NDA Parties: ఎన్డీయే లోకి కొత్త పార్టీలు వచ్చే ఛాన్స్ ఉందా? బీజేపీ ఏం చేయబోతోంది?

NDA Parties:  లోక్‌సభ ఎన్నికల్లో 240కి పరిమితమైన భారతీయ జనతా పార్టీ (బిజెపి) తన మిత్రపక్షాలతో కలిసి ప్రభుత్వాన్ని ఏర్పాటు చేయబోతోంది. జూన్ 9న ప్రధాని నరేంద్ర మోదీ మూడోసారి ప్రమాణ స్వీకారం చేయనున్నారు. కొత్త ప్రభుత్వం ఏర్పాటుకు ముందు జాతీయ ప్రజాస్వామ్య కూటమి (ఎన్డీయే) పరిధిని విస్తరించేందుకు బీజేపీ ప్రయత్నాలు ప్రారంభించింది. ప్రస్తుతం ఎన్డీయేకు 292 సీట్లు ఉన్నాయి. ఇలాంటి పరిస్థితుల్లో ఎన్డీయేకు ఏ పార్టీ అనుకూలంగా ఉంటుందన్న ప్రశ్న తలెత్తుతోంది.

2024 ఫలితాల్లో బీజేపీకి 240, దాని మిత్రపక్షాలైన టీడీపీకి 16, జేడీయూకు 12, శివసేనకు 7, ఎల్‌జేపీకి 5, జేడీఎస్‌కు 2, ఆర్‌ఎల్‌డీకి 2, జనసేనకు 2, ఎన్‌సిపికి 1, అప్నా దళ్-ఎస్‌కు ఒక సీటు, ఎజెఎస్‌యుకి ఒకటి, హెచ్‌ఎఎమ్‌కి ఒకటి, యుపిపిఎల్‌కు ఒకటి, అస్సాం గణ పరిషత్‌కు ఒక సీటు లభించింది. మొత్తంగా చూసుకుంటే ఎన్డీయేకు 292 సీట్లు ఉన్నాయి.  అంటే మెజారిటీ కంటే 20 సీట్లు ఎక్కువ. మెజారిటీకి దగ్గరగా ఉండటంతో ఎన్డీయే తన పరిధిని విస్తరించుకోవాలని ఆలోచిస్తోంది. ప్రభుత్వం సుస్థిరంగా ఉండాలంటే, మరో 20-30 సీట్లను అయినా పెంచుకోవాలని బీజేపీ ఆలోచిస్తున్నట్టు తెలుస్తోంది. 

ఇండి  కూటమికి ఎన్ని సీట్లు ఉన్నాయి?
అదే సమయంలో, ఇండి  కూటమికి నాయకత్వం వహిస్తున్న కాంగ్రెస్‌కు 99 సీట్లు ఉండగా, దాని మిత్రపక్షాలు - SP 37, TMC 29, DMK 22, శివసేన-ఉద్ధవ్ 9, NCP శరద్ పవార్ 8, RJD 4, CPM 4. , IUML 3, ఆప్‌ 3, జేఎంఎం 3, సీపీఐ (ఎంఎల్‌) (ఎల్‌) 2, నేషనల్‌ కాన్ఫరెన్స్‌ 2, సీపీఐ 2, వీసీకే 2, ఆర్‌ఎస్‌పీ 1, ఆర్‌ఎల్‌పీ 1, కేరళ కాంగ్రెస్‌ 1, ఎమ్‌డిఎంకెకు ఒక స్థానం, ఆదివాసీ పార్టీకి ఒక స్థానం లభించాయి.

