Krishnam Raju Birthday Anniversary: కృష్ణంరాజు' గారికి 'రెబల్ స్టార్' అనే పేరు ఎలా వచ్చిందో తెలుసా..?

Krishnam Raju Birthday Anniversary: టాలీవుడ్ రెబల్ స్టార్, మాజీ కేంద్ర మంత్రి కృష్ణంరాజు జయంతి సందర్భంగా, ఆయన కుటుంబ సభ్యులు, అభిమానులు మరోసారి ఆయనను స్మరించుకుంటున్నారు. కృష్ణం రాజు జనవరి 20, 1940న ఆంధ్రప్రదేశ్‌లోని మొగల్తూరులో జన్మించారు. హీరోగా నటిస్తున్న సినిమాలో మరో హీరో కనిపిస్తే తమ ఇమేజ్ తగ్గిపోతుందేమో అని చాలామంది నటులు భయపడుతుంటారు. అలాగే ఇతర హీరోల సినిమాల్లో చిన్న పాత్రలు చేయడానికి కూడా వెనకడుగు వేస్తుంటారు. కానీ కృష్ణంరాజు మాత్రం ఇందుకు పూర్తి భిన్నం. “డ్యూయెట్లు పాడితేనే హీరో కాదు, ఫైట్లు చేస్తేనే స్టార్ కాదు” అని నమ్మిన అరుదైన నటుడు ఆయన.

అందుకే సుమారు 180కు పైగా సినిమాల్లో నటించిన కృష్ణంరాజు, వాటిలో 40కిపైగా సినిమాల్లో ఇతర స్టార్ హీరోలతో కలిసి నటించారు. ఇది అప్పట్లో ఒక పెద్ద సాహసమే. ఈతరం హీరోలతోనూ తెర పంచుకున్న స్టార్ కృష్ణంరాజు.. కృష్ణంరాజు తన తరం నటులతోనే కాకుండా, తరువాతి తరాల హీరోలతో కూడా కలిసి నటించారు. తన నట వారసుడు ప్రభాస్‌తో ‘బిల్లా’, ‘రెబల్’, ‘రాధేశ్యామ్’ సినిమాల్లో కీలక పాత్రలు పోషించారు.

Smt. Shyamala Uppalapati garu invites everyone to be a part of this #UKIndiaDFF free special medical camp on diabetes, held in memory of Rebel Star Shri #KrishnamRaju Garu.

Tomorrow at Srirastu Function Hall, Dendukuru, Madhira, Khammam pic.twitter.com/Qo6AWX4Axe

— Suresh PRO (@SureshPRO_) January 19, 2026

అలాగే,

• కృష్ణతో కురుక్షేత్రం, ఇంద్రభవనం
• ఎన్టీఆర్ తో మనుషుల్లో దేవుడు, వాడే వీడు
• ఏఎన్నార్ తో  జై జవాన్
• చిరంజీవితో మన ఊరి పాండవులు
• మోహన్‌బాబు, బాలకృష్ణ, వెంకటేశ్, నాగార్జున, జగపతిబాబు, రాజశేఖర్ వంటి హీరోల సినిమాల్లో కూడా ముఖ్య పాత్రలు చేశారు.
  
  ఇది ఆయనకు ఉన్న ఆత్మవిశ్వాసానికి నిదర్శనం.

సినీ ప్రవేశం - మొదటి అడుగు

1966లో ‘చిలకా గోరింక’ సినిమాతో కృష్ణంరాజు తెలుగు సినిమా రంగంలోకి అడుగుపెట్టారు. అప్పటికే వంద సినిమాలు చేసిన నటి కృష్ణకుమారి ఆయన సరసన నటించడం విశేషం. ఆ సినిమా ఆశించిన విజయం సాధించకపోవడంతో, సినిమా రంగాన్ని వదిలేయాలని కూడా అనుకున్నారట. అలాంటి సమయంలో దర్శక, నిర్మాత ఎల్వీ ప్రసాద్ గారు ఇచ్చిన ప్రోత్సాహమే ఆయనను మళ్లీ నిలబెట్టింది.

Krishnam Raju Movies List (188 Movies)

రెబల్ స్టార్ అనే పేరు ఎలా వచ్చింది?

