Vijayawada : విజయవాడలో మావోయిస్టుల కలకలం!

విజయవాడ సమీపంలోని కానూరు ప్రాంతంలో మావోయిస్టుల సంచారం కలకలం సృష్టించింది. ఈ ప్రాంతంలో సుమారు 10 మంది మావోయిస్టులు రహస్యంగా సమావేశమయ్యారనే విశ్వసనీయ సమాచారం  NSG అధికారులకు అందింది. సమాచారం అందుకున్న వెంటనే, ఎటువంటి అవాంఛనీయ సంఘటనలు జరగకుండా అధికారులు అప్రమత్తమయ్యారు. భారీ సంఖ్యలో పోలీసులు, ప్రత్యేక దళాలైన గ్రే హౌండ్స్ దళాలతో కలిసి NSG అధికారులు కానూరు ప్రాంతంలో భారీ ఆపరేషన్ చేపట్టారు.

నలుగురు మావోయిస్టులను

ఈ ఆపరేషన్‌లో భద్రతా బలగాలు నలుగురు మావోయిస్టులను చాకచక్యంగా అదుపులోకి తీసుకున్నారు. మిగిలిన ఆరుగురు మావోయిస్టులు పోలీసుల రాకను గుర్తించి అటవీ ప్రాంతంలోకి లేదా సమీప ప్రాంతంలోకి పరారైనట్లు సమాచారం. పరారైన మావోయిస్టుల కోసం పోలీసులు గాలింపు చర్యలను మరింత ముమ్మరం చేశారు. అదుపులోకి తీసుకున్న నలుగురు మావోయిస్టులను మరింత లోతుగా విచారించేందుకు టాస్క్ ఫోర్స్ కార్యాలయానికి తరలించారు. వీరి నుంచి కీలక సమాచారం రాబట్టే అవకాశం ఉందని పోలీసులు భావిస్తున్నారు. ఈ పరిణామంతో విజయవాడ పరిసర ప్రాంతాల్లో భద్రతను మరింత కట్టుదిట్టం చేశారు.