Crime: మూడోసారి కూడా ఆడపిల్ల పుట్టిందని..నోట్లో పొగాకు కుక్కి!

మూడోసారి కూడా ఆడపిల్లే (Baby Girl) పుట్టడంతో ఆ కన్నతండ్రి మనసు కర్కశంగా తయారైంది. పుట్టి ఎనిమిది రోజులు అయినా కాకముందే..ఆ బిడ్డ నోటిలో పొగాకు కుక్కి అత్యంత కిరాతకంగా హత్య చేశాడు. అంతటితో ఆగకుండా ఆ బిడ్డని ఖననం కూడా చేశాడు. ఆశా కార్యకర్త చేసిన ఫిర్యాదు మేరకు ఈ విషయం వెలుగులోకి వచ్చింది.

అసలేం జరిగిందంటే..మహారాష్ట్ర (Maharashtra) లోని జల్‌గావ్‌ జిల్లాలోని హరినగర్‌ తండాలో గోకుల్ జాదవ్‌ (30) అనే వ్యక్తికి ఇప్పటికే ఇద్దరు ఆడపిల్లలు ఉన్నారు. అయితే అతని భార్య మరోసారి ఆడపిల్లకు జన్మనిచ్చింది. అది నచ్చని గోకుల్‌ ఎలాగైనా ఆ పాపని వదిలించుకోవాలనుకున్నాడు.

అనుకున్నదే తడవుగా..ఆ బిడ్డను చంపేయడానికి ప్రయత్నాలు మొదలుపెట్టాడు. 8 రోజుల బిడ్డ, కన్న బిడ్డ అనే కనికరం లేకుండా పాప నోట్లో పొగాకు (Tobaco) కుక్కాడు. దీంతో ఊపిరి ఆడక పాప చనిపోయింది. దీంతో పాపని తీసుకుని వెళ్లి ఖననం చేశాడు. గోకుల్‌ దంపతులకు బిడ్డ పుట్టిన విషయం తెలుసుకున్న స్థానిక ఆశావర్కర్‌ బిడ్డ జనన వివరాలు నమోదు చేసుకునేందుకు నిందితుల ఇంటికి వెళ్లింది.

అయితే బిడ్డ చనిపోయిందని కుటుంబ సభ్యులు తెలిపారు. పాప ఎలా చనిపోయిందని ఆరా తీయగా..అసలు విషయం వెలుగులోకి వచ్చింది. దీంతో ఆమె పోలీసులుకు ఫిర్యాదు చేశారు. దీంతో పోలీసులు నిందితుని ఇంటి వద్దకు చేరుకొని అదుపులోనికి తీసుకుని విచారణ చేపట్టగా నిందితుడు నేరాన్ని అంగీకరించాడు.

పోలీసులు నిందితుడ్ని అరెస్ట్‌ చేసి స్థానిక పోలీసు స్టేషన్‌ కు తరలించారు. పాప శరీరాన్ని బయటకు తీసి పోస్టుమార్టం నిమిత్తం ఆసుపత్రికి తరలించారు.

అంతరిక్షంలోని అణువణువు తెలుసుకుంటున్న కాలంలో కూడా ఆడపిల్ల పుట్టిందని చంపేయడం దారుణమైన విషయం. అన్ని రంగాల్లో ఆడ మగ సమానం అంటున్నప్పటికీ కూడా ఇలాంటి దారుణ ఘటనలు చోటు చేసుకోవడం సిగ్గు చేటు.