Telangana: గ్రూప్‌-1 ప్రిలిమినరీ పరీక్షకు రికార్డుస్థాయిలో హాజరు.. ఎంత శాతం పెరిగిందంటే!

TGPSC: తెలంగాణలో టీజీపీఎస్సీ జూన్ 9న నిర్వహించిన గ్రూప్ 1 ప్రిలిమినరీ పరీక్షకు రికార్డు స్థాయిలో అభ్యర్థులు హాజరయ్యారు. గతంలో జరిగిన పరీక్షతో పోలిస్తే ఈసారి ఏకంగా 12.63 శాతం పెరిగినట్లు అధికారులు తెలిపారు. ఈ పరీక్షకు 4.03 లక్షల మంది దరఖాస్తు చేసుకోగా 3.02లక్షల మంది పరీక్ష రాశారు. మొత్తంగా 74 శాతం హాజరు నమోదైంది. గతంలో రద్దయిన రెండు ప్రిలిమినరీ పరీక్షలను పరిగణనలోకి తీసుకుంటే సంఖ్యాపరంగా మూడు లక్షలకు మందికి పైగా అభ్యర్థులు గ్రూప్‌-1 పరీక్షకు హాజరయ్యారని వెల్లడించారు.

మూడోసారికి గణనీయంగా పెరిగిన శాతం..
ఇక పాతగ్రూప్‌-1 ప్రకటన రద్దుచేసిన టీజీపీఎస్సీ కమిషన్‌ 60 అదనపు పోస్టులు కలిపి 563 పోస్టులతో కొత్త నోటిఫికేషన్ రిలీజ్ చేసింది. మొదట 503 పోస్టులతో గ్రూప్‌-1 ఉద్యోగ ప్రకటన వెలువడగా.. 3.8 లక్షల మంది దరఖాస్తు చేశారు. 2022 అక్టోబరు 16న ప్రిలిమినరీ పరీక్ష నిర్వహించగా 75 శాతం హాజరుతో 2.86 లక్షల మంది పరీక్ష రాశారు. అయితే ప్రశ్నపత్రాల లీకేజీ కారణంగా ఈ పరీక్ష రద్దయింది. దంతో తెలంగాణ పబ్లిక్‌ సర్వీస్‌ కమిషన్‌ గతేడాది జూన్‌ 11న రెండోసారి ప్రిలిమినరీ నిర్వహించింది. కానీ ఈ పరీక్షకు హాజరు గణనీయంగా 61.37శాతానికి పడిపోయింది. కేవలం 2.33 లక్షల మంది పరీక్షకు హాజరయ్యారు.

ఇదిలా ఉంటే.. ఇప్పటికే గ్రూప్‌-4 మెరిట్‌ జాబితా వెల్లడించిన కమిషన్‌ త్వరలో ప్రభుత్వ విభాగాల్లో 1,540 అసిస్టెంట్‌ ఎగ్జిక్యూటివ్‌ ఇంజినీర్‌ పోస్టుల తుది ఫలితాలు ఇవ్వనుంది. ఈ పోస్టులకు అభ్యర్థుల ధ్రువీకరణ పత్రాల పరిశీలన పూర్తి కాగా త్వరలో ఎంపిక జాబితా వెల్లడించాలని భావిస్తోంది. ప్రభుత్వ విభాగాల్లో 833 అసిస్టెంట్‌ ఇంజినీరు పోస్టుల నియామక ప్రక్రియ ప్రారంభించనుంది. గ్రూప్‌-4 ధ్రువీకరణ పత్రాల పరిశీలన పూర్తయిన వెంటనే ఏఈ పోస్టుల పరిశీలన ప్రారంభించ అవకాశం ఉంది.