Nipah Virus: నిపా వైరస్‌కు వ్యాక్సిన్ వచ్చేస్తోంది.. చివరి దశలో ఆక్స్‌ఫర్డ్ పరిశోధనలు

Nipah Virus: ఆక్స్‌ఫర్డ్ విశ్వవిద్యాలయం నిపా వైరస్‌కు వ్యాక్సిన్‌ను మానవులకు పరీక్షించడం ప్రారంభించింది. ఇప్పటి వరకు ఈ వైరస్‌కు వ్యాక్సిన్‌ లేదు. దీని పరీక్ష విజయవంతమైతే, నిపా వైరస్‌కు ఇది మొదటి వ్యాక్సిన్ అవుతుంది. నిపా వైరస్ లక్షణాలను మందుల ద్వారా నియంత్రించేందుకు వైద్యులు ప్రయత్నిస్తున్నారు. రాయిటర్స్ ప్రకారం, గత వారం 18-55 సంవత్సరాల వయస్సు గల 52 మందికి ఈ టీకా మోతాదులు ఇచ్చారు.  ఇప్పుడు వీరి రోగనిరోధక వ్యవస్థపై టీకా ప్రభావం అధ్యయనం చేస్తున్నారు. ఆస్ట్రాజెనెకా (AZN.L) అలాగే  సెరమ్ ఇన్‌స్టిట్యూట్ ఆఫ్ ఇండియా నుండి COVID-19 షాట్‌లలో ఉపయోగించిన అదే సాంకేతికతపై ఈ డోస్ కూడా ఆధారపడి ఉంటుంది.

ఆక్స్‌ఫర్డ్ వ్యాక్సిన్ గ్రూప్ పర్యవేక్షణలో పరీక్షలు..

ఆక్స్‌ఫర్డ్ వ్యాక్సిన్ గ్రూప్ (Oxford Vaccine Group) పర్యవేక్షణలో సంభావ్య టీకా పరీక్ష జరుగుతోంది. CEPI ఈ సమూహానికి నిధులను అందిస్తోంది. CEPI అనేది కొత్త అంటు వ్యాధులకు వ్యతిరేకంగా వ్యాక్సిన్‌ల అభివృద్ధికి మద్దతు ఇచ్చే ప్రపంచ కూటమి.అమెరికాకు చెందిన మోడర్నా కంపెనీ (Moderna) కూడా నిపా వైరస్‌ కు వ్యాక్సిన్‌ను తయారు చేసే పనిని ప్రారంభించింది. 2022లో, మోడెర్నా US నేషనల్ ఇన్‌స్టిట్యూట్ ఆఫ్ అలర్జీ అండ్ ఇన్ఫెక్షియస్ డిసీజెస్‌తో కలిసి వ్యాక్సిన్‌ను తయారు చేయడం ప్రారంభించింది, అయినప్పటికీ దాని ట్రయల్ ప్రారంభం కాలేదు.

కేరళలో 2018లో నిపా కేసులు నమోదయ్యాయి..

2018లో కేరళలోని కోజికోడ్ - మలప్పురం జిల్లాల్లో నిపా వైరస్(Nipah Virus) కారణంగా 17 మంది మరణించారు. దీని తరువాత, 2019 లో కొచ్చిలో నిపా వైరస్ కేసు నమోదైంది. అదే సమయంలో, 2021లో కూడా కోజికోడ్‌లో నిపా వైరస్ కేసు కనబడింది. సెప్టెంబర్ 2023లో కూడా 6 మందికి నిపా సోకింది. ఇది కాకుండా కోజికోడ్‌లో ఇద్దరు మరణించారు.

Also Read: దేశంలోనే తొలిసారి.. AIతో 62ఏళ్ల రోగికి విజయవంతమైన శస్త్రచికిత్స!

6 సంవత్సరాలలో 4 సార్లు నిపా వైరస్  సోకిన కేసులు నమోదయ్యాయి.  దీని దృష్ట్యా కేరళలో లాక్‌డౌన్ లాంటి పరిస్థితి ఏర్పడింది. దీని తీవ్రతను పరిగణనలోకి తీసుకుని రాష్ట్ర ప్రభుత్వం కన్నూర్, వాయనాడ్, మలప్పురంలలో అలర్ట్ ప్రకటించింది. ఇక్కడ 7 గ్రామ పంచాయతీలను కంటైన్‌మెంట్ జోన్లుగా మార్చారు. ఆయా ప్రాంతాల్లో, ఇక్కడి ఆసుపత్రుల్లో మాస్క్‌లు ధరించడం తప్పనిసరి చేశారు.

నిపా జూనోటిక్ వైరస్..

నిపా వైరస్ ఒక రకమైన జూనోటిక్ ఇన్ఫెక్షన్. ఇది జంతువుల ద్వారా వ్యాపిస్తుంది. టొరంటో హెల్త్ సైన్స్ సెంటర్‌కు చెందిన మైక్రోబయాలజిస్ట్ డాక్టర్ సమీరా ముబారెకా చెబుతున్న దాని ప్రకారం  నిపా గబ్బిలాలు, పందుల వంటి జంతువుల నుంచి  మనుషులకు వ్యాపిస్తుంది.