H-1B - Google: హెచ్‌-1బీ ఉద్యోగులకు గూగుల్‌ గుడ్‌న్యూస్‌..  గ్రీన్‌కార్డుల ప్రక్రియలో వేగం

H-1B - Google: అమెరికాలో తాత్కాలిక వీసాలపై పనిచేస్తూ శాశ్వత నివాసం కోసం ఎదురుచూస్తున్న విదేశీ ఉద్యోగులకు ఇది నిజంగా గుడ్‌న్యూస్‌ అనే చెప్పాలి. ఈ మేరకు టెక్‌ దిగ్గజం గూగుల్‌ గుడ్‌న్యూస్‌ ఏంటో చెప్పింది. వచ్చే ఏడాది తమ సంస్థలో పనిచేసే హెచ్‌-1బీ (H-1B) ఉద్యోగులకు ‘గ్రీన్‌కార్డ్ స్పాన్సర్‌షిప్‌ ప్రక్రియ’ను  వేగవంతం చేయనున్నట్లు వివరించింది. ఈ మేరకు ఇంటర్నల్‌ న్యూస్‌లెటర్‌లో ఉద్యోగులకు దీనిపై సమాచారం ఇచ్చినట్లు ఆంగ్ల మీడియా కథనాలు వెల్లడి చేశాయి. అర్హత కలిగిన ఉద్యోగులకు సంబంధించి 2026లో PERM దరఖాస్తుల ప్రక్రియను వేగవంతం చేయనున్నట్లు ఈ మేరకు గూగుల్‌ వెల్లడించినట్లు తెలుస్తోంది.

కాగా PERMకు అర్హత సాధించిన ఉద్యోగులు ఎవరైతే ఉంటారో వారికి వచ్చే ఏడాది తొలి త్రైమాసికంలో గూగుల్‌ (Google) ఇమిగ్రేషన్‌ చట్ట సంస్థల నుంచి పిలుపు వస్తుందని కంపెనీ తమ ఇంటర్నల్‌ మెమోలో పేర్కొన్నట్లు సదరు కథనాలు వెల్లడించాయి. అయితే, ఈ ప్రణాళిక గురించి గూగుల్‌ ఇంతవరకు ఎలాంటి బహిరంగ ప్రకటన చేయలేదు.  కానీ, ట్రంప్‌ కఠిన వలస విధానాలు, వీసా ఫీజులు, సోషల్‌ మీడియా వెట్టింగ్‌ నిబంధనల వేళ.. టెక్‌ దిగ్గజం నిర్ణయం అనేకమంది హెచ్‌-1బీ ఉద్యోగులకు ఊరట కలిగిస్తుందనటంలో సందేహం లేదు.

PERM ప్రక్రియ..?

కాగా అమెరికా ఉపాధి ఆధారిత గ్రీన్‌ కార్డుల జారీ ప్రక్రియలో ‘ప్రోగ్రామ్‌ ఎలక్ట్రానిక్‌ రివ్యూ మేనేజ్‌మెంట్‌ (PERM)’ది కీలక పాత్ర. దీన్ని టెక్‌ కంపెనీలు ఎక్కువగా వినియోగిస్తున్నాయి. తమ సంస్థల్లో పనిచేసే ఉద్యోగులకు శాశ్వత నివాసం దక్కేలా కంపెనీలు సాయం చేస్తుంటాయి. PERM ఆమోదం లభించిన తర్వాతే సదరు ఉద్యోగి తన గ్రీన్‌ కార్డు ప్రక్రియలో ముందుకెళ్లేందుకు అవకాశం ఉంటుంది. అయితే, ఇందుకు చాలా షరతులు ఉంటాయి. సంబంధిత విదేశీ ఉద్యోగిని నియమించుకోవడం వల్ల అమెరికా వర్కర్లపై ఎలాంటి ప్రతికూల ప్రభావం ఉండదని కంపెనీలు నిరూపించాలి. అంతేకాదు.. ఆ ఉద్యోగానికి అర్హత కలిగిన అమెరికన్లు అందుబాటులో లేరని రుజువు చేయాల్సిన అవసరం ఉంటుంది. ఈ కారణాల వల్లే చాలా కంపెనీలు లేఆఫ్‌లు లేదా నియామకాలు నెమ్మదించిన సమయంలో PERM దరఖాస్తులకు సంబంధించి జాగ్రత్తగా వ్యవహరిస్తుంటాయి.

అయితే కంపెనీ లేఆఫ్‌లు ఎక్కువగా ఉన్న సమయంలో విదేశీ ఉద్యోగులకు PERM నిబంధనల ప్రకారం స్పాన్సర్‌షిప్‌ ఇవ్వడాన్ని సమర్థించుకోవడం కంపెనీలకు కష్టతరంగా మారింది. 2023 జనవరిలో గూగుల్‌ ప్రపంచవ్యాప్తంగా 12వేల మందిని ఉద్యోగుల నుంచి తొలగించింది. ఆ సమయంలో PERM దరఖాస్తు ప్రక్రియను కూడా నిలిపివేసింది. ఆ ఏడాది అమెజాన్‌, మెటా వంటి సంస్థలు కూడా ఇదేవిధంగా వ్యవహరించాయి. గత ఏడాదిలో గూగుల్‌ చాలా స్వల్ప సంఖ్యలో PERM దరఖాస్తులను ఫైల్ చేసింది. కానీ,2026 నుంచి ఈ ప్రోగ్రామ్‌ను వేగవంతం చేయాలని గూగుల్‌ భావిస్తోంది.

ఎలా ఇస్తారంటే?

అయితే, గూగుల్‌లో పనిచేసే ప్రతి విదేశీ ఉద్యోగి ఈ PERMకు అర్హత సాధించడం కష్టం. ఇందుకు కంపెనీ కొన్ని షరతులు విధించింది. డిగ్రీతో పాటు పని అనుభవాన్ని కూడా పరిగణలోకి తీసుకుంటారు. ఇక, గూగుల్‌ ఆఫీసులకు వచ్చి పనిచేసే ఉద్యోగులకే ఈ ప్రోగ్రామ్‌ వర్తిస్తుంది. రిమోట్‌గా ఉండి పనిచేసే వారిని PERM అర్హతకు పరిగణించాలంటే వారు కచ్చితంగా తమ నివాస ప్రదేశాన్ని మార్చుకోవాల్సి ఉంటుందని కంపెనీ అధికారులు వెల్లడించారు. సీనియార్టీ, పనితీరు కూడా ఇక్కడ కీలక పాత్ర పోషిస్తుందని గూగుల్‌ తమ మెమోలో పేర్కొన్నట్లు సమాచారం.