Mutual Funds: మ్యూచువల్ ఫండ్స్ పై పెరుగుతున్న మోజు.. ఫండ్స్ లో ఇన్వెస్ట్మెంట్ ఎలా అంటే.. 

Mutual Funds: కష్టపడి సంపాదించిన డబ్బును ఇన్వెస్ట్ చేయడానికి చాలా ఆప్షన్స్ ఇప్పుడు అందుబాటులో ఉన్నాయి. అయితే, మన డబ్బును పెట్టుబడిగా పెట్టేటప్పుడు సురక్షిత మార్గం కోసం చూడటం తప్పనిసరి. సాధారణంగా ఇన్వెస్ట్మెంట్ కోసం ఫిక్స్‌డ్ డిపాజిట్లు (FD) చాలా సురక్షితమైనవిగా అందరూ నమ్ముతారు. అయితే, ఇటీవల కాలంలో మ్యూచువల్ ఫండ్స్ కూడా సురక్షితమైన పెట్టుబడి విధానంగా ఇన్వెస్టర్స్ భావిస్తున్నారు. ఈ రెండు విధానాలే 50 శాతానికి పైగా ప్రజలకు ఇష్టమైన పెట్టుబడులుగా ఉన్నాయి. బ్యాంకు మార్కెట్‌లో జరిపిన సర్వేలో ఈ విషయం వెలుగులోకి వచ్చింది. సర్వేలో పాల్గొన్న 77 శాతం మంది ప్రజలు తమ పొదుపు ఖాతాలను బ్యాంకుల్లో తెరిచినట్లు చెప్పారు.  కష్టపడి సంపాదించిన డబ్బును ఆదా చేయడానికి ఇదే సరైన మార్గం అని వారు భావిస్తున్నారు. సర్వే ప్రకారం, బ్యాంకుల్లో పొదుపు ఖాతాలు తెరవడంలో పురుషులు 79 శాతంతో ముందంజలో ఉండగా, మహిళలు కూడా 76 శాతంతో పురుషులతో దాదాపు సమానంగా ఉన్నారు. 

అయితే ఈ ఏడాది మ్యూచువల్ ఫండ్స్‌లో(Mutual Funds) పెట్టుబడులు పెట్టడంలో పురుషుల కంటే మహిళలు కాస్త వెనుకబడ్డారు. సర్వేలో పాల్గొన్న మహిళల్లో 50 శాతం మంది మ్యూచువల్ ఫండ్స్‌లో పెట్టుబడి పెట్టారు. అదే సమయంలో, పురుషులు 56 శాతంతో ఇక్కడ కూడా ముందున్నారు. ఈ సంఖ్య 2022 తో పోలిస్తే కొద్దిగా భిన్నంగా ఉంది. సర్వేలో పాల్గొన్న వారిలో 54 శాతం మంది మ్యూచువల్ ఫండ్స్‌లో పెట్టుబడి పెట్టేందుకు ఇష్టపడుతున్నారు. అదే సమయంలో, 53 శాతం మంది ప్రజలు ఫిక్స్‌డ్ డిపాజిట్లలో పెట్టుబడి పెట్టడాన్ని ఎంచుకున్నారు. 

రష్యా-ఉక్రెయిన్ యద్ధం - ద్రవ్యోల్బణం: 

సర్వే ప్రకారం, రష్యా-ఉక్రెయిన్ యుద్ధం -  గత రెండేళ్లలో పెరుగుతున్న ద్రవ్యోల్బణం వంటి ప్రపంచ భౌగోళిక రాజకీయ ఉద్రిక్తతలు భారతీయులపై ప్రతికూల ప్రభావం చూపాయి. ఫలితంగా ప్రజలు తమ పొదుపును తగ్గించుకున్నారు లేదా వారి సేవింగ్స్ ఆగిపోయాయి. ప్రజలు క్రిప్టోకరెన్సీపై విశ్వాసం కోల్పోయారు.  మ్యూచువల్ ఫండ్స్‌పై మాత్రమే పందెం వేశారు

కొత్త చట్టం ప్రకారం, క్రిప్టోకరెన్సీలపై 30 శాతం పన్ను విధిస్తున్నారు.  దీని కారణంగా ప్రజలు క్రిప్టోకరెన్సీలపై విశ్వాసం కోల్పోతున్నారు. ఇప్పటికీ  ప్రజలు  ఎఫ్‌డి, స్టాక్‌లు - మ్యూచువల్ ఫండ్స్ వంటి సాంప్రదాయ పెట్టుబడులను నమ్ముతున్నారు.

