PFI వంటి ఉగ్ర సంస్థల పేరులో కూడా INDIA ఉంది... మోదీ సంచలన వ్యాఖ్యలు..!!

విపక్షాలపై ప్రధాని మోదీ తీవ్ర స్థాయిలో విరుచుకుపడ్డారు. ప్రతిపక్షాల కొత్త పేరు అయిన...ఇండియాపై వ్యంగ్యం వ్యాఖ్యనించారు. ఇండియా అనే పేరు పెట్టుకోవడం వల్ల ఏమీ జరగదని మోదీ అన్నారు. ఇండియన్ ముజాహిదీన్ పేరుతో కూడా దేశాన్ని ప్రస్తావించిన ప్రధాని... పీఎఫ్‌ఐ, ఐఎన్‌సీ పేర్లతో భారత్‌ కూడా ముడిపడి ఉందన్నారు. గతంలో ఇండియా పేరుతో ఈస్టిండియా కంపెనీ ప్రజలను మోసం చేసిందంటూ సంచలన వ్యాఖ్యలు చేశారు.

భారతీయ జనతా పార్టీ పార్లమెంటరీ పార్టీ (బిజెపి పార్లమెంటరీ పార్టీ సమావేశం) సమావేశం మంగళవారం జరిగింది. ఈ సమావేశంలో ప్రధాని మోదీ , రక్షణ మంత్రి రాజ్‌నాథ్ సింగ్, పీయూష్ గోయల్ సహా పలువురు కేంద్ర మంత్రులు , ఎంపీలు పాల్గొన్నారు . ఈ సమావేశంలో ప్రధాని మోదీ ప్రతిపక్ష పార్టీలపై తీవ్ర స్థాయిలో విరుచుకుపడ్డారు.

ఈస్ట్ ఇండియా కంపెనీ, పాపులర్ ఫ్రంట్ ఆఫ్ ఇండియా లాంటి పేర్లను ఉదహరిస్తూ, బీజేపీ పార్లమెంటరీ పార్టీ సమావేశంలో విపక్ష కూటమి 'ఇండియా'పై ప్రధాని మోదీ హేళన చేశారు. ఇండియన్ ముజాహిదీన్ పేరుతో కూడా ఇండియా ఉంది. ఈస్ట్ ఇండియా కంపెనీ తన పేరులో దేశాన్ని కూడా చేర్చుకుందన్నారు.

బీజేపీ పార్లమెంటరీ పార్టీని ఉద్దేశించి ప్రధాని మోదీ మాట్లాడుతూ, ప్రతిపక్షాలు నిరాశాజనకంగా, నిస్సహాయంగా ఉన్నాయని, ప్రతిపక్షంలోనే ఉండాలనే పట్టుదలతో ఉందని దాని ప్రవర్తన తెలియజేస్తోందని అన్నారు. 2024 ఎన్నికల తర్వాత ప్రజల మద్దతుతో బీజేపీ అధికారంలోకి వస్తుందని, తమ ప్రభుత్వం అధికారంలోకి వచ్చే సరికి భారత్ మూడో అతిపెద్ద ఆర్థిక వ్యవస్థగా అవతరిస్తుందని ఆయన విశ్వాసం వ్యక్తం చేశారు. దిక్కులేని ప్రతిపక్షాన్ని ఇప్పటి వరకు చూడలేదని ప్రధాని అన్నారు. ప్రతిపక్షాల తీరు చూస్తుంటే చిరకాలం ప్రతిపక్షంలో ఉండాలని నిర్ణయించుకున్నట్లు తెలుస్తోందని కేంద్ర మంత్రి ప్రహ్లాద్ జోషి అన్నారు.

మన ప్రధానిని చూసి గర్విస్తున్నామని బీజేపీ ఎంపీ రవిశంకర్ ప్రసాద్ అన్నారు. 2024లో మళ్లీ అధికారంలోకి వస్తున్నాం. భారత జాతీయ కాంగ్రెస్, ఈస్టిండియా కంపెనీని విదేశీయులు స్థాపించారని ప్రధాని మోదీ ప్రకటన చేశారని రవిశంకర్ ప్రసాద్ అన్నారు. నేడు ఇండియన్ ముజాహిదీన్, ఇండియన్ పీపుల్స్ ఫ్రంట్ లాంటి పేర్లను వాడుతున్నారని మండిపడ్డారు.

భారతీయ జాతీయ కాంగ్రెస్‌ను విదేశీ జాతీయుడైన ఏఓ హ్యూమ్ స్థాపించారని బీజేపీ ఎంపీ నిషికాంత్ దూబే అన్నారు. ముజాహిదీన్లు తమను తాము ఇండియన్ ముజాహిదీన్ అని పిలుచుకుంటున్నారన్నారు. PFI తనను తాను 'పాపులర్ ఫ్రంట్ ఆఫ్ ఇండియా'గా పిలుచుకుంటుంది. పేరుకు ఇండియా అని చేర్చుకోవడం ఫ్యాషన్‌గా మారింది. వారు (ప్రతిపక్ష పార్టీలు) అర్బన్ నక్సలైట్లు. తమను తాము చట్టబద్ధం చేసుకోవడానికి భారతదేశాన్ని వాడుకుంటున్నారంటూ ఆగ్రహం వ్యక్తం చేశారు.