పాకిస్థాన్‌లో మరోసారి ఉగ్రదాడులు.. వైమానిక స్థావరంలోకి చొరబడ్డ ముష్కరులు

పాకిస్థాన్‌లో వరుసగా ఉగ్రదాడులు జరుగుతున్నాయి. తాజాగా శనివారం ఉదయం పంజాబ్‌ ప్రావిన్స్‌లోని మియన్వాలి ప్రాంతంలో వైమానిక స్థావరంపై ఉగ్రదాడులు జరిగాయి. ఈ దాడులకు తమ బాధ్యతేనని తెహ్రీక్ ఇ జిహాద్‌ ఉగ్రసంస్థ ప్రకటించింది. ఫైటర్ జెట్లు ఉన్న స్థావంరంలోకి పలువురు ఉగ్రవాదులు చొరబడ్డారు. అయితే ఈ దాడులను ప్రతిఘటించిన పాక్ సైన్యం ముగ్గురు ముష్కరుల్ని హతం చేసింది. అలాగే మరో ముగ్గుర్ని నిర్బంధంలోకి తీసుకున్నట్లు తెలిపింది. ఈ దాడులు జరిగే సమయానికి తమ భద్రతా బలగాలు వెంటనే అప్రమత్తమై వారి కుట్రల్ని భగ్నం చేసినట్లు పేర్కొంది.

ఇక ఈ దాడుల్లో మూడు యుద్ధ విమానాలు, ఓ ఇంధన ట్యాంకర్ ధ్వంసమయ్యాయని.. ప్రస్తుతం దీనికి సంబంధించి ఆపరేషన్ కొనసాగుతోందని తెలిపింది. అయితే భద్రతా సిబ్బందికి సంబంధించి ప్రాణనష్టం గురించి చెప్పలేదు. ఇదిలా ఉండగా.. ఈ దాడికి బాధ్యత వహించిన తేహ్రీక్ ఇ జిహాద్ ఉగ్రవాద సంస్థ ఈ ఏడాది జులైలో కూడా బలోచిస్తాన్‌లోని సైనిక స్థావరంపై దాడులు చేసింది. ఈ ఘటనలో 12 మంది పాక్ సైనికులు ప్రాణాలు కోల్పోయారు.

Also Read: భారీ భూకంపం.. 128కి చేరిన మృతుల సంఖ్య

Also read: మహిళా రిజర్వేషన్ బిల్లు అంశంలో అలా చేయడం కష్టమే: సుప్రీంకోర్టు