Liquor Ban: మద్యం తాగితే లక్ష జరిమానా, ఏడు చెప్పు దెబ్బలు

మద్యపాన నిషేధంలో భాగంగా కొన్ని గ్రామాలు కఠినమైన నిర్ణయాలు తీసుకుని మిగితా గ్రామలకు  ఆదర్శంగా నిలుస్తున్నాయి. కామారెడ్డి జిల్లాలోని రాజంపేట్ మండలంలోని ఎల్లారెడ్డి నియోజకవర్గ పరిధిలోని కొండాపూర్‌, గుడి తండా, షేర్‌ శంకర్‌ తండా గ్రామస్తులు ఇటీవల మద్యపానం నిషేధించారు. ఈ గ్రామాలను ఆదర్శంగా తీసుకుని గుండారం గ్రామ పరిధిలోని గుండారం, ఎల్లాపూర్‌ తండా, నడిమితండా గ్రామాలు తాజాగా మద్యపాన నిషేధాన్ని  విధించాయి.

లక్ష రూపాయల జరిమానాతో

ఈ మేరకు గ్రామంలోని ఎల్లమ్మ గుడివద్ద సమావేశమై  గ్రామంలో ఎవరైనా మద్యం విక్రయిస్తే లక్ష రూపాయల జరిమానాతో పాటుగా ఏడు చెప్పు దెబ్బలు విధించనున్నట్లు తీర్మానించారు. అంతేకాకుండా ఎవరైనా మద్యం పట్టిస్తే రూ. 20 వేలు బహుమతిగా అందిస్తామని తీర్మానించారు.  అలాగే  , దొంగతనంగా మద్యం కొని తాగితే ఏడు చెప్పు దెబ్బలు ఉంటాయని తీర్మానంలో పేర్కొన్నారు.  మద్యం తాగి యువత చెడిపోతుందని, అప్పులపాలై కుటుంబాలు రోడ్డున పడుతున్నాయని గ్రామస్థులు ఈ నిర్ణయానికి వచ్చారు.  ఈ మద్యపాన నిషేధం అమలుతీరును పర్యవేక్షిం చేందుకు గ్రామానికి ఇద్దరి చొప్పున తీసుకొని కమిటీని ఏర్పాటు చేసినట్లుగా వెల్లడించారు.  గ్రామాల సరిహద్దుల్లో ఎవరు మద్యం తాగినా శిక్షలు వర్తిస్తాయని తీర్మానంలో గ్రామస్థులు పేర్కొన్నారు.