‘కటకటాల రుద్రయ్య’ వంటి సినిమాల్లో చేసిన పాత్రలు ఆయనకు ప్రత్యేక గుర్తింపు తెచ్చాయి. ఆ పాత్రలలో ఉండే ధైర్యం, తిరుగుబాటు స్వభావం వల్లే ఆయనకు “రెబల్ స్టార్” అనే బిరుదు వచ్చింది. నేడు ప్రభాస్‌ను రెబల్ స్టార్ అంటున్నా, అసలైన రెబల్ స్టార్ కృష్ణంరాజే అని చెప్పడంలో సందేహం లేదు.

పుస్తకాలు - సినిమాలపై ప్రేమ

కృష్ణంరాజుకు పుస్తకాలు చదవడం అంటే చాలా ఇష్టం. ఖాళీ దొరికితే ఏదో ఒక పుస్తకం చదివేవారు. ఆ కథల్లోని పాత్రలను సినిమాలుగా తీయాలనే కోరిక ఉండేది. కానీ అలాంటి కథలకు నిర్మాతలు దొరకడం కష్టం అనిపించడంతో, ఆయన స్వయంగా ‘గోపీకృష్ణా మూవీస్’ అనే నిర్మాణ సంస్థను ప్రారంభించి నిర్మాతగా మారారు.

వ్యక్తిగత జీవితం 

కృష్ణంరాజు మొదట సీతాదేవిని వివాహం చేసుకున్నారు. దురదృష్టవశాత్తు ఆమె రోడ్డు ప్రమాదంలో మరణించారు. వారికి పుట్టిన కుమారుడు కూడా అనారోగ్య కారణాలతో చిన్న వయసులోనే మృతి చెందాడు. ఈ సంఘటనలు ఆయన జీవితంలో తీవ్ర విషాదాన్ని మిగిల్చాయి. కొంతకాలానికి పెద్దల ఒత్తిడితో శ్యామలాదేవితో రెండో వివాహం జరిగింది. ఇద్దరి మధ్య 28 ఏళ్ల వయస్సు తేడా ఉన్నప్పటికీ, అది ఎప్పుడూ సమస్యగా అనిపించలేదని శ్యామలాదేవి ఓ ఇంటర్వ్యూలో తెలిపారు. ఈ దంపతులకు ముగ్గురు కుమార్తెలు ఉన్నారు.

చిరంజీవి సినిమా కథతో జరిగిన మోసం

ఒకసారి కృష్ణంరాజు ఒక కొత్త సినిమా కథ విన్నారు. అది బాగా నచ్చడంతో సినిమా ప్రారంభానికి సిద్ధమయ్యారు. కానీ ఆ కథ నిజానికి చిరంజీవి నటించిన ‘కిరాతకుడు’ సినిమా కథ అని తరువాత తెలిసింది. రైటర్ అదే కథను కొత్తగా చెప్పాడని తెలుసుకుని కృష్ణంరాజు చాలా బాధపడ్డారు. అయినా సరే, వెనక్కి తగ్గకుండా మరో కథతో సినిమా చేశారు.

రాజకీయ జీవితం

సినిమాలతో పాటు రాజకీయాల్లో కూడా కృష్ణంరాజు చురుకుగా పాల్గొన్నారు. భారతీయ జనతా పార్టీ తరఫున లోక్‌సభ సభ్యుడిగా ఎన్నికయ్యారు. తర్వాత అటల్ బిహారీ వాజపేయి మంత్రివర్గంలో కేంద్ర మంత్రి కూడా అయ్యారు. తరువాత రాజకీయాల నుంచి దూరమయ్యారు.

చివరి ప్రయాణం

అనారోగ్య కారణాలతో 2022 సెప్టెంబర్ 11న, 82 ఏళ్ల వయసులో కృష్ణంరాజు కన్నుమూశారు. కానీ ఆయన చేసిన పాత్రలు, ఆయన చూపిన ధైర్యం, నిజాయితీ మాత్రం తెలుగు ప్రేక్షకుల గుండెల్లో ఎప్పటికీ నిలిచిపోతాయి. హీరో ఇమేజ్ కంటే పాత్రకు విలువ ఇచ్చిన నటుడు కృష్ణంరాజు. తనకంటే చిన్న హీరోలతోనూ తెర పంచుకున్న గొప్ప మనసు ఆయనది. అందుకే ఆయన కేవలం నటుడు కాదు… తెలుగు సినిమా చరిత్రలో ఒక అధ్యాయం.