ఇప్పుడు మ్యూచువల్ ఫండ్స్ అంటే ఏమిటి? అవి ఎలా పని చేస్తాయో తెలుసుకుందాం.

ఆర్థిక నిపుణులు చెబుతున్నదాని ప్రకారం, మ్యూచువల్ ఫండ్ అనేది అసెట్ మేనేజ్‌మెంట్ కంపెనీల (AMC) ద్వారా నిర్వహించే ఫండ్. చాలా మంది తమ డబ్బును ఈ కంపెనీల్లో ఇన్వెస్ట్ చేస్తారు. అంటే, మ్యూచువల్ ఫండ్(Mutual Funds) అనేది చాలా మంది వ్యక్తుల డబ్బుతో రూపొందించిన ఫండ్. ఇక్కడ ఫండ్ మేనేజర్ మ్యూచువల్ ఫండ్‌లను వివిధ ప్రదేశాలలో సురక్షితంగా పెట్టుబడి పెడతాడు.

Also Read: రూపాయి టైమ్ బాలేదు.. డాలర్ తో పోలిస్తే మరింత దిగజారిపోయింది..

మీరు మ్యూచువల్ ఫండ్స్ ద్వారా షేర్లు లేదా బంగారంలో డబ్బును పెట్టుబడి పెట్టవచ్చు. AMCలు వ్యక్తిగత పెట్టుబడిదారుల నుంచి  సేకరించిన నిధులను ఈక్విటీ, బాండ్లు, బంగారం వంటి వాటిలో పెట్టుబడి పెడతాయి. ఫండ్ యూనిట్ల ప్రకారం పెట్టుబడిదారుల మధ్య రాబడిని పంపిణీ చేస్తాయి. అయితే, రాబడి ఎప్పుడూ మార్కెట్ రిస్క్ కు లోబడి ఉంటుంది. రాబడులు కూడా మారవచ్చు. రిస్క్‌ను నివారించడానికి, మ్యూచువల్ ఫండ్లలో ఎక్కువ కాలం పెట్టుబడి పెట్టాలి. 

500-100 రూపాయలతో.. 

మ్యూచువల్ ఫండ్స్‌లో ఇన్వెస్ట్ చేయడానికి పెద్ద మొత్తంలో అవసరం లేదు. కావాలంటే రూ.500 లేదా రూ.1000తో ప్రారంభించవచ్చు. ఉదాహరణకు, మీరు ఒక కంపెనీ షేర్లలో డబ్బు పెట్టుబడి పెట్టాలనుకుంటే, మీరు రూ. 1000తో ప్రారంభించవచ్చు. ఆ కంపెనీకి చెందిన ఒక షేర్ ధర రూ.30 వేలు అయితే, మీరు మ్యూచువల్ ఫండ్స్ ద్వారా ఈ కంపెనీలో రూ.1000 లేదా రూ.500 పెట్టుబడి పెట్టవచ్చు. మ్యూచువల్ ఫండ్ అటువంటి అనేక మంది పెట్టుబడిదారుల నుంచి  రూ. 500 లేదా రూ. 1000 వసూలు చేసి ఆ కంపెనీలో పెట్టుబడి పెడుతుంది. చాలా మ్యూచువల్ ఫండ్‌లను ఎప్పుడైనా విక్రయించవచ్చు. 

