Donald Trump: ఆ దేశానికి చమురు, డబ్బులు అందవు...క్యూబాకు ట్రంప్‌ స్ట్రాంగ్‌ వార్నింగ్‌

Donald Trump: వెనెజువెలా మీద పూర్తి పట్టు సాధించాలని చూస్తున్న అమెరికా అధ్యక్షుడు డొనాల్డ్‌ ట్రంప్‌ తాజాగా ఆ దేశం మీద ఆధారపడిన ఇతర దేశాలను టార్గెట్‌ చేశాడు. ఇన్నాళ్లు వెనెజువెలా నుంచి చమురు దిగుమతి చేసుకున్న క్యూబాను లక్ష్యంగా చేసుకుని  ట్రంప్‌ కీలక వ్యాఖ్యలు చేశారు. అనేక సంవత్సరాలుగా ఆ దేశం డబ్బు, చమురు కోసం వెనెజువెలా పై ఆధారపడి బతికిందని ఆరోపించారు. ఇకపై ఆ దేశానికి (Cuba) ఎలాంటి చమురు గానీ, డబ్బు గానీ వెళ్లవని.. పరిస్థితి చేయి దాటిపోకముందే ఒక ఒప్పందానికి చేసుకోవాలంటూ వార్నింగ్‌ ఇచ్చాడు. ఈమేరకు ట్రూత్‌ సోషల్‌లో  చేసిన  పోస్టు వైరల్‌గా మారింది. మరోవైపు.. అమెరికా విదేశాంగ మంత్రి మార్కో రుబియో.. క్యూబా అధ్యక్షుడు అవుతారంటూ ఓ నెటిజన్‌ పెట్టిన ట్వీట్‌పైనా స్పందించారు. ఇది వినడానికి బాగుందంటూ కామెంట్‌ చేశాడు.

‘‘వెనెజువెలా నుంచి పెద్దమొత్తంలో అందిన చమురు, డబ్బుపై ఆధారపడి క్యూబా అనేక ఏండ్లు గడిపింది. దానికి ప్రతిఫలంగా.. ఇద్దరు వెనెజువెలా నియంతలకు క్యూబా భద్రతా సేవలు అందించింది. కానీ.. ఇకపై అది  జరగదు. ఇటీవల మేం నిర్వహించిన దాడిలో అనేక మంది క్యూబన్‌ భద్రతాధికారులు మృతి చెందారు. వెనెజువెలాకు ఇకపై గూండాలు, దోపిడీదారుల రక్షణ అవసరం లేదని వ్యాఖ్యానించారు. ప్రపంచంలోనే అత్యంత శక్తిమంతమైన అమెరికా సైన్యం వారికి అండగా ఉంటుందని చెప్పుకొచ్చారు. క్యూబాకు చమురు, డబ్బులు కూడా ఇక అందవు. పరిస్థితి చేయి దాటిపోకముందే ఆ దేశం ఒక ఒప్పందానికి రావాలి’’ అని ట్రంప్‌ హెచ్చరించారు.

వెనెజువెలా మాజీ అధ్యక్షుడు మదురోను బంధించి తీసుకొచ్చే క్రమంలో  అమెరికా చేపట్టిన ఆపరేషన్‌ సమయంలో ఆయనకు రక్షణగా ఉన్న క్యూబాకు చెందిన 32 మంది భద్రతాధికారులు మృతి చెందారు. ఈ దాడిని క్యూబా అధ్యక్షుడు మిగెల్ డియజ్- కెనల్ తీవ్రంగా ఖండించారు. హవానాలోని అమెరికా రాయబార కార్యాలయం ఎదుట వేలాది మంది పాల్గొన్న ర్యాలీని ఉద్దేశించి ఆయన  ప్రసంగించారు. క్యూబా చమురు అవసరాల్లో దాదాపు 30 శాతం వెనెజువెలా సరఫరా చేస్తుండటం గమనార్హం. ఇప్పటికే అస్థిరంగా ఉన్న క్యూబా విద్యుత్ వ్యవస్థ, ఇంధన సరఫరాలకు తాజా పరిణామం పెద్ద దెబ్బ అని విశ్లేషకులు అంటున్నారు.