Uttarakhand: ఉత్తరాఖండ్‌లో ఘోర ప్రమాదం...36మంది మృతి

Big Accident: 

ఉత్తరాఖండ్​ అల్మోరా జిల్లాలో జరిగిన ఘోర బస్సు ప్రమాదంలో మృతుల సంఖ్య 36కు చేరింది. ప్రయాణికులతో వెళ్తున్న ఓ బస్సు అదుపు తప్పి లోయలో పడింది. ఈ ఘటనలో పలువురు గాయపడినట్లు అధికారులు పేర్కొన్నారు. నిన్న ఉదయం 8:30 గంటల ప్రాంతంలో బస్సు గర్వాల్ నుంచి రాంనగర్​కు వెళ్తుండగా అల్మోరాలోని కూపి గ్రామ సమీపంలో ఈ ప్రమాదం జరిగిందని అధికారులు తెలిపారు. సమాచారం అందుకున్న వెంటనే పోలీసులు ఘటనాస్థలికి చేరుకుని సహాయక చర్యలు చేపట్టారు. క్షతగ్రాతులను ఆస్పత్రికి తరలించారు. అయితే ఈ ప్రమాదంలో అక్కడిక్కడికే 28 మంది మరణించగా, ఆస్పత్రిలో చికిత్స పొందుతూ మరో ఎనిమిది మంది మరణించినట్లు అధికారులు తెలిపారు. అయితే ఈ ప్రమాదం జరిగినప్పుడు బస్సులో సుమారు 50 మందికి పైగా ప్రయాణికులు ఉన్నట్లు అధికారులు తెలిపారు. 

ఈ ప్రమాదంపై ప్రధానమంత్రి నరేంద్ర మోదీ స్పందించారు. మృతుల కుటుంబాలకు ఒక్కొక్కరికి రూ.2 లక్షలు, క్షతగాత్రులకు రూ.50 వేలు చొప్పున ప్రధానమంత్రి సహాయనిధి నుంచి ఆర్థికసాయం అందజేస్తామని ప్రకటించారు. ఈ ఘటనపై కేంద్ర హోంమంత్రి అమిత్​ షా దిగ్భ్రాంతి వ్యక్తం చేశారు. మరోవైపు ఈ ఘటనపై ఉత్తరాఖండ్ సీఎం పుష్కర్ సింగ్ ధామీ విచారం వ్యక్తం చేశారు. సహాయక చర్యలు వేగంగా నిర్వహించాలని జిల్లా యంత్రాంగానికి సూచించినట్లు తెలిపారు. తీవ్రంగా గాయపడిన వారిని వాయుమార్గంలో తరలించాలని ఆదేశాలు జారీ చేసినట్లు ఎక్స్​ వేదికగా తెలిపారు. మృతుల కుటుంబాలకు రూ.4 లక్షలు, క్షతగాత్రులకు లక్ష రూపాయల చొప్పున ఎక్స్​గ్రేషియాను ప్రకటించారు. బస్సు ఘటనపై మెజిస్టీరియల్ విచారణకు ఆదేశించారు. ఘటనతో సంబంధం ఉన్న వారిని సస్పెండ్ చేయాల్సిందిగా అధికారులకు ఆదేశాలు జారీ చేశారు.

Also Read: Karnataka: కర్ణాటక సీఎం సిద్ధరామయ్యకు లోకాయుక్త సమన్లు