Hyderabad Traffic: జాగ్రత్త.. ఇకపై వీడియో రూపంలో ట్రాఫిక్ చలాన్లు..

హైదరాబాద్ ట్రాఫిక్ గురించి ప్రత్యేకంగా చెప్పాల్సిన అవసరం లేదు. బిజిబిజీ జీవితాలతో రోడ్లన్నీ రద్దీగా ఉంటాయి. ఈ క్రమంలోనే చాలామంది ట్రాఫిక్ నిబంధనలను ఉల్లంఘిస్తుంటారు. సిగ్నల్ పడినా ఆగకపోవడం, హెల్మెట్ ధరించకపోవడం, రాంగ్‌రూట్‌లో వెళ్లడం లాంటివి నిత్యం నగరంలో ఎక్కడో ఓ చోట జరుగుతూనే ఉంటాయి. ఇక ట్రాఫిక్ రూల్స్‌ను మరింత కఠినతరం చేసేందుకు హైదరాబాద్, సైబరాబాద్ ట్రాఫిక్ పోలీసులు మరో ముందడుగు వేశారు. ట్రాఫిక్ నిబంధనలను ఉల్లంఘించిన వాహనాదారులకు వీడియో ఆధారిత చలాన్లను ప్రారంభించారు. ఇంతకుముందు ట్రాఫిక్ చలాన్లకు కేవలం ఫొటోలను మాత్రమే జత చేసేవారు. అయితే ఇప్పుడు అధికారిక వెబ్‌సైట్‌లో ట్రాఫిక్ ఉల్లంఘించిన వీడియోలు కూడా కనిపిస్తున్నాయి. అయితే ఈ విధానాన్ని ఇటీవలే ప్రారంభించామని.. ఇలా వీడియోల రూపంలో వాహనాదారులకు వారి ట్రాఫిక్ ఉల్లంఘనలు చూపించడం మరింత స్పష్టంగా కనిపిస్తోందని తెలిపారు.

ఇంతకుముందు సిగ్నల్ జంప్ చేసి వెళ్లడం, హైస్పీడ్ లాంటి ట్రాఫిక్ ఉల్లంఘనలు ఫొటోల్లో క్యాప్చర్ అయ్యేవి కావని.. ఇలాంటి సందర్భాల్లో ఇలా వీడియోలు రికార్డు కావడం అనేది చాలా ఉపయోగకరంగా ఉంటోందని హైదరాబాద్ ట్రాఫిక్ పోలీస్ అడిషనల్ కమిషనర్ సుధీర్ బాబు తెలిపారు. అయితే ట్రాఫిక్ ఉల్లంఘన వీడియోలను ట్రాఫిక్ పోలీస్ రికార్డు చేస్తారు. అలాగే సీసీటీవీ కెమెరాల్లో కూడా ఇవి రికార్డు అవుతాయి. అతివేగంగా అలాగే సెల్‌ఫోన్ మాట్లాడుతూ వాహనాలు నడపడం, సరైన నంబర్ ప్లేట్ లేకపోవడం, రాంగ్‌రూట్లో డ్రైవింగ్ చేయడం, అనుమతిలేని స్థలాల్లో పార్కింగ్ చేయడం లాంటి ట్రాఫిక్ ఉల్లంఘనలు వీడియోరూపంలో రికార్డు అవుతాయని పోలీసులు తెలిపారు. ట్రాఫిక్‌పై మరింత దృష్టి సాధించేందుకే ఈ విధానాన్ని అమలుచేస్తున్నామని పేర్కొన్నారు.