Mysaa First Glimpse: ఒళ్ళు గగుర్పొడిచేలా.. రష్మిక 'మైసా' ఫస్ట్ గ్లింప్స్.. మీరూ చూసేయండి..!

Mysaa First Glimpse: నేషనల్ క్రష్ రష్మిక మందన్నా(Rashmika Mandanna) ప్రధాన పాత్రలో నటిస్తున్న కొత్త సినిమా మైసా (Mysaa) టీజర్ తాజాగా విడుదలైంది. ఈ సినిమా రష్మిక కెరీర్‌లోనే ఇప్పటివరకు చూడని విధంగా, చాలా శక్తివంతమైన పాత్రలో ఆమె కనిపించనుందని టీజర్ చూస్తే అర్థమవుతోంది. ఈ చిత్రంతో రవీంద్ర పుల్లే దర్శకుడిగా పరిచయం అవుతున్నారు. యూన్‌ఫార్ములా ఫిల్మ్స్ బ్యానర్‌పై ఈ సినిమాను పాన్ ఇండియా స్థాయిలో రూపొందిస్తున్నారు.

టీజర్ ఒక మహిళ వాయిస్‌తో ప్రారంభమవుతుంది. ఆమె తన కూతురిలో ఉన్న కోపం, బాధ గురించి చెబుతూ “ఆమె పేరును ప్రపంచం గుర్తుంచుకోవాలి” అని చెప్పే డైలాగ్ టీజర్‌కు హైలైట్ గా ఉంది. ప్రతి ఫ్రేమ్‌లో ఎమోషన్స్, వయోలెన్స్ స్పష్టంగా కనిపిస్తున్నాయి.

మైసా పాత్రలో రష్మిక పూర్తిగా కొత్తగా కనిపించింది. ఆమె నటనలో ఆగ్రహం, ధైర్యం చాలా పవర్ఫుల్ గా కనిపించాయి. టీజర్ చివర్లో ఆమె చేసే గర్జన ఆ పాత్రలో ఉన్న శక్తిని చూపిస్తుంది. జీవితంలో ఎదురైన బాధలు, కష్టాల నుంచి రూపుదిద్దుకున్న మహిళగా మైసా పాత్రను చూపించారు. ఎవరికీ లొంగని స్వభావం, ఎదురొడ్డి నిలబడే ధైర్యం ఈ పాత్రలో ప్రధానంగా కనిపిస్తాయి.

ఈ సినిమా సాధారణ హీరోయిన్ కథలా కాకుండా, బలమైన మహిళ కథగా నిలవనుందని టీజర్ చూస్తే తెలుస్తోంది. ఈ పాత్ర ద్వారా రష్మిక కొత్త రకమైన పాత్రలను చేయగలదని మరోసారి నిరూపించింది.

దర్శకుడు రవీంద్ర పుల్లే రాసిన కథ, తెరకెక్కించిన విధానం టీజర్‌ను మరింత ప్రభావవంతంగా చేసింది. సినిమాటోగ్రాఫర్ శ్రేయాస్ పి కృష్ణ విజువల్స్‌కు బలమైన ఫీల్ ఇచ్చారు. జేక్స్ బిజోయ్ అందించిన సంగీతం టీజర్‌లో టెన్షన్‌ను పెంచుతుంది.

మైసా సినిమా రష్మిక కెరీర్‌లో ఒక కీలక మలుపుగా మారే అవకాశాలు కనిపిస్తున్నాయి. ఈ సినిమాలో ఆమె చూపించబోయే కొత్త రూపం ప్రేక్షకులను ఆశ్చర్యపరచనుందని టీజర్ స్పష్టంగా చెబుతోంది.