Zarina Wahab: 'రాజాసాబ్', 'మన శంకర వరప్రసాద్' సినిమాల్లో ఈ కామన్ పాయింట్ గమనించారా..?

Zarina Wahab: ఈ సంక్రాంతి సీజన్‌లో విడుదలైన రెండు పెద్ద సినిమాలు ప్రేక్షకుల్లో మంచి చర్చను తెచ్చాయి. ప్రభాస్(Prabhas) నటించిన ‘ది రాజాసాబ్’(The Raja Saab), చిరంజీవి(Chiranjeevi) నటించిన ‘మన శంకర వరప్రసాద్ గారు’(Mana Shankara Vara Prasad Garu) సినిమాలు బాక్సాఫీస్ దగ్గర సందడి చేయడమే కాకుండా, వాటిలో నటించిన ఒక సీనియర్ నటి అందరి దృష్టిని ఆకర్షించింది. ఆమెనే జరీనా వహాబ్. ఈ రెండు చిత్రాల్లో ఆమె కీలక పాత్రల్లో కనిపించి, తన నటనతో ప్రేక్షకుల మనసులు గెలుచుకున్నారు.

‘ది రాజాసాబ్’ సినిమాలో ప్రభాస్ నానమ్మగా గంగాదేవి పాత్రలో జరీనా వహాబ్ కనిపించారు. ఆ పాత్రలో ఆమె చూపించిన హుందాతనం, భావోద్వేగం కథకు బలంగా నిలిచాయి. మాటలు తక్కువైనా, ముఖాభినయంతోనే భావాలను చెప్పగలిగేలా ఆమె నటించారు. అలాగే ‘మన శంకర వరప్రసాద్ గారు’ సినిమాలో చిరంజీవి తల్లిగా ఆమె పాత్ర కూడా మంచి స్పందన పొందింది. తల్లిగా కొడుకుపై చూపించే ప్రేమ, ఆప్యాయత ప్రేక్షకులను బాగా కదిలించింది. ఈ రెండు సినిమాల తర్వాత “ఆ నటి ఎవరు?” అంటూ సోషల్ మీడియాలో సెర్చ్‌లు పెరగడం విశేషం.

చాలా మందికి తెలియని విషయం ఏంటంటే, జరీనా వహాబ్ అసలు తెలుగు అమ్మాయి. ఆమె స్వస్థలం విశాఖపట్నం. మాతృభాష తెలుగు అయినప్పటికీ, ఆమె సినీ ప్రయాణం ఎక్కువగా హిందీ సినిమాల్లో సాగింది. సినిమాలపై ఆసక్తితో పూణేలోని ఫిల్మ్ అండ్ టెలివిజన్ ఇన్‌స్టిట్యూట్ ఆఫ్ ఇండియాలో నటనలో శిక్షణ పొందారు. ఆ తర్వాత బాలీవుడ్‌లో అడుగుపెట్టి, మొదట చిన్న పాత్రలు చేశారు. ఆ సమయంలో వచ్చిన విమర్శలను పట్టించుకోకుండా, తన నటనను మెరుగుపరుచుకుంటూ ముందుకు సాగారు.

1976లో విడుదలైన ‘చిత్ చోర్’ సినిమా జరీనా వహాబ్ కెరీర్‌ను మలుపు తిప్పింది. ఆ సినిమా విజయం తర్వాత ఆమెకు మంచి అవకాశాలు వచ్చాయి. హిందీతో పాటు మలయాళం, తమిళం, కన్నడ, తెలుగు భాషల్లోనూ నటించి తనకంటూ ఒక ప్రత్యేక గుర్తింపు సంపాదించారు. తెలుగులో సూపర్ స్టార్ కృష్ణతో కలిసి ‘గాజుల కృష్ణయ్య’ సినిమాలో నటించి ప్రేక్షకులకు దగ్గరయ్యారు. ఆ తర్వాత కొన్ని సినిమాల్లో నటించినప్పటికీ, వివాహం తర్వాత కొన్నేళ్లు సినిమాలకు దూరమయ్యారు.

చాలా కాలం తర్వాత రామ్ గోపాల్ వర్మ తెరకెక్కించిన ‘రక్తచరిత్ర’తో జరీనా వహాబ్ మళ్లీ తెలుగులో కనిపించారు. ఆ తర్వాత ‘దసరా’ వంటి సినిమాల్లో బలమైన పాత్రలు చేసి, క్యారెక్టర్ ఆర్టిస్టుగా మంచి పేరు తెచ్చుకున్నారు. ఇప్పుడు తల్లి, బామ్మ పాత్రలకు టాలీవుడ్‌లో ఆమెకు మంచి డిమాండ్ ఏర్పడింది.

ఇటీవల చిరంజీవికి తల్లిగా నటించడంపై వయసు విషయంలో కొన్ని ట్రోల్స్ వచ్చినా, అవి ఆమె నటన ముందు నిలవలేకపోయాయి. పాత్రకు తగ్గ నటనతో జరీనా వహాబ్ మరోసారి తన ప్రతిభను నిరూపించారు. ఈ సంక్రాంతి సీజన్‌లో ఆమె నటించిన పాత్రలు ప్రేక్షకుల మనసుల్లో నిలిచిపోయాయని చెప్పడంలో ఎలాంటి సందేహం లేదు.