Annavaram Temple: అన్నవరంలో వైభవంగా 'మెట్లోత్సవం'

Annavaram Temple: కాకినాడ జిల్లా అన్నవరంలోని శ్రీ వీరవెంకట సత్యనారాయణ స్వామి ఆలయంలో సోమవారం మెట్ల ఉత్సవం అత్యంత భక్తిశ్రద్ధలతో నిర్వహించారు. ధనుర్మాసం ప్రారంభం సందర్భంగా జరిగే ఈ కార్యక్రమానికి విశేషమైన ఆధ్యాత్మిక ప్రాధాన్యం ఉంది. స్వామివారి దర్శనానికి నడిచివెళ్లే భక్తులకు తోడ్పడే మెట్లను స్మరించుకుంటూ ఏడాదికి ఒకసారి ఈ ఉత్సవాన్ని దేవస్థానం ఘనంగా నిర్వహిస్తుంది.

ఉదయం 7 గంటలకు సత్యదేవుడు, అనంతలక్ష్మి అమ్మవార్లను కొండపై ఉన్న ఆలయం నుంచి దిగువకు తీసుకొచ్చారు. గ్రామంలో స్వామి, అమ్మవార్లతో గ్రామోత్సవం నిర్వహించారు. అనంతరం ఉదయం 9 గంటలకు తొలిపావంచా వద్ద పల్లకీలో స్వామి, అమ్మవార్లను కూర్చోబెట్టారు. అక్కడ వైదిక పండితుల ఆధ్వర్యంలో గణపతి పూజ, పుణ్యాహవచనం నిర్వహించారు. తరువాత అష్టోత్తర శతనామాలతో అర్చన చేసి, వేదపండితులు మహా ఆశీర్వచనం అందించారు.

తొలి మెట్టుకు దేవస్థానం ఈవో వేండ్ర త్రినాథరావు దంపతులు ప్రత్యేక పూజలు చేశారు. మెట్లకు పసుపు, కుంకుమ పూసి పుష్పార్చన చేసి హారతులు ఇచ్చారు. అక్కడి నుంచి ప్రధాన ఆలయం వరకు స్వామి, అమ్మవార్లను పల్లకీలో తీసుకువచ్చారు.

ఈ సందర్భంగా మహిళా భక్తులు పెద్ద సంఖ్యలో పాల్గొన్నారు. మెట్లకు పూజలు చేస్తూ, హారతులు ఇస్తూ ఆనందంగా ముందుకు సాగారు. ఈ కార్యక్రమంలో పాల్గొన్న మహిళలకు దేవస్థానం ప్రత్యేక దర్శన సౌకర్యం కల్పించింది. భక్తుల భక్తిశ్రద్ధతో మెట్ల మార్గం మొత్తం ఆధ్యాత్మిక వాతావరణంతో నిండిపోయింది.

ఈ వైదిక కార్యక్రమాలను ప్రధాన అర్చకులు ఇంద్రగంటి నరసింహమూర్తి, చామర్తి కన్నబాబు, పాలంకి చిన్న పట్టాభి తదితరులు నిర్వహించారు. దేవస్థానం చైర్మన్ ఐవీ రోహిత్‌తో పాటు ఇతర అధికారులు కూడా ఈ వేడుకలో పాల్గొన్నారు.

మంగళవారం నుంచి ధనుర్మాసం పూర్తయ్యే వరకు ప్రతిరోజూ స్వామి, అనంతలక్ష్మి అమ్మవార్లకు గ్రామంలో వెండి పల్లకీపై గ్రామోత్సవం నిర్వహించనున్నారు. శ్రీమహావిష్ణు స్వరూపుడైన సత్యదేవుడు తమ వీధుల గుండా వెళ్తుండటంతో గ్రామ ప్రజలు హారతులు ఇస్తూ ఆనందంగా స్వామివారిని దర్శించుకుంటున్నారు.

లక్షలాది భక్తులు నడిచి వచ్చే ఈ మెట్లకు ప్రత్యేక పండుగ జరపడం అన్నవరంలో ఎన్నో ఏళ్లుగా కొనసాగుతున్న సంప్రదాయం. ఈ మెట్ల ఉత్సవం భక్తులకు మరింత భక్తి, విశ్వాసాన్ని పెంచే పర్వదినంగా నిలుస్తోంది.