రెండురకాలు: 

రెండు రకాల మ్యూచువల్ ఫండ్‌లు అందుబాటులో ఉన్నాయి.   ఓపెన్ ఎండెడ్ అలాగే క్లోజ్డ్ ఎండెడ్. ఓపెన్ ఎండెడ్ మ్యూచువల్ ఫండ్స్ ఎప్పుడైనా కొనవచ్చు లేదా అమ్మవచ్చు.

అయితే, క్లోజ్డ్ ఎండెడ్ మ్యూచువల్ ఫండ్‌లను ఫండ్ ప్రారంభించినప్పుడు మాత్రమే కొనుగోలు చేయవచ్చు. పెట్టుబడి కోసం లాక్-ఇన్ వ్యవధి ముగిసిన తర్వాత అంటే మెచ్యూరిటీ పూర్తయిన తర్వాత మాత్రమే రీడీమ్ చేయవచ్చు. 

చాలా మ్యూచువల్ ఫండ్స్ ఓపెన్ ఎండెడ్, అంటే మీరు వాటిని ఎప్పుడైనా విక్రయించవచ్చు. సాధారణంగా క్లోజ్డ్ ఎండ్ స్కీమ్‌ల లాక్-ఇన్ వ్యవధి 3-4 సంవత్సరాలుగా ఉంటుంది 

సరైన ఫండ్ ఎంచుకోవడం అవసరం.. 

మ్యూచువల్ ఫండ్స్‌లో పెట్టుబడి పెట్టాలంటే సరైన మ్యూచువల్ ఫండ్‌(Mutual Funds)ను ఎంచుకోవడం చాలా ముఖ్యం అని నిపుణులు చెబుతున్నారు.  దీని కోసం, మీరు 5 సంవత్సరాల మార్కెట్ ట్రెండ్‌ను తెలుసుకోవాలి. అదేవిధంగా ఫండ్ మేనేజర్ సహాయం కూడా తీసుకోవచ్చు. అయితే, ఎదో ఒక దానిపైనే  పూర్తిగా ఆధారపడటం సరికాదు. ఫండ్ హౌస్ నిర్వహణను తప్పక చూడాలి. 

మీరు స్టాక్ మార్కెట్‌లో మంచి రాబడిని పొందుతారు, కానీ డబ్బును కోల్పోయే ప్రమాదం కూడా ఉంది. మ్యూచువల్ ఫండ్‌ను కొనుగోలు చేసేటప్పుడు, మార్కెట్ అస్థిరత నుంచి  క్రెడిట్ రిస్క్, వడ్డీ రేట్లు - ద్రవ్యోల్బణం వరకు ఉన్న నష్టాలను ఫండ్ హౌస్ ఎలా నిర్వహిస్తుందో చూడటం ముఖ్యం.

స్థిరమైన రాబడిపై దృష్టి పెట్టండి.. 

ఇన్వెస్టర్లు అధిక రాబడుల గురించి ఎప్పుడూ ఆందోళన చెందవద్దని, స్థిరమైన రాబడులపై దృష్టి పెట్టాలని నిపుణులు సూచిస్తారు. అధిక రాబడుల ప్రలోభాలకు గురికావడం ద్వారా మీరు మీ సేవింగ్స్ కోల్పోవచ్చు. మీరు స్థిరమైన రాబడితో దీర్ఘకాలంలో డబ్బు సంపాదించవచ్చు.

మార్కెట్ హెచ్చుతగ్గులకు ప్రభావితం కావద్దు.. 

తరచుగా మార్కెట్ హెచ్చుతగ్గుల సమయంలో ప్రజలు మ్యూచువల్ ఫండ్స్ లేదా పథకాల నుంచి  డబ్బును ఉపసంహరించుకుంటారు. అయితే భయం, అత్యాశతో పెట్టుబడి నిర్ణయాలు తీసుకోకూడదు.

