Diwali : దీపావళిపై ఆంక్షలు.. అలీఘర్ ముస్లిం విశ్వవిద్యాలయంలో ఉద్రిక్తత!

ఉత్తరప్రదేశ్‌లోని అలీగఢ్ ముస్లిం యూనివర్సిటీ (AMU) మరోసారి వివాదాలకు కేంద్ర బిందువుగా మారింది. కొద్ది నెలల క్రితం హోలీ వేడుకలపై ఘర్షణలు చెలరేగగా, తాజాగా దీపావళి వేడుకల విషయంలో ఉద్రిక్త పరిస్థితులు నెలకొన్నాయి. విశ్వవిద్యాలయం ప్రాంగణంలో దీపావళి వేడుకలను జరుపుకోవడానికి కొంతమంది హిందూ విద్యార్థులు అనుమతి కోరారు. మాస్ కమ్యూనికేషన్ విద్యార్థి అఖిల్ కౌశల్, అక్టోబర్ 18న NRSC క్లబ్‌లో దీపావళి వేడుకలను నిర్వహించడానికి అనుమతి కోరుతూ వైస్ ఛాన్సలర్‌కు లేఖ రాశారు. అనుమతి ఇవ్వకపోతే విద్యార్థులు వర్సిటీ ప్రధాన ద్వారం వద్ద దీపావళి జరుపుకుంటారని కౌశల్ తన లేఖలో తెలిపారు.

వర్సిటీ వర్గాల్లో భిన్నాభిప్రాయాలు

అయితే, ఈ వేడుకల నిర్వహణపై విద్యార్థి సంఘాల్లో, వర్సిటీ వర్గాల్లో భిన్నాభిప్రాయాలు వ్యక్తమయ్యాయి. ఏఎంయూ ఒక ముస్లిం మైనారిటీ సంస్థ కావడంతో, ప్రాంగణంలో దీపావళి వంటి పండుగలను బహిరంగంగా, పెద్ద ఎత్తున నిర్వహించడంపై అభ్యంతరాలు వచ్చాయి. ఈ విషయంలో విద్యార్థి నాయకుల మధ్య మాటల యుద్ధం, వాగ్వాదాలు జరగడంతో క్యాంపస్‌లో స్వల్పంగా ఉద్రిక్తత నెలకొంది. గతంలో కూడా హోలీ పండుగ సందర్భంగా విద్యార్థుల మధ్య ఘర్షణలు జరిగాయి.మార్చి 9న క్యాంపస్ లోపల హోలీ మిలన్ కార్యక్రమాన్ని నిర్వహించడానికి AMU పరిపాలన అనుమతి నిరాకరించడంతో వివాదం చెలరేగింది.

దీనితో అనేక మంది విద్యార్థులు మరియు అఖిల భారతీయ కర్ణి సేన సభ్యులు హిందువులపై వివక్ష చూపుతున్నారని ఆరోపిస్తూ వర్సిటీకి వ్యతిరేకంగా భారీ నిరసనకు దిగారు. ఈ విషయంలో జోక్యం చేసుకోవాలని కోరుతూ ఆ సంస్థ ప్రధానమంత్రి నరేంద్ర మోడీకి కూడా లేఖ రాసింది. చివరికి AMU పరిపాలన ఒత్తిడికి తలొగ్గింది. విశ్వవిద్యాలయ చరిత్రలో మొదటిసారిగా, భారీ భద్రత మధ్య క్యాంపస్ లోపల హోలీ జరుపుకున్నారు. వేడుకల సమయంలో విద్యార్థులు 'భారత్ మాతా కీ జై', 'వందేమాతరం' నినాదాలు చేస్తూ కనిపించారు.