Panchayat Elections: రసవత్తరంగా సర్పంచ్‌ ఎన్నికలు..వేలం పాటలతో ఏకగ్రీవం

Panchayat Elections : గ్రామాల్లో సర్పంచ్‌ ఎన్నికలు జోరందుకున్నాయి. ఈ రోజుతో తొలివిడత నామినేషన్లు పర్వం ముగిసింది. కాగా గ్రామాల్లో ఇప్పటికే ఏకగ్రీవాల కోసం పార్టీలు జోరుగా ప్రయత్నాలు చేస్తున్నాయి. అయితే దీనికి గాను వేలం పాటలు నిర్వహిస్తున్నాయి. గ్రామానికి అవసరమైన అభివృద్ధి కార్యక్రమాల నిర్వహణ కోసం ఎవరు ఎక్కువ డబ్బులు ఇస్తే వారే సర్పంచ్‌ అంటూ గ్రామస్తులు తేల్చి చెబుతున్నారు.దీనితో సర్పంచ్‌ పదవికి పోటీ పెరిగింది. పోటీకి ఒకరికంటే ఎక్కువమంది ముందుకు వస్తే ఎవరు ఎక్కువ చెల్లిస్తే వారికే సర్పంచ్‌ గిరి అంటూ తేల్చే్స్తున్నారు. దీంతో ఏకగ్రీవాలు జోరందుకుంటున్నాయి!

 నామినేషన్ల హడావుడి, గ్రూపు రాజకీయాలు,పార్టీల ఎత్తుగడల వంటివి లేకుండా వేలంపాటలో పోటీపడండి.. సర్పంచ్‌ అవ్వండి’ అంటూ గ్రామస్తులు తేల్చిచెప్తు్న్నారు. అయితే ఏకగ్రీవాల కోసం వేలం నిర్వహించడాన్ని ఎన్నికల సంఘం వ్యతిరేకిస్తున్నప్పటికీ గ్రామీణులు పట్టించుకోవడం లేదు.  ఎన్నికల్లో  పోటీ చేసి ఓటర్లకు డబ్బు, మద్యం పంపిణీ చేయడం కంటే గ్రామాభివృద్ధి కోసం డబ్బులు వెచ్చించి సర్పంచ్‌ అవ్వడం బెటర్‌ అని గ్రామస్తులు అంటున్నారు.

గత ఎన్నికల్లో సర్పంచ్‌లుగా పనిచేసిన పలువురు గ్రామాల అభివృద్ధి కోసం సొంత డబ్బులు ఖర్చుపెట్టి పనిచేసిన వారున్నారు. అయితే ఆ డబ్బులు ఇంతవరకు ప్రభుత్వం చెల్లించలేదు. దీంతో పలువురు మాజీ సర్పంచ్‌లు తమ బిల్లుల కోసం ప్రభుత్వంతో ప్రయత్నం చేసినా రాలేదు. దీంతో వారిలో కొంతమంది రిజర్వేషన్‌ను అనుసరించి తిరిగి పోటీ చేస్తున్నారు.. అందులో భాగంగా తనను గెలిపిస్తే సదరు డబ్బులు వదులుకుంటామని చెప్తున్నారు. మరికొందరు తమను గెలిపిస్తే గ్రామానికి కావలసిన అన్ని రకాల పనులు చేయడంతో పాటు తన సొంత నిధులు వెచ్చించి అభివృద్ధి చేస్తామని ప్రచారం చేస్తున్నారు.

అయితే  స్థానిక సంస్థల ఎన్నికల్లో బలవంతపు ఏకగ్రీవాలను రద్దు చేయాలని నిఘా వేదిక, స్థానిక ప్రభుత్వాల సాధికారిక వేదిక వంటి సామాజిక సంస్థలు  డిమాండ్‌ చేస్తున్నాయి. బలవంతపు ఏకగ్రీవాలను హైకోర్టులో సవాలు చేస్తామని  తేల్చి చెబుతున్నాయి.  మరోవైపు తాజా మాజీ సర్పంచ్‌లు ఎన్నో అప్పులు చేసి ఊర్లలో అభివృద్ధి పనులు చేశారని.. వారికి రావాల్సిన బిల్లులు వెంటనే చెల్లించాలని  తెలంగాణ సర్పంచ్‌ల ఫోరం అధ్యక్షుడు ఎస్‌ యాదయ్య గౌడ్‌ డిమాండ్‌ చేశారు. లేదంటే న్యాయస్థానాన్ని ఆశ్రయిస్తామని అంటున్నారు. 

