Pakistan vs Ireland : చివరి మ్యాచ్ లో ఐర్లాండ్ పై అతికష్టంగా గెలిచిన పాకిస్థాన్!

Pakistan vs Ireland Last Match : టీ20 ప్రపంచకప్‌ 2024 (T20 World Cup 2024) లో పాకిస్థాన్ క్రికెట్ జట్టు పరిస్థితి ఎంత దారుణంగా ఉందో ఆఖరి మ్యాచ్‌లోనూ కనిపించింది. ఇప్పటికే అమెరికా, భారత్ లపై ఓడిపోయి.. సూపర్-8 రౌండ్ రేసుకు దూరమైన పాక్ జట్టు.. చివరి మ్యాచ్ లోనూ గెలవడానికి  కష్టపడాల్సి వచ్చింది. చిన్న లక్ష్యాన్ని సాధించేందుకు మరోసారి చెమటోడ్చాల్సి వచ్చింది. ఐర్లాండ్‌పై 107 పరుగుల లక్ష్యం కూడా వారికి పర్వతంలా కనిపించినట్టుంది. అయితే కెప్టెన్ బాబర్ అజామ్ (Babar Azam) జట్టును 3 వికెట్ల తేడాతో విజయతీరాలకు చేర్చాడు.  తద్వారా జట్టును మరో ఇబ్బందికరమైన ఓటమి నుండి కాపాడాడు.

ఆరంభంలోనే షాహీన్-అమీర్‌ల జోరు..

టోర్నమెంట్‌లోని ఇతర మ్యాచ్‌ల మాదిరిగానే, ఈసారి కూడా పాకిస్తాన్ ఫాస్ట్ బౌలర్లు జట్టుకు మంచి ఆరంభాన్ని అందించారు. షాహీన్ షా అఫ్రిది తొలి ఓవర్‌లోనే 2 వికెట్లు తీసి ఐర్లాండ్‌ను కష్టాల్లో పడేసాడు. ఆ తర్వాతి ఓవర్‌లోనే మహ్మద్ అమీర్ (2/11) వికెట్ కూడా తీశాడు. ఆ తర్వాత మూడో ఓవర్లో షాహీన్ (3/22) మరో వికెట్ తీశాడు. ఐర్లాండ్ కేవలం 6.3 ఓవర్లలో 32 పరుగులకే 6 వికెట్లు కోల్పోయింది.

Also Read: చితక్కొట్టిన స్మృతి మంథాన..సౌత్‌ ఆఫ్రికా చిత్తు చిత్తు

ఐర్లాండ్ 50-60 పరుగులకు మించి స్కోర్ చేయలేదేమో అనిపించింది కానీ ఇక్కడే మార్క్ అడైర్‌తో కలిసి గారెత్ డెలానీ 44 పరుగుల భాగస్వామ్యాన్ని నెలకొల్పి జట్టును ఆదుకున్నాడు. వీరిద్దరూ కాకుండా 10వ స్థానంలో వచ్చిన జోష్ లిటిల్ కూడా 22 పరుగులు చేసి జట్టును 9 వికెట్ల నష్టానికి 106 పరుగులకు చేర్చాడు. షహీన్‌, అమీర్‌తో పాటు ఇమాద్‌ వాసిమ్‌ పాక్‌ తరఫున 3 వికెట్లు పడగొట్టాడు.

మళ్ళీ విఫలమైన పాక్ బ్యాటర్స్..

ఐర్లాండ్ కంటే పాకిస్తాన్ మెరుగైన ఆరంభాన్ని కనబరిచింది. పవర్‌ప్లేలో జట్టు 40 పరుగులు చేసి 2 వికెట్లు మాత్రమే కోల్పోయింది.  కానీ, ఆ తర్వాత అకస్మాత్తుగా ఇన్నింగ్స్ తడబడింది. 9వ ఓవర్ నుంచి 11వ ఓవర్ వరకు 18 బంతుల్లోనే పాకిస్థాన్ 10 పరుగులకే 4 వికెట్లు కోల్పోయింది. 8 ఓవర్లు ముగిసే సరికి 2 వికెట్లకు 52 పరుగులు చేసిన స్కోరు 11వ ఓవర్ ముగిసేసరికి 6 వికెట్లకు 62 పరుగులుగా మారింది. బారీ మెక్‌కార్తీ (3/15), కర్టిస్ కాంఫర్ (2/24)ల బలమైన బౌలింగ్,  కొంత మంచి ఫీల్డింగ్ పాకిస్తాన్ బ్యాటింగ్‌ను తిప్పలు పెట్టింది. 

Pakistan vs Ireland : పాకిస్థాన్ మరో ఓటమి ప్రమాదంలో పడినట్లు కనిపించింది.  అయితే వారికి ఊరట కలిగించే విషయం ఏమిటంటే, కెప్టెన్ బాబర్ ఆజం (32 నాటౌట్) క్రీజులో ఉన్నాడు. అతనికి బౌలింగ్‌లో పెద్దగా రాణించలేని అబ్బాస్ ఆఫ్రిది (17) నుండి మంచి మద్దతు లభించింది. . కెప్టెన్ బాబర్‌తో కలిసి 33 పరుగుల భాగస్వామ్యం నెలకొల్పి జట్టును విజయానికి చేరువ చేశాడు. అబ్బాస్ స్కోరు 95 పరుగుల వద్ద ఔటైనా అతడి తర్వాత వచ్చిన షాహీన్ (13 నాటౌట్) 2 సిక్సర్లు బాది జట్టుకు విజయాన్ని అందించాడు.