ceasefire : పాకిస్తాన్ -ఆఫ్ఘనిస్తాన్ మధ్య సీజ్ ఫైర్ !

పాకిస్తాన్ సైన్యం ఆఫ్ఘనిస్తాన్ భూభాగంలోకి జరిపిన వైమానిక దాడుల కారణంగా ఉద్రిక్తతలు పెరిగిన నేపథ్యంలో, ఇరు దేశాలు 48 గంటల తాత్కాలిక కాల్పుల విరమణకు అంగీకరించాయి. ఆఫ్ఘన్ గడ్డపై జరిగిన ఈ దాడుల్లో పౌరులు మరణించినట్లు నివేదికలు రావడంతో, సరిహద్దుల్లో యుద్ధ వాతావరణం నెలకొంది. ఆఫ్ఘనిస్తాన్ సరిహద్దులో కార్యకలాపాలు సాగిస్తున్న ఉగ్రవాదుల స్థావరాలను లక్ష్యంగా చేసుకుని దాడులు నిర్వహించినట్లు పాకిస్తాన్ ప్రకటించింది. 

48 hour Ceasefire declared betw #Pakistan & the #Taliban going in at 6 pm local time. Last temporary pause in fighting collapsed quickly. https://t.co/71f67OrQuS

— Geopolitical updates (@Geopol_updates) October 15, 2025

సౌదీ అరేబియా, ఖతార్ దేశాలు మధ్యవర్తిత్వం

అయితే, ఆఫ్ఘన్ వర్గాలు ఈ దాడుల్లో ఉగ్రవాదులతో పాటు సామాన్య పౌరులు కూడా మరణించినట్లు, ఇది తమ సార్వభౌమాధికారాన్ని ఉల్లంఘించడమేనని తీవ్రంగా ఖండించాయి. పాకిస్తాన్ రక్షణ మంత్రి ఖవాజా ఆసిఫ్, ఆఫ్ఘన్ గడ్డ నుంచి తమ దేశంపై జరుగుతున్న ఉగ్ర దాడులను ఇకపై సహించబోమని హెచ్చరించిన కొద్ది గంటల్లోనే ఈ దాడులు జరగడం గమనార్హం. ఈ నేపథ్యంలో, రెండు దేశాల సైన్యాలు సరిహద్దుల్లో ఒకరి పోస్టులపై మరొకరు దాడులు చేసుకోవడంతో పరిస్థితి చేయి దాటే ప్రమాదం ఏర్పడింది. సరిహద్దుల్లో నెలకొన్న ఈ తీవ్ర ఉద్రిక్తతను తగ్గించడానికి సౌదీ అరేబియా, ఖతార్ దేశాలు మధ్యవర్తిత్వం వహించాయి. ఈ చర్చల ఫలితంగా, ఇరు పక్షాలు 48 గంటల పాటు తాత్కాలిక కాల్పుల విరమణ పాటించడానికి అంగీకరించాయి. ఈ కాల్పుల విరమణ ఈ రోజు సాయంత్రం 6 గంటల నుంచి అమల్లోకి వచ్చినట్లు పాకిస్తాన్ విదేశాంగ కార్యాలయం తెలిపింది. 

 కాగా  గత ఆరు నెలల్లో పాకిస్తాన్, ఆఫ్ఘనిస్తాన్ మధ్య కాల్పుల విరమణ ఒప్పందం కుదరడం ఇది రెండోసారి. రెండు దేశాల మధ్య శతాబ్దానికి పైగా ఉన్న డ్యూరాండ్ లైన్ సరిహద్దు వివాదం ఈ ఘర్షణలకు ప్రధాన కారణంగా కొనసాగుతోంది. తాజా కాల్పుల విరమణ తాత్కాలిక ఉపశమనం మాత్రమే.