దుబాయ్‌లో ఘనంగా బతుకమ్మ సంబరాలు!

Batukamma: దుబాయ్‌లో బతుకమ్మ వేడుకలు ఘనంగా జరుగుతున్నాయి. ఎమిరేట్స్ తెలంగాణ కల్చరల్ & వెల్ఫేర్ అసోసియేషన్ (ETCA) ఆధ్వర్యంలో 14వ బతుకమ్మ వారోత్సవాలు అంగరంగ వైభవంగా మొదలయ్యాయి. ఏఎల్ ముల్లా ప్లాజా అల్ అహ్లీ స్పోర్ట్స్ క్లబ్ వేదికగా జరుగుతున్న వేడుకలకు వేములవాడ ఎమ్మెల్యే ఆది శ్రీనివాస్ ముఖ్య అతిథిగా హాజరవగా.. RTV మీడియా పార్ట్‌నర్‌గా వ్యవహరిస్తోంది. 

ఇక తెలంగాణలో సంబురంగా జరుపుకునే పండుగను తెలంగాణ ప్రవాసీయులుపెద్ద సంఖ్యలో హాజరై దుబాయిలో అంగరంగ వైభవంగా నిర్వహించారు. మ‌హిళ‌లు పూలతో బతుకమ్మలు పేర్చి భక్తి శ్రద్ధలతో గౌరీ పూజ‌లు నిర్వహించారు. సాంప్రదాయ దుస్తుల్లో బతుకమ్మ ఆటపాటలతో దుబాయ్ న‌గ‌రం పుల‌కించింది. తెలంగాణ అస్తిత్వాన్ని, మన సంస్కృతి సంప్రదాయాలను దుబాయ్ గడ్డపై సగర్వంగా చాటుతున్నారు.  ఈ సంబరాలకు సింగర్స్ సోనీ పటేల్, వరం, అనన్యా నాగళ్ల, కమెడియన్ సదానందం పాల్గొని సందడి చేశారు. బతుకమ్మ పాటలతో ఉర్రూతలూగించారు.