వేలంలో మొఘ‌ల్ కాలం నాటి పేయింటింగ్‌ రికార్డ్.. రూ.120 కోట్లు

భారతీయ క్లాసికల్ ఆర్ట్ మార్కెట్‌లో చరిత్ర సృష్టించిన అరుదైన ఘట్టం లండన్‌లో జరిగింది. 16వ శతాబ్దానికి చెందిన మొఘల్ కాలం నాటి సూక్ష్మ చిత్రకళ (మినియేచర్ పెయింటింగ్) ఒకటి ప్రముఖ క్రిస్టీస్ వేలంలో రూ.120 కోట్లు (సుమారు $13.6 మిలియన్లు) పలికింది. అనుకున్నదాని క‌న్నా సుమారు 14 రెట్లు అధిక ధ‌ర‌కు ఆ చిత్రపటం వేలంలో అమ్ముడుపోయింది. దీన్ని క్రిస్టీ వేలం చ‌రిత్రలో రికార్డుగా భావిస్తున్నారు.

'ఎ ఫ్యామిలీ ఆఫ్ చీతాస్ ఇన్ ఎ రాకీ ల్యాండ్‌స్కేప్' అనే శీర్షికతో ఈ అద్భుతమైన చిత్రాన్ని మొఘల్ చక్రవర్తి అక్బర్ ఆస్థానంలోని ప్రసిద్ధ చిత్రకారుడు బసవాన్ 1570లో చిత్రించినట్లు భావిస్తున్నారు. ఈ పెయింటింగ్ కేవలం 29.8 సెం.మీ. ఎత్తు, 18.6 సెం.మీ. వెడల్పు మాత్రమే కలిగి ఉంది. కాన్వాస్‌పై కాకుండా, వస్త్రంపై రంగులు, బంగారు రేకులతో దీనిని అత్యంత సున్నితంగా చిత్రించారు. రాతి భూభాగంలో చిరుతపులుల కుటుంబం సహజత్వాన్ని అద్భుతంగా చిత్రీకరించిన ఈ కళాఖండాన్ని, మొఘల్ కళలోని తొలి ప్రకృతి అధ్యయనాలలో ఒకటిగా కళా చరిత్రకారులు పరిగణిస్తారు.

లండన్‌లో అక్టోబర్ 30న జరిగిన ఈ వేలం "ప్రిన్స్ అండ్ ప్రిన్సెస్ సద్రుద్దీన్ ఆగాఖాన్ పర్సనల్ కలెక్షన్ నుంచి అత్యుత్తమ పెయింటింగ్‌లు పేరుతో నిర్వహించబడింది. దాదాపు 45 ఏళ్ల పాటు వారు సేకరించిన విలువైన భారతీయ, పర్షియన్ కళాఖండాల సేకరణలో ఈ బసవాన్ చిత్రం అత్యంత ముఖ్యమైనది. ఈ వేలంలో విక్రయించిన 95 కళాఖండాల మొత్తం విలువ సుమారు రూ. 540 కోట్లు పలికింది.