Upasana Second Child: మెగా ఫ్యామిలీలో మరోసారి సందడి.. రెండో బిడ్డకు జన్మనివ్వబోతున్న ఉపాసన

మెగా పవర్ స్టార్ రామ్ చరణ్ సతీమణి, అపోలో ఫౌండేషన్ వైస్ చైర్‌పర్సన్ ఉపాసన రెండోసారి తల్లి కాబోతున్నారనే వార్తలు ప్రస్తుతం సోషల్ మీడియాలో, మెగా అభిమానుల్లో ఉత్సాహాన్ని నింపుతున్నాయి. తాజాగా, ఉపాసన కొణిదెల తన ఇన్‌స్టాగ్రామ్ ఖాతాలో పంచుకున్న ఒక వీడియో ఈ వార్తలకు మరింత బలాన్ని చేకూర్చింది. ఆ వీడియోలో ఆమె దీపావళి సందర్భంగా జరిగిన సీమంతం (బేబీ షవర్) వేడుకల దృశ్యాలను పంచుకున్నారు. కుటుంబ సభ్యులు, సన్నిహితులు ఉపాసనకు ఆశీస్సులు అందించి, బహుమతులు ఇస్తున్నట్లు ఆ వీడియోలో ఉంది.

ఈ వీడియోకి ఉపాసన ఇచ్చిన క్యాప్షన్ మరింత ఆసక్తికరంగా ఉంది. "ఈ దీపావళి వేడుక రెట్టింపు ఆనందం, రెట్టింపు ప్రేమ, రెట్టింపు ఆశీర్వాదాలతో నిండిపోయింది" అని రాశారు. వీడియో చివర్లో "న్యూ బిగినింగ్స్" (కొత్త ప్రారంభాలు) అని కూడా పేర్కొనడం జరిగింది. దీంతో త్వరలోనే మెగా కుటుంబం మరో శుభవార్త చెప్పే అవకాశం ఉందని ఊహాగానాలు బలంగా వినిపిస్తున్నాయి.

View this post on Instagram

A post shared by Upasana Kamineni Konidela (@upasanakaminenikonidela)

ఉపాసన వ్యాఖ్యలతో మొదలైన ప్రచారం:

రామ్ చరణ్, ఉపాసన దంపతులకు వివాహమైన పదకొండు సంవత్సరాల తర్వాత, 2023 జూన్‌లో గారాల పట్టి క్లీంకార కొణిదెల జన్మించింది. క్లీంకార రాకతో మెగా ఫ్యామిలీలో పండుగ వాతావరణం నెలకొంది. అయితే మొదటి బిడ్డ పుట్టిన కొద్ది నెలలకే ఉపాసన రెండో బిడ్డకు సంబంధించిన ప్లానింగ్‌పై చేసిన వ్యాఖ్యలు ఈ ప్రచారానికి ఊతమిచ్చాయి.

"ఆలస్యం చేయను, డాక్టర్ ఎప్పుడంటే అప్పుడే!"

గతంలో ఒక ఇంటర్వ్యూలో మాట్లాడిన ఉపాసన, రెండో సంతానం గురించి ఆసక్తికర వ్యాఖ్యలు చేశారు. "మొదటి బిడ్డ విషయంలో చాలా ఆలస్యం చేశాం. ఆ సమయంలో వచ్చిన విమర్శలను, ఒత్తిడిని నేను పట్టించుకోలేదు. కానీ, రెండో బిడ్డ విషయంలో అలాంటి పొరపాటు చేయాలనుకోవడం లేదు. నా ఆరోగ్యం, నా నిర్ణయం. మా డాక్టర్ ఎప్పుడు గ్రీన్ సిగ్నల్ ఇస్తే, అప్పుడే రెండోసారి బిడ్డకు జన్మనివ్వడానికి నేను సిద్ధంగా ఉన్నాను" అని ఉపాసన స్పష్టం చేశారు.

ఆరోగ్యం, మహిళల ఎంపికపై ఉపాసన చేసిన ఈ వ్యాఖ్యలు అప్పట్లో సోషల్ మీడియాలో వైరల్ అయ్యాయి. ఆలస్యంగా తల్లి కావాలనే తన నిర్ణయాన్ని సమర్థించుకున్న ఉపాసన, ఇప్పుడు త్వరగా రెండో బిడ్డను కనడానికి సిద్ధంగా ఉన్నాననడం మెగా అభిమానులకు సంతోషాన్ని కలిగిస్తోంది. ఈసారి కచ్చితంగా 'జూనియర్ రామ్ చరణ్' రావాలని వారు దేవుడిని ప్రార్థిస్తున్నారు.

ప్రస్తుతం తండ్రిగా రామ్ చరణ్ తన కూతురు క్లీంకారతో ఎక్కువ సమయం గడుపుతున్నారు. ఉపాసన కూడా ఇంటి సభ్యులతో కలిసి కూతురు ఆలనా పాలన చూస్తున్నారు. క్లీంకార వచ్చిన తర్వాత మెగా కుటుంబంలో నెలకొన్న ఆనందం, ఉల్లాసం వర్ణనాతీతం. ఉపాసన తాజా వ్యాఖ్యలు నిజమై, త్వరలోనే రామ్ చరణ్-ఉపాసన దంపతులు మరోసారి శుభవార్త చెబితే, మెగా అభిమానుల ఆనందానికి అవధులు ఉండవు.