దీని కోసం, పెట్టుబడిదారులు మ్యూచువల్ ఫండ్స్ ఆస్తి కేటాయింపు లేదా సమతుల్య ప్రయోజన వర్గాన్ని అనుసరించాలి. బ్యాలెన్స్‌డ్ అడ్వాంటేజ్ ఫండ్ అనేది ఈక్విటీ, డెట్ - ఆర్బిట్రేజ్‌ల మిశ్రమంలో పెట్టుబడి పెట్టే మ్యూచువల్ ఫండ్ పథకం. 

ఒకే చోట డబ్బు పెట్టుబడి పెట్టవద్దు.. 

మీరు మీ డబ్బును ఒకే చోట కాకుండా వేర్వేరు ప్రదేశాల్లో పెట్టుబడి పెట్టాలి.  తద్వారా మార్కెట్ ప్రతికూల ప్రభావాలు మీపై తక్కువగా ఉంటాయి. మీరు పెద్దగా నష్టపోకుండా ఉంటారు.

పెట్టుబడి పెట్టిన తర్వాత దాని గురించి మర్చిపోవడం చేస్తుంటారు చాలామంది. అంటే ఒకసారి పెట్టుబడి పెట్టి.. లాకింగ్ పిరియడ్ పూర్తి అయ్యే వరకూ  దాని గురించి పట్టించుకోరు. మార్కెట్‌లో మీ పెట్టుబడులు ఎలా పని చేస్తున్నాయో ట్రాక్ చేస్తూ ఉండాలి.  అలాగే మీరు ఇన్వెస్ట్ చేసిన కంపెనీ పోర్ట్‌ఫోలియో సమాచారం, ఫండ్ మేనేజర్ నిర్వహించే స్కీమ్‌లు - వారి డేటా రిపోర్ట్‌లను ట్రాక్ చేయండి.

PPF, FDలో కూడా డబ్బు పెట్టుబడి పెట్టండి

మ్యూచువల్ ఫండ్స్‌లో డబ్బు ఇన్వెస్ట్ చేయడం ప్రమాదకరం. అటువంటి పరిస్థితిలో, మీరు ఇందులో పెట్టుబడి పెట్టడమే కాకుండా, రిస్క్ తక్కువగా ఉన్న ప్రదేశాలలో కూడా పెట్టుబడి పెట్టడం ముఖ్యం. మీరు పబ్లిక్ ప్రావిడెంట్ ఫండ్ (PPF), ఫిక్స్‌డ్ డిపాజిట్ (FD) లేదా రికరింగ్ ఖాతా (RD)లో పెట్టుబడి పెట్టవచ్చు. దీని కారణంగా, మీరు స్టాక్ మార్కెట్‌లో నష్టపోతే, మీరు అలాంటి పథకాల  నుంచి  రాబడిని పొందడం కొనసాగిస్తారు.

ఖర్చు నిష్పత్తిని చెక్ చేయండి.. 

మ్యూచువల్ ఫండ్స్‌లో పెట్టుబడి పెట్టే ముందు, మీరు ఖర్చు నిష్పత్తిని తనిఖీ చేయాలి. మీ మ్యూచువల్ ఫండ్ నిర్వహణ ఖర్చును వ్యయ నిష్పత్తి అంటారు. ఏదైనా ఫండ్ వ్యయ నిష్పత్తి ఎక్కువ లేదా తక్కువగా ఉన్నా కూడా మీ రాబడిపై ప్రభావం చూపుతుంది.

గమనిక: ఈ కథనంలో ఇచ్చిన అభిప్రాయాలు - రికమండేషన్స్ వివిధ సందర్భాల్లో వ్యక్తిగత విశ్లేషకులు వెలుబర్చిన అభిప్రాయాల ఆధారంగా ఇవ్వడం జరిగింది.  ఇది కేవలం ప్రాథమిక అవగాహన కోసం ఇచ్చిన ఆర్టికల్ మాత్రమే. ఏదైనా పెట్టుబడి నిర్ణయాలు తీసుకునే ముందు సర్టిఫైడ్ నిపుణులను సంప్రదించాలని ఇన్వెస్టర్స్ కు సూచిస్తున్నాము.

Watch this interesting video: