కాంగ్రెస్ ప్రభుత్వంలో మొదటి ఉద్యోగం ఆమెకే.. రేపే రేవంత్ సంతకం!

తెలంగాణలో గురువారం కాంగ్రెస్ ప్రభుత్వం కొలవుదీరనుంది. ఎల్‌బి స్టేడియంలో సీఎంగా రేవంత్ రెడ్డి ప్రమాణస్వీకారం చేయనుండగా ఈ కార్యక్రమానికి కావాల్సిన ఏర్పాట్లను ఇప్పటికే అధికారులు పూర్తిచేశారు. ఈ ఎన్నికల్లో గెలిచిన కాంగ్రెస్ ఎమ్మెల్యేల అభ్యర్థులంతా ఇప్పటికే హైదరాబాద్‌కు చేరుకున్నారు. అయితే కాంగ్రెస్ ప్రభుత్వం వస్తే ప్రతి ఏటా జాబ్ క్యాలెండర్ విడుదల చేస్తామని ఎన్నికల మేనిఫెస్టోలో వెల్లడించిన సంతగతి తెలిసిందే. కాగా తెలంగాణలో మెుదటి ఉద్యోగం ఓ దివ్యాంగురాలికి ఇవ్వనున్నారు. కాంగ్రెస్ అధికారంలోకి రాగానే తొలి ఉద్యోగం ఆమెకు ఇస్తామని అక్టోబరు‌లో రేవంత్ రెడ్డి ఇచ్చిన మాట ప్రకారం రేపు ఫైల్ పై సంతకం చేయబోతున్నారని, ఇప్పటికే రజినీకి ఆహ్వానం పంపినట్లు సమాచారం.

Also read :ఇంజక్షన్లు ఇచ్చి భార్య, పిల్లల్ని చంపిన డాక్టర్.. ఆ తర్వాత ఏం చేశాడంటే

ఈ మేరకు హైదరాబాద్ నాంపల్లికి చెందిన దివ్యాంగురాలు (మరుగుజ్జు) రజినీ అనే అమ్మాయి.. పీజీ పూర్తి చేసినా కూడా అటు ప్రైవేటులో, ఇటు ప్రభుత్వంలో ఎక్కడా ఉద్యోగం రాలేదని రేవంత్ రెడ్డిని కలిసి తన ఆవేదనను వ్యక్తం చేసింది. రజినీ బాధను సావదధానంగా విన్న రేవంత్ రెడ్డి.. డిసెంబర్ 9న ఎల్బీ స్టేడియంలో కాంగ్రెస్ సీఎం ప్రమాణ స్వీకారం ఉంటుందని, ఆ సభకు సోనియా గాంధీ, రాహుల్ గాంధీ, మల్లిఖార్జున ఖర్గే వస్తారని చెప్పుకొచ్చారు. అదే రోజున, వాళ్ల ముందే కాంగ్రెస్ ప్రభుత్వం తొలి ఉద్యోగం నీకే ఇస్తుందని రజనికీ హామీ ఇచ్చారు. ఇది తన గ్యారంటీ అని రేవంత్ స్పష్టం చేయటంతో పాటు స్వయంగా కాంగ్రెస్ గ్యారంటీ కార్డును రజినీ పేరుతో రాసి ఇచ్చారు. రేపు సీఎంగా రేవంత్ రెడ్డి ప్రమాణ స్వీకారం చేయనున్నారు. గతంలో ఇచ్చిన హామీ మేరకు రేపు జరిగే ప్రమాణ స్వీకారకార్యక్రమానికి రజినీకి ఆహ్వానం పంపించారు. రేపు ప్రమాణ స్వీకారం అనంతరం ఆమెకు ఇచ్చిన మాట ప్రకారం ఉద్యోగం ఇవ్వనున్నట్లు తెలిసింది.