మిగిలిన 17 సీట్లలో ఎవరు ఎన్డీయేలో భాగమవుతారు?
అంటే ఇండి కూటమికి 234 సీట్లు వచ్చాయి, మెజారిటీ సంఖ్య కంటే 38 సీట్లు తక్కువ. ఈ రెండు కూటములు కాకుండా.. ఇతరులకు 17 స్థానాలు దక్కాయి.  వీరిలో ఇండిపెండెంట్స్ 7, వైఎస్ఆర్ కాంగ్రెస్ 4, AIMIM 1, ఆజాద్ సమాజ్ పార్టీ 1, శిరోమణి అకాలీదళ్ 1, SKM 1, ZPM 1,VOTPP 1 స్థానాలు పొందారు. ఇప్పుడు ఎన్డీయే పరిధిని విస్తరించేందుకు బీజేపీ ప్రయత్నిస్తే ఏ పార్టీతో కలిసి వెళ్లవచ్చన్న ప్రశ్న తలెత్తుతోంది.

Also Read: మోడీ ప్రమాణ స్వీకారోత్సవానికి ప్రత్యేక అతిథులు.. లిస్ట్ చూస్తే ఆశ్యర్యపోతారు!

ఉద్ధవ్, అకాలీదళ్ కలిసి వస్తారా?
NDA Parties:  శివసేన-ఉద్ధవ్ - శిరోమణి అకాలీదళ్‌తో సహా పాత మిత్రపక్షాలను తిరిగి తీసుకురావడానికి బీజేపీ ప్రయత్నించే అవకాశం ఉంది. ఈ రెండు పార్టీలకు 10 సీట్లు ఉన్నాయి. ఇది కాకుండా, ఇండి  కూటమికి చెందిన ఇతర పార్టీల మద్దతును పొందడం బిజెపికి కష్టం.  ఎందుకంటే ఈ పార్టీల రాజకీయం మొత్తం బిజెపిపై వ్యతిరేకతపై ఆధారపడి ఉంటుంది. బీజేపీకి కూడా వైఎస్సార్ కాంగ్రెస్ నుంచి మద్దతు లభించడం కష్టమనే చెప్పవచ్చు. ఎందుకంటే దాని ప్రతిపక్ష పార్టీ టీడీపీ ప్రస్తుతం ఎన్డీయేలో భాగమైంది.

షిండే హయాంలో ఉద్ధవ్‌కు బీజేపీ ఎలా సహాయం చేస్తుంది?
కొందరు స్వతంత్ర ఎంపీలపై కూడా బీజేపీ కన్నేసింది. అయితే, చాలా మంది స్వతంత్ర ఎంపీలు ఇండి అలయన్స్‌తో వెళ్లడానికి మొగ్గు చూపిస్తున్నట్టు తెలుస్తోంది. అటువంటి పరిస్థితిలో, బిజెపి ప్రయత్నిస్తే శివసేన(ఉద్ధవ్), శిరోమణి అకాలీదళ్ దానితో కలిసి రావొచ్చు, కానీ ప్రస్తుత పరిస్థితుల్లో అది చాలా కష్టంగా కనిపిస్తోంది. ఒకవేళ ఉద్ధవ్ ఠాక్రేను తీసుకురావాలని బీజేపీ ప్రయత్నిస్తే ఏకనాథ్ షిండేకు కోపం వచ్చే అవకాశం ఉంది. ఇలాంటి పరిస్థితుల్లో 9 మంది ఎంపీలను ఎన్డీయేలో భాగస్వామ్యులను చేయడం ద్వారా 7 మంది ఎంపీల పార్టీ అయిన శివసేనను బీజేపీ వదులుకుంటుందా? అనేది పెద్ద ప్రశ్న. 

ప్రస్తుతం ఉన్న పరిస్థితులు చూస్తుంటే, ఎన్డీయే బలం పెంచుకునే కసరత్తు అంత ఈజీ కాదనిపిస్తోంది. అయితే, అధికారంలో ఉండడం అనే కలిసొచ్చే అంశంతో కొన్ని పార్టీలు లేదా ఇండిపెండెంట్ ఎంపీల్లో కొందరు ఎన్డీయేకు మద్దతు ఇచ్చే అంశాన్ని కొట్టిపారేయలేం అనేది రాజకీయ పండితుల మాట.