తెలంగాణలో రికార్డు స్థాయిలో మద్యం విక్రయాలు.. లెక్కలు చూస్తే కళ్లు బైర్లుకమ్మాల్సిందే..

Telangana Elections: తెలంగాణలో అసెంబ్లీ ఎన్నికలకు నెల రోజుల సమయం మాత్రమే ఉంది. దాంతో ఓటర్లను తమవైపు లాగేందుకు, వారిని ప్రలోభ పెట్టేందుకు ఆయా పార్టీల అభ్యర్థులు చేయాల్సినదంతా చేస్తున్నారు. డబ్బులు, గిఫ్ట్‌లు, మద్యం పంపిణీ షరామామూలుగానే మారిపోయింది. ఫలితంగా రాష్ట్రంలో మద్యం అమ్మకాలు భారీగా పెరిగిపోయాయని అధికారిక లెక్కలు చెబుతున్నాయి. తాజాగా అధికారులు వెల్లడించిన లెక్కలు కళ్లు బైర్లు కమ్మేలా ఉన్నాయి.

2022లో ఇదే సమయంతో పోలిస్తే ఈ ఏడాది అక్టోబర్ నెలలో మద్యం అమ్మకాలు ఇప్పటికే 4% పైగా పెరిగాయి . రూ. 1,965 కోట్ల నుండి రూ. 2,055 కోట్లకు పెరిగాయి. గతేడాదితో పోలిస్తే ముఖ్యంగా బీర్ల అమ్మకాలు 13% పెరగడం గమనార్హం. అయితే, ఈ గణాంకాలు అక్టోబర్ 24 వరకు మాత్రమే ఉన్నాయి. ఈ నెల చివరి వారంలో మరింత వృద్ధి నమోదయ్యే అవకాశం ఉందని అధికారులు అంచనా వేస్తున్నారు. ఇక్కడ విశేషం ఏంటంటే.. 2018 తెలంగాణ అసెంబ్లీ ఎన్నికల సమయానికి(డిసెంబర్ 7న ఎన్నికలు జరిగాయి) అంతకు ముందు ఏడాది అంటే నవంబర్ 2017 తో పోలిస్తే లెక్కలు విరుద్ధంగా ఉన్నాయి. అప్పుడు ఏకంగా 36 శాతం విక్రయాలు తగ్గాయని అధికారులు చెబుతున్నారు. కానీ, ఇప్పుడు మాత్రం సీన్ రివర్స్ అయ్యింది. గతేడాదికి, ప్రస్తుతానికి లెక్కలు చూస్తే బిత్తరపోయే పరిస్థితి ఉంది.

ఇక ఈ ఐదేళ్ల మధ్య కాలంలో జరిగిన ఉప ఎన్నికల కాలంలో మద్యం విక్రయాలు భారీగా పెరిగినట్లు ఘనాంకాలు చెబుతున్నాయి. ప్రస్తుతం మద్యం అక్రమ రవాణాపై అధికారులు ఉక్కుపాదం మోపుతున్నారు. మద్యం విక్రయాలు తగ్గడానికి ఇది కూడా ఒక కారణం అయి ఉండొచ్చని అంచనా. ఇక మద్యం దుకాణాలపై జరిమానాలు కూడా విధిస్తున్నారు అధికారులు. అయినప్పటికీ.. ఏదో ఒక మార్గంలో విక్రయాలు సాగుతూనే ఉన్నాయి. మరి క్రమంగా పెరుగుతున్న మద్యం విక్రయాలకు ఎన్నికలే ఏకైక కారణమా? కాదా? అనేది అస్పష్టమైనప్పటికీ.. ఎన్నికల తేదీ సమీపిస్తున్నా కొద్ది అమ్మకాలు మరింత పెరుగుతాయనేది మాత్రం స్పష్టం అవుతోంది.

అధికారిక లెక్కలు ఇలా ఉన్నాయి..

అక్టోబరు 2023లో 19.5 లక్షల కేసుల విదేశీ మద్యం (IMFL) అమ్ముడయ్యింది. అక్టోబర్ 2022 నుండి పరిశీలిస్తే ఇది 6.8% వృద్ధిని నమోదు చేసింది. ఇక 34.2 లక్షల బీర్లు అమ్ముడయ్యాయి. ఇది గత సంవత్సరంతో పోలిస్తే 13% పెరిగింది. ఈ ఏడాది అక్టోబర్ 24న రోజువారీ విక్రయాలు దాదాపు రూ.188 కోట్లకు చేరుకోగా, త్వరలో రూ. 200 కోట్లను అధిగమించవచ్చని అంచనా వేస్తున్నారు అధికారులు. అక్టోబరు 24వ తేదీ వరకు ఉన్న లెక్కలను గమనిస్తే.. ఎన్నికలే కాకుండా.. దసరా పండుగ సందర్భంగా కూడా ఈ అమ్మకాలు పెరగడానికి కారణంగా పేర్కొంటున్నారు అధికారులు.

మద్యంపై నిషేధం విధించాలి..

తెలంగాణలో భారీగా పెరుగుతున్న మద్యం విక్రయాలపై తెలంగాణ కాంగ్రెస్ నేతలు ఆందోళన వ్యక్తం చేస్తున్నారు. ఎన్నికలు సమీపిస్తున్న నేపథ్యంలో అధికార బీఆర్ఎస్ పార్టీ ప్రజలను ప్రలోభాలకు గురి చేసేందుకు మద్యం పంపిణీ చేస్తోందని ఆరోపిస్తున్నారు కాంగ్రెస్ నేతలు. ఎన్నికల కోడ్ నేపథ్యంలో.. మద్యం విక్రయాలు, రవాణాపై నిషేధం విధించాలని భారత ఎన్నికల కమిషన్‌ను కాంగ్రెస్‌ నేతలు కోరారు. ఈ మేరకు ఒక విజ్ఞాపన పత్రాన్ని కూడా సమర్పించారు.

Also Read:

శరీరంలో గాయం మచ్చ పోవట్లేదా? జస్ట్ ఇలా చేస్తే చాలు మరక మాయం..!

ఈ రాశుల వారు వారం రోజులు చాలా జాగ్రత్తగా ఉండాలి.. లేదంటే కష్టాలు తప్పవు..!