Rent AC : ఏసీని అద్దెకు తెచ్చుకోండి.. భానుడి నుంచి తప్పించుకోండి.!

Summer : ప్రస్తుతం తెలుగు రాష్ట్రాలతో పాటు దేశ వ్యాప్తంగా ఎండలు(Sun) మండిపోతున్నాయి. ఈ సమయంలో అద్దె ఇంట్లో ఉంటూ.. తరచూ ఇళ్లు మారే వారికి రెంటల్ ఏసీ ప్లాన్(Rental AC Plan) ఎంతగానో యూజ్ అవుతుందనడంలో ఎలాంటి సందేహం అక్కర్లేదు. సూర్య తాపాన్ని తట్టుకునేందుకు ఏసీ కొనాలని ప్లాన్ చేస్తున్నారా? అయితే ఏసీ కొనడానికి బదులు అద్దెకు తీసుకోవడం వల్ల అనేక లాభాలున్నాయని వినియోగదారులు చెబుతున్నారు. ఎందుకంటే రెంటల్ ఏసీలో ఇబ్బందులు చాలా తక్కువగా ఉంటాయి. దీన్ని సులభంగా ఆర్డర్ చేయొచ్చు. ప్రస్తుతం ఆన్‌లైన్/ఆఫ్‌లైన్ రెండింటిలోనూ రెంటల్ ఏసీ సౌకర్యాలు ఉన్నాయి. వీటి ధర రూ.800 నుంచి రూ.1500 వరకు ఉన్నాయి. ఒకవేళ మీరు సొంతంగా ఏసీ కొంటే తరచుగా మార్చడానికి కష్టమవుతుంది. అదే అద్దెకు తీసుకుంటే.. మీరు ఇల్లు మారుతున్నామన్నా సమాచారం ఇస్తే చాలు.. ఆ కంపెనీ సిబ్బంది వచ్చి దాన్ని జాగ్రత్తగా తీసుకెళ్తారు. ఎందుకంటే ఇప్పట్లో కొత్త ఏసీ కొనాలంటే కనీసం రూ.30 వేలకు పైగా ఖర్చు చేయాల్సిందే. అంతేకాదు దానికి సంబంధించిన మెయింటెయినెన్స్ ఛార్జీలు(Maintenance Charges) ఉంటాయి. అందుకే చాలా మంది ఏసీ కొనకుండా అద్దెకు తీసుకోవాలని ఆలోచిస్తున్నారు. అయితే ఈ ACని ఎక్కడి నుంచి అద్దెకు తీసుకోవాలి.. ఎలా ఆర్డర్ చేయాలి.. ఎంత మనీ డిపాజిట్ చేయాలనే విషయాలు చాలా మందికి తెలీదు. అంతేకాదు ACని అద్దెకు ఎలాంటి లాభాలొస్తాయి.. ఎవరు తీసుకోవాలనే పూర్తి వివరాలను ఇప్పుడు తెలుసుకుందాం..

మీరు ఏదైనా ఎలక్ట్రానిక్స్ షాపుకు వెళ్లి నేరుగా అడగొచ్చు. లేదంటే మీరు ఆన్‌లైన్‌లో వెబ్‌సైట్లో సెర్చ్ చేస్తే బోలెడన్నీ లాభాలొస్తాయి. ఉదాహరణకు రెంట్‌మోజో, ఫెయిరెంట్, సిటీఫర్నీష్, రెంట్‌లోకో వంటివి అనేక మెట్రో నగరాల్లో ACలను అద్దెకు అందిస్తాయి. AC సామర్థ్యాన్ని రూ.800 నుంచి రూ.2 వేల వరకు వసూలు చేస్తాయి.

Also Read : వేసవిలో కంఫర్ట్ తో పాటు స్టైలిష్ గా కనిపించాలా..? ఈ 5 రకాల డ్రెసెస్ బెస్ట్ ఆప్షన్..!

ముందుగా కొత్త AC కొనాలంటే చాలా డబ్బులు చెల్లించాలి. శాంసంగ్, పానాసోనిక్, వోల్టాస్, హిటాచీ సహా అనేక బ్రాండ్ల ACల ధర రూ.30 వేలు కంటే ఎక్కువగానే ఉన్నాయి. మీ దగ్గర అంత బడ్జెట్ లేకపోతే, ఏసీని అద్దెకు తీసుకోవచ్చు. ఒకవేళ మీరు AC కొన్నా కూడా రెగ్యులర్‌గా మెయింటెయినెన్స్ ఖర్చులు భరించాల్సి ఉంటుంది. అయితే అద్దెకు తీసుకున్న AC విషయంలో ఇలాంటి సమస్యలేమీ ఉండవు. ఎలాంటి ఎక్స్‌ట్రా ఖర్చులు లేకుండా ఎయిర్ కండిషనింగ్ సిస్టమ్‌ను సురక్షితంగా ఆస్వాదించొచ్చు. విండోస్, స్ప్లిట్ AC సిస్టమ్స్ రెండూ ఇక్కడ అందుబాటులో ఉంటాయి.

ఏసీ అద్దెకు తీసుకోవాలంటే పెద్దగా కష్టపడాల్సిన పని లేదు. ప్రస్తుతం ఆన్‌లైన్‌లో అనేక కంపెనీలు అద్దెకు సంబంధించి ఖర్చుల పూర్తి వివరాలను అక్కడే చూపుతున్నాయి. నియమ నిబంధనలు కూడా ఉన్నాయి. వీటన్నింటిని చూసి.. అన్నింటితో కంపేర్ చేసుకుని, లాభనష్టాలను బేరీజు వేసుకుని.. మీకు నచ్చిన ACని అద్దెకు తీసుకోవచ్చు. ఇలా అద్దెకు తీసుకున్న ACలో ఏదైనా అంతరాయం ఏర్పడితే నేరుగా సర్వీస్ సెంటర్‌కి లేదా ఏజెన్సీకి కాల్ చేస్తే, వాళ్లే వచ్చి ఏసీలను సర్వీస్ చేస్తారు. అద్దెకు తీసుకునే వారు AC రేంజ్ బట్టి ఇన్‌స్టాలేషన్ ఛార్జీ, రిఫండబుల్ డిపాజిట్ చెల్లించాల్సి ఉంటుంది. వీటిలో పైపుల ఖర్చులు వంటివి అదనంగా ఉంటాయని గుర్తుంచుకోండి. అయితే ఈ సేవలన్నీ కేవలం మెట్రో నగరాల్లోనే ఎక్కువగా అందుబాటులో ఉన్నాయి.