IndiGo pilot : ఇండిగో విమానానికి తప్పిన ప్రమాదం... ఫ్లైట్ లో 151 మంది ప్రయాణికులు

లక్నోలో టేకాఫ్ అవుతున్న ఇండిగో విమానానికి పెను ప్రమాదం తృటిలో తప్పింది. టేకాఫ్ సమయంలో సాంకేతిక సమస్య తలెత్తడంతో పైలట్ అప్రమత్తమై, విమానాన్ని రన్‌వేపైనే నిలిపివేశారు. ఈ ఘటన సెప్టెంబర్ 14  ఉదయం లక్నో విమానాశ్రయంలో జరిగింది. ఇండిగో విమానం (ఫ్లైట్ నం. 6E-2111) లక్నో నుంచి ఢిల్లీకి బయలుదేరాల్సి ఉంది. ఈ విమానంలో 151 మంది ప్రయాణికులు ఉన్నారు. వీరిలో సమాజ్‌వాదీ పార్టీ ఎంపీ డింపుల్ యాదవ్ కూడా ఉన్నారు. విమానం టేకాఫ్ కోసం రన్‌వేపై వేగంగా వెళ్తున్న సమయంలో ఇంజిన్‌కు తగినంత శక్తి (thrust) లభించలేదు.

సాంకేతిక లోపం కారణంగానే

ఇది గమనించిన పైలట్ వెంటనే అత్యవసర బ్రేకులను ఉపయోగించి విమానాన్ని రన్‌వే చివరి అంచుకు చేరుకోకముందే నిలిపివేశారు.  పైలట్ సకాలంలో తీసుకున్న నిర్ణయం వల్ల పెను ప్రమాదం తప్పింది. ప్రయాణికులందరూ సురక్షితంగా విమానం నుంచి బయటకు వచ్చారు. ఇండిగో విమాన సంస్థ ప్రయాణికులను మరో విమానంలో ఢిల్లీకి తరలించింది. ఈ సంఘటనపై డైరెక్టరేట్ జనరల్ ఆఫ్ సివిల్ ఏవియేషన్ (DGCA) దర్యాప్తుకు ఆదేశించింది. విమానంలో సాంకేతిక లోపం కారణంగానే ఈ సంఘటన జరిగిందని అధికారులు తెలిపారు. పైలట్ సకాలంలో తీసుకున్న నిర్ణయం వల్ల భారీ ప్రమాదం తప్పిందని అందరూ ఊపిరి పీల్చుకున్నారు.