేశించింది. ఈ ఒలింపిక్స్ లో ఇప్పటివరకూ పీవీ సింధు అద్భుత ఫామ్ కనబరుస్తోంది. అన్ని మ్యాచ్ లలోనూ వరుస సెట్లలో విజయం సాధిస్తూ వస్తోంది. ప్రత్యర్థికి ఏ మాత్రం అవకాశం ఇవ్వడం లేదు. దీంతో కచ్చితంగా పీవీ సింధు మెడల్ సాధిస్తుందనే నమ్మకం అభిమానుల్లో పెరుగుతోంది. 

సింధుపై అంచనాలు:

ఈ ఒలింపిక్స్‌లో పీవీ సింధు నుంచి పతకం ఆశించవచ్చు. ఎందుకంటే గత రెండు ఒలింపిక్స్‌లో భారత కీర్తిని ఆమె చాటి చెప్పింది. 2016లో రియో ​​ఒలింపిక్స్‌లో రజత పతకాన్ని గెలుచుకున్న సింధు టోక్యో ఒలింపిక్స్‌లో కాంస్య పతకాన్ని గెలుచుకుంది. కాబట్టి ఈసారి కూడా పీవీ సింధు నుంచి పతకం ఆశిస్తున్నారు. అందుకు తగ్గట్టుగానే ఆమె ప్రదర్శన కూడా ఉంది. 

పివి సింధు విజయాలు:

• 2013 ప్రపంచ బ్యాడ్మింటన్ ఛాంపియన్‌షిప్‌లు (World Badminton Championships) (గ్వాంగ్‌జౌ, చైనా) - కాంస్యం
• 2014 ప్రపంచ బ్యాడ్మింటన్ ఛాంపియన్‌షిప్స్ (డెన్మార్క్) - కాంస్యం
• 2014 కామన్వెల్త్ గేమ్స్ (స్కాట్లాండ్) - కాంస్యం
• 2014 ఆసియా ఛాంపియన్‌షిప్స్ (దక్షిణ కొరియా) - కాంస్యం
• 2016 రియో ​​ఒలింపిక్స్ 2016 (బ్రెజిల్)- రజతం
• 2017 ప్రపంచ బ్యాడ్మింటన్ ఛాంపియన్‌షిప్స్ (స్కాట్లాండ్) - రజతం
• 2018 ప్రపంచ బ్యాడ్మింటన్ ఛాంపియన్‌షిప్స్ (చైనా) - రజతం
• 2018 కామన్వెల్త్ గేమ్స్ (ఆస్ట్రేలియా) - రజతం
• 2018 ఆసియా క్రీడలు (ఇండోనేషియా) - రజతం
• 2019 ప్రపంచ బ్యాడ్మింటన్ ఛాంపియన్‌షిప్స్ (స్విట్జర్లాండ్) - స్వర్ణం
• 2020 టోక్యో ఒలింపిక్స్ 2020 (జపాన్) - కాంస్యం
• 2022 ఆసియా ఛాంపియన్‌షిప్స్ (ఫిలిప్పీన్స్) - కాంస్యం
• 2022 కామన్వెల్త్ గేమ్స్ (ఇంగ్లండ్) - స్వర్ణం

Also Read : సిగరేట్‌ తాగకపోయినా…లంగ్‌ క్యాన్స్‌ర్‌!