Sachin Tendulkar: ఆ ఊరికి సచిన్ దేవుడు...ఎందుకో తెలుసా..?

Sachin Tendulkar adopted Village Kandriga: వెంకటగిరి గూడూరు మధ్య మార్గంలో ఉండే ఈ గ్రామం పేరు పుట్టంరాజువారి కండ్రిగ (Kandriga in Puttamraj). దశాబ్దాలుగా ఇక్కడ ప్రజలు కనీస వస్తూ లేక తీవ్ర ఇబ్బందులకు గురవుతున్నారు. దీంతో సమస్యల వలయంలో ఉన్న అన్ని గ్రామాల్లో ఇది కూడా ఒకటిగా మారిపోయింది. తాగునీరు, రోడ్లు, డ్రైనేజీ, బడి లాంటి కనీస వసతుల విషయంలోనూ వెనకడుగులో ఉండేది. ఈ పరిస్థితుల్లో ఎవరూ పట్టించుకోని ఈ గ్రామాన్ని అందరూ గుర్తు తెచ్చుకునేలా ఓ మార్పు జరిగింది. క్రికెట్ దిగ్గజం సచిన్ టెండూల్కర్ ఈ గ్రామాన్ని దత్తత తీసుకున్నట్లు ప్రధాన పత్రికల్లో బ్యానర్ ఐటెంలో వచ్చాయి.

అసలు సచిన్‌కి ఈ గ్రామానికి సంబంధం ఏమిటి..? అన్న ఆలోచన అందరికీ వచ్చింది. అప్పట్లో జాయింట్ కలెక్టర్‌ (Joint Collector)గా పని చేసిన రేఖారాణి (Rekha rani) నెల్లూరు జిల్లాలో ఉన్న ఓ గ్రామాన్ని దత్తత తీసుకోవాలని సచిన్ టెండుల్కర్ విమాన ప్రయాణం సమయంలో కోరింది. దీనికి సచిన్ టెండూల్కర్ (Sachin Tendulkar) సానుకూలంగా స్పందించారు. ఓ గ్రామాన్ని ఎంపీ హోదాలో దత్తత (Adopted) తీసుకునేందుకు అంగీకరించారు. దీంతో అధికారులు ఆగమేఘాల మీద గూడూరు రూరల్ మండలంలో ఉన్న పుట్టంరాజువారి కండ్రిగ గ్రామాన్ని ఎంపిక చేశారు. సచిన్ టెండూల్కర్ ఈ గ్రామ అభివృద్ధికి రెండు కోట్ల రూపాయలను వెచ్చించారు. దీంతో గ్రామం రూపురేఖలు మారిపోయాయి. అందమైన ముఖ ద్వారంతో పాటు సీసీ రోడ్లు, భూగర్భ డ్రైనేజీ, వీధిలైట్లు, విద్యుత్ సౌకర్యం, ఇంటింటికి కుళాయి, కమ్యూనిటీ హాలు, వర్మి కంపోస్ట్ యూనిట్ ఇలా అనేక సౌకర్యాలు నెలల వ్యవధిలోనే సమకూరాయి.

సౌకర్యవంతమైన జీవనం

దీంతో గ్రామస్తుల సంతోషం అంతా ఇంతా కాదు. ప్రతి ఇంటికి సచిన్ టెండూల్కర్ బోర్డు పెట్టుకున్నారు. ఆయన మా దేవుడు అంటూ.. ఉప్పుంగిపోయారు. ఈ క్రమంలో సచిన్ టెండూల్కర్ (Sachin Tendulkar)రెండుసార్లు ఆ గ్రామాన్ని సందర్శించారు. అక్కడే పరిస్థితులను తెలుసుకున్నారు. గ్రామస్తులతో ముఖాముఖి మాట్లాడారు. గ్రామానికి ఏం కావాలన్నా చేసేందుకు సిద్ధంగా ఉన్నానని చెప్పారు. ఆయనతో కలిసి నడిచిన క్షణాలు మాట్లాడిన మాటలు అన్నీ ఇప్పటికే గ్రామస్తులు నెమరు వేసుకుంటూనే ఉన్నారు. ఆయన నిధులతో ఏర్పాటైన వసతులతో ఇప్పటికీ సౌకర్యవంతమైన జీవనం సాగిస్తున్నారు.

ఇది కూడా చదవండి: ఆస్తులన్ని ఆమెకే.. కడప కానిస్టేబుల్‌ సూసైడ్‌ నోట్‌లో సంచలనం