Rain Alert:మిచౌంగ్ ప్రభావంతో జలదిగ్బంధంలో చెన్నై మహా నగరం..!!

మిచౌంగ్ తుఫాన్ కారణంగా గత వారం రోజులుగా చెన్నైమహానగరంలో కుండపోత వర్షాలు కురుస్తున్నాయి. ఎడతెరపు లేకుండా కురుస్తున్న వర్షానికి చెన్నై జలదిగ్భంధం అయ్యింది. చాలా ప్రాంతాల్లో నీరు నిలిచిపోయింది. 5 నుంచి 6 అడుగుల మేర రోడ్లపై వరద నీరు ప్రవహిస్తోంది. ఇళ్లలో నుంచి బయటకు వచ్చేందుకు జనం భయపడుతున్నారు. మిచౌంగ్ తుఫాను చెన్నై, పరిసర ప్రాంతాలలో ప్రజల జీవనంతో పాటు పరిశ్రమలను ప్రభావితం చేసింది. మిచౌంగ్ తుఫాను కారణంగా తమిళనాడులో తమ తయారీ కార్యకలాపాలను ఆటో మొబైల్ కంపెనీ హ్యుందాయ్‌తో పాటు ఐఫోన్ తయారీ కంపెనీలు ఫాక్స్‌కాన్, పెగాట్రాన్‌తో సహా అనేక విభిన్న కంపెనీలు నిలిపివేశాయి. మిచౌంగ్ తుఫాను తమిళనాడు రాజధాని చెన్నై, దాని పరిసర ప్రాంతాల్లో విధ్వంసం సృష్టించింది. దీంతో నగరంలో నీటి ఎద్దడితో పాటు విమానాలు, రైళ్ల రాకపోకలకు తీవ్ర అంతరాయం ఏర్పడింది.

కార్యకలాపాలను తాత్కాలికంగా నిలిపివేత:
చెన్నై, చుట్టుపక్కల ఉన్న చాలా ఫ్యాక్టరీలు తాత్కాలికంగా కార్యకలాపాలను నిలిపివేసాయి. హ్యుందాయ్ మోటార్ ఇండియా ప్రతినిధి మాట్లాడుతూ, చెన్నై, పరిసర జిల్లాలలో ప్రస్తుతం ఉన్న తుఫాను పరిస్థితుల కారణంగా, హ్యుందాయ్ మోటార్ ఇండియా యొక్క శ్రీపెరంబుదూర్ యూనిట్‌లోని ఫ్యాక్టరీ కార్యకలాపాలు నిలిపివేసినట్లు తెలిపారు.

జనజీవనం అస్తవ్యస్తం:
ఎడతెరిపి లేకుండా కురుస్తున్న వర్షాల కారణంగా నగరంలోని పలు ప్రాంతాల్లో నీటి ఎద్దడి ఏర్పడి, 2015లో సంభవించిన వరదలు పునరావృతమవుతాయోమోననే భయాందోళనలు నెలకొన్నాయి. వర్షం కారణంగా ప్రజలు తాగునీరు, ఇతర నిత్యావసర సరుకుల కోసం పరుగులు తీయాల్సి వస్తోంది. ఈదురు గాలులతో కూడిన కుండపోత వర్షం కారణంగా నగరంలోని పలు ప్రాంతాల్లో విద్యుత్‌ స్తంభించి ఇంటర్నెట్‌ సేవలకు అంతరాయం ఏర్పడింది. ప్రతికూల వాతావరణాన్ని దృష్టిలో ఉంచుకుని ఎయిర్ ఇండియా తన అన్ని విమానాలను నిలిపివేసింది.

తమిళనాడులో కురుస్తున్న భారీ వర్షాల నేపథ్యంలో సోమవారం చెన్నై నుంచి 33 విమానాలను ఇక్కడి కెంపేగౌడ అంతర్జాతీయ విమానాశ్రయానికి (కిఐఏ) మళ్లించారు. ఇండిగో, స్పైస్‌జెట్, ఎతిహాద్, లుఫ్తాన్స, గల్ఫ్ ఎయిర్‌లకు చెందిన దేశీయ, అంతర్జాతీయ విమానాలను చెన్నై నుండి బెంగళూరుకు మళ్లించినట్లు KIA నిర్వహిస్తున్న బెంగళూరు ఇంటర్నేషనల్ ఎయిర్‌పోర్ట్ లిమిటెడ్ (BIAL) అధికారులు తెలిపారు. చెన్నైలో పలు విమానాలు రద్దు అయ్యాయి. నిరంతరాయంగా కురుస్తున్న వర్షాల కారణంగా విమానాశ్రయానికి వెళ్లే 70 విమానాలు రద్దు చేయబడ్డాయి.

ఇది కూడా చదవండి: రోజూ గ్రీన్ కాఫీ తాగుతే…డయాబెటిస్ నుంచి కొలెస్ట్రాల్ వరకు ఈ 5 వ్యాధులకు చెక్…!!