పంచాయతీ ఎన్నికల్లో భాగంగా వచ్చే నెల 11 న తొలివిడత ఎన్నికలు జరిగే 189 మండలాల్లోని 4,236 సర్పంచ్‌ స్థానాలకుగాను రెండురోజుల్లో 8198 నామినే షన్లు దాఖలయ్యాయి. తొలిరోజు 3297రాగా.. శుక్రవారం 4901 నామినేషన్లు దాఖలయ్యాయి. వచ్చే నెల 11న జరిగే తొలి విడత ఎన్నికల కోసం నామినేషన్ల స్వీకరణకు శనివారం చివరిరోజు. కాగా తొలివిడత ఎన్నికలు జరిగే 37,440 వార్డు సభ్యుల స్థానాలకుగాను శుక్రవారం వరకు 11,502 మంది నామినేషన్లు దాఖలయినట్లు ఎన్నికల సంఘం వెల్లడించింది. 

కాగా పలు జిల్లాల్లో ఇప్పటికే గ్రామాలు ఎకగ్రీవం అవుతున్నాయి.  గద్వాల జిల్లాలో  వేలం పాటల జోరు సాగుతోంది.  ఇప్పటికే 20 కి పైగా గ్రామ పంచాయతీలు ఏకగ్రీవం అయ్యాయి. గట్టు మండలం మిట్టదొడ్డిలో ఒక వ్యక్తి రూ.90 లక్షలకు పదవిని పాడుకొని సర్పంచ్‌అయ్యాడు. పెంచికలపాడులో సర్పంచ్‌ ఉపసర్పంచ్‌ పదవులకు రూ.40.5 లక్షలు పలికింది. ఆరగిద్దలో రూ.31 లక్షలు, ముచ్చోనిపల్లిలో రూ.16 లక్షలు, తారాపురంలో రూ. 16 లక్షలకు, తుమ్మలపల్లిలో రూ.30 లక్షలకు సర్పంచ్‌ పదవులు చేజిక్కించుకున్నారు.  గద్వాల మండలం వీరాపురం గ్రామ సర్పంచ్‌ పదవికి రూ.50 లక్షలు పలికింది. ఇదే మండలంలోని కుర్వపల్లిలో 45 లక్షలు, ఈడిగోనిపల్లిలో 10 లక్షలు, పుటాన్‌పల్లిలో 15 లక్షలకు సర్పంచు పదవులను ఏకగ్రీవం చేశారు. అదే విధంగా కేటీదొడ్డి మండలం సుల్తానాపురంలో రూ.8లక్షలు, ధరూర్‌ మండలంలోని కొత్తపాలెంలో 26.50 లక్షలకు పదవులను అభ్యర్థులు దక్కించుకున్నారు. మల్దకల్‌ మండలం సద్దలోనిపల్లి గ్రామ స్మశాన వాటిక కోసం రెండు ఎకరాల స్థలం ఇచ్చినందుకు ఓ వ్యక్తికి సర్పంచ్‌ పదవిని అప్పగించారు.  

 ఇక నల్లగొండ జిల్లా నార్కట్‌పల్లి మండలంలోని దాసరిగూడెంలో ఆలయ నిర్మాణం హామీతో పాటు గ్రామంలో వివిధ అభివృద్ధి పనులు చేస్తామనే హామీ ఇవ్వడంతో సర్పంచ్‌గా ఉప్పుల వెంకట్‌రెడ్డి, ఉపసర్పంచ్‌గా పోలగోని జ్యోతిశ్రీను బాబును, వార్డుసభ్యులను ఏకగ్రీవంగా ఎన్నుకుంటూ తీర్మానం చేశారు.ఖమ్మం జిల్లా కామేపల్లి మండలం జోగ్గూడెం గ్రామస్థులూ ఊర్లో ఆంజనేయ స్వామి ఆలయం కట్టుకుందామని నిర్ణయించారు. దాని ప్రకారం భూక్యా సైదమ్మ రూ.20 లక్షలకు పాడుకొని సర్పంచ్‌ పదవిని గెలుచుకుంది.