బంగ్లాదేశ్‌లో స్కూళ్లు, కాలేజీలు బంద్.. డీజిల్, పెట్రోల్ కష్టాలు షురూ!

మధ్యప్రాచ్యంలో యుద్ధం బంగ్లాదేశ్‌ను తీవ్ర సంక్షోభంలోకి నెట్టింది. ప్రపంచవ్యాప్తంగా క్రూడ్ ఆయిల్ సప్లై చైయిన్ దెబ్బతినడంతో ఆ దేశాన్ని గండం నుంచి గట్టెక్కించేందుకు రెహమాన్ ప్రభుత్వం అత్యవసర కఠిన నిర్ణయాలు తీసుకుంది. ఇందులో భాగంగా దేశవ్యాప్తంగా ఉన్న అన్ని ప్రభుత్వ, ప్రైవేట్ విశ్వవిద్యాలయాలను మూసివేయాలని విద్యా మంత్రిత్వ శాఖ సంచలన ఆదేశాలు జారీ చేసింది.

బంగ్లాదేశ్ విద్యా మంత్రిత్వ శాఖ అసిస్టెంట్ సెక్రటరీ సుల్తాన్ అహ్మద్ సంతకం చేసిన ఉత్తర్వుల ప్రకారం, విద్యుత్ వినియోగాన్ని తగ్గించేందుకే ఈ చర్య తీసుకున్నారు. విశ్వవిద్యాలయాల్లోని హాస్టళ్లు, ప్రయోగశాలలు, తరగతి గదుల్లో ఏసీలు, లైట్ల వినియోగం అధికంగా ఉంటోంది. వీటిని మూసివేయడంతో విద్యుత్ గ్రిడ్‌పై ఒత్తిడి తగ్గుతుంది. విద్యార్థులు, సిబ్బంది రాకపోకలు తగ్గడం వల్ల రవాణా ఇంధనం ఆదా అవుతుంది. నగరాల్లో ట్రాఫిక్ తగ్గి వాహనాల ఇంధన వృధా అరికట్టబడుతుంది. ఇప్పటికే రంజాన్ సందర్భంగా పాఠశాలలు మూసివేసి ఉండగా, తాజాగా విదేశీ పాఠ్యాంశాలు బోధించే సంస్థలు, ప్రైవేట్ కోచింగ్ సెంటర్లను కూడా కార్యకలాపాలు నిలిపివేయాలని ప్రభుత్వం ఆదేశించింది.

మధ్యప్రాచ్య సంక్షోభం - దిగుమతులపై ప్రభావం
బంగ్లాదేశ్ తన ఇంధన అవసరాలలో 95 శాతం కేవలం దిగుమతుల ద్వారానే తీర్చుకుంటుంది. ప్రధానంగా మధ్యప్రాచ్యంపైనే ఆధారపడటంతో, అక్కడ కొనసాగుతున్న ఉద్రిక్తతలతో సరఫరా నిలిచిపోయింది. దీనివల్ల దేశంలో గ్యాస్, పెట్రోలియం ఉత్పత్తుల కొరత తీవ్రమైంది. కొరతను అధిగమించేందుకు ప్రభుత్వం స్పాట్ మార్కెట్‌లో అత్యధిక ధరలకు LNG కొనుగోలు చేస్తోంది.

ఇంధన విక్రయాలపై ఆంక్షలు
పరిస్థితి తీవ్రతను దృష్టిలో ఉంచుకుని ప్రభుత్వం పలు ఆర్థిక ఆంక్షలు విధించింది.

ఎరువుల కర్మాగారాల మూసివేత: గ్యాస్ కొరత కారణంగా ఐదు ప్రభుత్వ ఎరువుల కర్మాగారాలలో నాలుగింటిని తాత్కాలికంగా మూసివేశారు. అక్కడ వాడాల్సిన గ్యాస్‌ను విద్యుత్ ఉత్పత్తి కేంద్రాలకు మళ్లిస్తున్నారు.
అమ్మకాలపై పరిమితి: ప్రజలు భయాందోళనతో ఇంధనాన్ని నిల్వ చేయకుండా ఉండటానికి, పెట్రోల్ బంకుల్లో ఇంధన విక్రయాలపై ప్రభుత్వం పరిమితులు విధించింది.
పొదుపు చర్యలు: అనవసరమైన లైటింగ్, వీధి దీపాల వినియోగంపై కఠిన మార్గదర్శకాలు విడుదలయ్యాయి.

మొత్తానికి, అంతర్జాతీయ భౌగోళిక రాజకీయ పరిస్థితులు బంగ్లాదేశ్ సాధారణ ప్రజల జీవనాన్ని, విద్యా వ్యవస్థను తీవ్రంగా ప్రభావితం చేస్తున్నాయి. ఇంధన నిల్వలు పెరిగే వరకు ఈ ఆంక్షలు కొనసాగే అవకాశం ఉందని అధికారులు భావిస్తున్నారు.