Akhanda 2 Collections: బాలయ్య మాస్ తాండవం.. అఖండ 2 నైజాం రికార్డుల మోత..!

Akhanda 2 Collections: నందమూరి బాలకృష్ణ(Balakrishna), బోయపాటి శ్రీను(Boyapati Srinu) కాంబినేషన్‌కు టాలీవుడ్‌లో ప్రత్యేక క్రేజ్ ఉంటుందని అందరికీ తెలిసిందే. ఈ ఇద్దరూ కలిసి చేసిన ప్రతి సినిమా మాస్ ప్రేక్షకుల్లో పెద్ద హైప్‌ను సృష్టిస్తుంది. అదే హైప్‌తో అఖండ 2 - తాండవం ప్రపంచ వ్యాప్తంగా నిన్న రాత్రి జరిగిన పెయిడ్ ప్రీమియర్స్‌తో ప్రేక్షకుల ముందుకు వచ్చింది. నేడు సినిమా రెగ్యులర్‌గా థియేటర్లలో విడుదలైంది.

నైజాం ప్రీమియర్ కలెక్షన్స్..

పెయిడ్ ప్రీమియర్స్‌కు టికెట్ రేట్లు రూ. 600 వరకు ఉండటంతో కొంతమంది ఆశ్చర్యపోయినా, థియేటర్ల వద్ద ప్రేక్షకుల సందడి ఏ మాత్రం తగ్గలేదు. ముఖ్యంగా నైజాం ప్రాంతంలో సినిమా కలెక్షన్లు చాలా బలంగా వచ్చాయి. అందుబాటులో ఉన్న అంచనా ప్రకారం, నైజాం ప్రీమియర్స్ లోనే సినిమా సుమారు రూ. 2.3 కోట్లు వసూలు చేసినట్లు తెలుస్తోంది. 

అదేవిధంగా, ఆంధ్రప్రదేశ్, తెలంగాణలో కలిపి వచ్చిన ప్రీమియర్ షో కలెక్షన్లు సులభంగా రూ. 5 కోట్ల మార్క్‌ను దాటుతాయని ట్రేడ్ వర్గాలు చెబుతున్నాయి. అయితే, ఖచ్చితమైన సంఖ్యను మాత్రం సినిమా బృందం అధికారికంగా ప్రకటించిన తర్వాతే చెప్పగలం.

అఖండ 2 డివోషనల్, మాస్ యాక్షన్ కలయికతో రూపొందించిన భారీ పాన్-ఇండియా సినిమా. అదనంగా 3D వెర్షన్ కూడా రావడంతో ప్రేక్షకుల్లో ఆసక్తి మరింత పెరిగింది. సినిమాలో సమ్యుక్త, ఆదీ పినిశెట్టి, హర్షాలి మల్హోత్రా, పూర్ణ, కబీర్ దువాన్ సింగ్ వంటి నటులు ముఖ్య పాత్రల్లో కనిపించారు. రామ్ అచంట, గోపీ అచంట ఈ చిత్రాన్ని నిర్మించగా, తమన్ సంగీతం అందించారు. ముఖ్యంగా తమన్ అందించిన బ్యాక్‌గ్రౌండ్ స్కోర్ సినిమాకు పెద్ద హైలైట్‌గా నిలిచింది.

ఈ ప్రీమియర్ కలెక్షన్లు చూస్తుంటే, బాలయ్య-బోయపాటి కాంబినేషన్ మరోసారి భారీ హిట్ అందుకునట్టే కనిపిస్తోంది. సినిమా థియేటర్లలోకి వచ్చిన మొదటి రోజే ఇలాంటి రెస్పాన్స్ రావడంతో, ప్రారంభ వారాంతం కలెక్షన్లు కూడా మరింత బలంగా ఉండే అవకాశాలు ఉన్నాయి.

మొత్తానికి, అఖండ 2 నైజాం ప్రీమియర్స్‌తోనే బాక్సాఫీస్‌పై శక్తివంతమైన అడుగు వేసింది. ఇక రెగ్యులర్ షోలతో ప్రేక్షకులు ఎలా స్పందిస్తారు అన్నది వచ్చే కొన్ని రోజుల్లో తెలుస్తుంది.